Аҳоли мурожаатлари ижобий ҳал этилмоқда
Ўзбекистон мусулмонлари идорасида фуқаролар билан мулоқотни янада мустаҳкамлаш, аҳолини қийнаётган масалаларни тинглаш ва уларга ечим топиш мақсадида навбатдаги қабул бўлиб ўтди.
Муфтий ҳазратнинг биринчи ўринбосари Ҳомиджон домла Ишматбеков қабул жараёнида юртимизнинг турли ҳудудларидан келган фуқароларнинг оилавий муносабатлар, хайрия ва саховат ишларини ташкил этиш, ижтимоий кўмак олиш, шунингдек, диний-маърифий масалаларга оид мурожаатларини тинглади.
Ҳар бир мурожаат мазмунан чуқур ўрганилиб, фуқароларни қизиқтирган саволларга асосли ва батафсил жавоблар берилди. Айрим муаммолар шу жойнинг ўзида ижобий ҳал этилган бўлса, қўшимча ўрганиш, таҳлил ва мувофиқлаштириш талаб этиладиган масалалар тегишли бўлимлар ва масъул мутахассисларга йўналтирилиб, уларнинг ижроси назоратга олинди.
Шу билан бирга, мурожаатчиларга амалдаги қонунчилик ҳужжатлари, диний-маърифий меъёрлар ва жорий тартиблар асосида ҳуқуқий ва амалий тавсиялар берилди. Бу эса фуқароларнинг ўз муаммоларига тўғри ёндашувни шакллантиришида муҳим аҳамият касб этади.
Фуқаролар қабул давомида инсон қадрини улуғлаш, аҳоли дардига қулоқ тутиш борасидаги бундай мулоқотларни юқори баҳолаб, миннатдорлик билдиришди.
Ўзбекистон мусулмонлари идораси
Матбуот хизмати
Иордания ОАВ: Тошкентда Ислом цивилизациясига бағишланган халқаро медиафорум ўтказилади
Иорданиянинг нуфузли “Jordan News Agency” (Petra) ахборот агентлиги ҳамда “Hala Ahbar” нашрида 24–29 август кунлари Тошкент шаҳрида бўлиб ўтадиган “Ислом цивилизацияси: янги нигоҳ ва кашфиётлар” мавзусидаги халқаро медиафорумга бағишланган мақолалар эълон қилинди, деб хабар бермоқда “Дунё” АА.
Агентликда ёзилишича, мазкур йирик халқаро тадбир Ўзбекистоннинг жаҳон медиа ҳамжамияти билан алоқаларини янада кенгайтириш, журналистлар ва соҳа мутахассислари ўртасида тажриба алмашишни ривожлантириши билан аҳамиятлидир.
Шу билан бирга, форум давомида ислом цивилизациясининг бой илмий-маърифий ва маданий меросини замонавий медиа воситалари орқали кенг тарғиб этишга алоҳида эътибор қаратилади.
Форумнинг асосий тадбирлари Ўзбекистондаги Ислом цивилизацияси марказида ўтказилади. Унда хорижий оммавий ахборот воситалари вакиллари, халқаро экспертлар ҳамда медиа соҳаси мутахассислари иштирок этади.
Нашрлар форум дастурининг мазмун-моҳиятига алоҳида эътибор қаратган. Хусусан, тадбир доирасида ялпи мажлислар, ихтисослаштирилган медиа-кўргазмалар, матбуот брифинглари ва икки томонлама учрашувлар ташкил этилади.
Мунозараларда ҳужжатли фильмлар яратиш, тарихий хотирани асраш ва ёритиш, нашриёт лойиҳаларини ривожлантириш, замонавий технологиялардан медиа соҳасида самарали фойдаланиш ҳамда халқаро медиа лойиҳаларни амалга ошириш истиқболлари муҳокама қилинади.
Нашрнинг қайд этишича, тадбирнинг муҳим жиҳатларидан бири – Ўзбекистонлик талабалар учун халқаро медиа соҳасининг тажрибали мутахассислари иштирокида амалий мастер-класслар ўтказилишидир. Бу машғулотлар замонавий журналистика, медиамаҳсулотлар яратиш ва халқаро ахборот маконида самарали фаолият юритиш бўйича билим ва кўникмаларни оширишга хизмат қилади.
Иордания ОАВда форум доирасида иштирокчилар учун Самарқанд шаҳрига сафар ҳам режалаштирилгани қайд этилган. Хорижий журналистлар Имом Бухорий мажмуасини зиёрат қилиб, Самарқанднинг бой тарихий-маданий мероси билан танишадилар. Тошкент шаҳрида эса халқаро ОАВ вакиллари учун махсус медиатур ташкил этилади.
Бундай сафарлар форум иштирокчиларига Ўзбекистоннинг нафақат замонавий тараққиёти, балки унинг жаҳон цивилизацияси тарихидаги ўрни, илмий-маърифий анъаналари ва бой маданий мероси ҳақида бевосита тасаввур ҳосил қилиш имконини беради.
Мақолаларда халқаро медиафорумнинг 28 август куни якуний ялпи мажлис ва расмий ёпилиш маросими билан якунланиши ҳам маълум қилинган. Хорижий меҳмонлар Ўзбекистон Республикаси давлат мустақиллигининг 35 йиллигига бағишланган тадбирларда ҳам иштирок этади.
Ўзбекистон мусулмонлар идораси Матбуот хизмати
- «
- »