Мир Арабда таҳсил олаётган талабалар ҳолидан хабар олинди
Бухоро вилоятида жойлашган Мир Араб ўрта махсус ислом билим юртида Фарғона вилояти бош имом-хатиби ўринбосари Алишер домла Наимов ва талабалар билан учрашуви ташкил этилди.
Мулоқотда юртимизда Давлат раҳбари бошчилигида амалга оширилаётган кенг кўламли ислоҳотлар, айниқса, диний-маърифий соҳадаги янгиланишлар ҳақида атрофлича сўз юритилди.
Таъкидланганидек, сўнгги йилларда диний таълим тизимига алоҳида эътибор қаратилиб, таълим муассасаларининг моддий-техник базаси мустаҳкамланмоқда, талабалар учун янада қулай ва замонавий шароитлар яратилмоқда. Бу эса келажакда юксак билимли, кенг дунёқарашга эга мутахассисларни тайёрлашда муҳим аҳамият касб этади.
Шунингдек, учрашувда таълим даргоҳида таҳсил олаётган фарғоналик талабаларнинг ўқиш жараёни, яшаш шароити ва келгуси режалари билан қизиқилиб, уларга илмий изланишларда янада фаол бўлиш, вақтдан унумли фойдаланиш ҳамда юксак одоб-ахлоқ соҳиби бўлиб етишиш борасида тавсиялар берилди.
Тадбир доирасида талабалар учун дастурхон ёзилиб, самимий суҳбатлар давом этди. Бундай эътибор талабаларнинг кўнглини кўтариб, уларни янада илҳомлантирди.
Шу билан бирга, таълим муассасасига замонавий ўқув жараёнини қўллаб-қувватлаш мақсадида смарт доска совға қилинди.
Ушбу жиҳоз таълим сифатини янада ошириш, дарсларни замонавий усулларда ташкил этишга хизмат қилиши таъкидланди.
Фарғона вилояти вакиллиги
Матбуот хизмати
Диний таълимда янги босқич: Тошкентда нуфузли анжуман бўлиб ўтмоқда
Тошкент шаҳридаги Ислом цивилизацияси марказининг Катта мажлислар залида Ўзбекистон мусулмонлари идораси тасарруфидаги олий ва ўрта махсус диний таълим муассасалари профессор-ўқитувчиларининг «Замонавий диний таълим: педагогика, илм-маърифат ва инновация» мавзусидаги I илмий-амалий анжумани бошланди.
Ўзбекистон мусулмонлари идораси тарихида илк бор ўтказилаётган ушбу нуфузли тадбирда Президент маслаҳатчиси Музаффар Комилов, Дин ишлари бўйича қўмита раиси Содиқжон Тошбоев, муфтий Шайх Нуриддин Холиқназар ҳазратлари, Ислом цивилизацияси маркази директори Фирдавс Абдухолиқов, шунингдек, диний таълим муассасалари раҳбарлари, бош имом-хатиблар ва ОАВ вакиллари иштирок этмоқда. Анжуманга жами 700 нафарга яқин педагог ва соҳа вакиллари жалб этилган бўлиб, уларнинг 300 нафари бевосита залда, 400 нафари эса ҳудудлардан видеоселектор орқали қатнашмоқда.
Сўзга чиққан нотиқлар сўнгги йилларда Президентимиз ташаббуслари билан диний-маърифий соҳани такомиллаштириш ва замонавий кадрлар тайёрлаш борасида амалга оширилаётган тизимли ислоҳотларга тўхталиб ўтмоқда. Таъкидланганидек, Мир Араб олий мадрасаси, Ҳадис илми мактаби, Имом Термизий ислом институти ва мадрасаси ҳамда 4 та халқаро илмий-тадқиқот марказининг ташкил этилиши илм аҳлига кенг имкониятлар эшигини очди. Тошкент ислом институтида магистратура очилди, тизимдаги 510 нафар педагогнинг 50 нафардан ортиғи PhD ва DSc илмий даражаларига эга бўлди.
Шунингдек, юртимиздаги диний таълим муассасаларига Мисрнинг Ал-Азҳар мажмуаси устозлари жалб этилди. 90 та фан дастури ва янги авлод дарсликлари яратилди. Мир Араб, Хадичаи Кубро, Ҳидоя ва Кўкалдош мадрасалари замонавий биноларга эга бўлиб, Иордания, Миср ва Бирлашган Араб Амирликларининг етакчи олий таълим муассасалари билан ҳамкорликлар ривожланмоқда.
Ушбу нуфузли анжумандан кўзланган мақсад ҳам профессор-ўқитувчилар учун илмий-амалий мулоқот майдонини яратиш, педагогларнинг касбий салоҳиятини юксалтириш, таълим жараёнига рақамли ва инновацион усулларни кенг жорий этишдир.
Ўзбекистон мусулмонлари идораси Матбуот хизмати