Беш фарзанди бўлган ёлғиз онага уй топширилди
Қорақалпоғистон Республикаси Тахиатош тумани "Дўстлик" маҳалла фуқаролар йиғини Беруний кўчаси 17-уйда яшовчи оиланинг яшаш шароити яхши эмас эди. Оила бошлиғи 2017 йилда вафот этгани боис беш нафар фарзанд билан ёлғиз қолган Меҳрибан Қошимбетова ҳаётнинг оғир синовларига дош бериб келаётганди.
Ушбу оилага кўмак бериш мақсадида "Вақф" хайрия жамоат фондининг Қорақалпоғистон Республикаси филиали ҳомийларни жалб қилган ҳолда хайрли ишни амалга оширди. Мазкур манзилдаги эски уй тўлиқ бузилиб, ўрнида барча замонавий шароитларга эга 4 хонали уй қуриб битказилди.
Куни кеча мазкур хонадон Меҳрибан Қошимбетова ва унинг беш нафар фарзандига тантанали ҳолатда топширилди.
Аллоҳ таоло эҳтиёжманд оиланинг турмуш даражасини яхшилаш, болаларнинг муносиб шароитда камол топишига ўз ҳиссасини қўшган, уларга бир олам хурсандчилик улашган саховатли ҳомийлардан, қўли гул усталардан, барча халқимиздан рози бўлсин.
Vaqf.uz
Маънавий-маърифий соҳа фидойилари тақдирланди
Ватанимиз мустақиллигининг 35 йиллиги муносабати билан Сурхондарё вилояти Қумқўрғон туманида диний-маърифий соҳада самарали фаолият юритаётган, жамиятда соғлом маънавий муҳитни мустаҳкамлаш ва ёшларни ёт ғоялардан асраш йўлида фидокорона меҳнат қилаётган бир гуруҳ соҳа ходимлари тақдирланди.
Тадбирда Қумқўрғон тумани ҳокимининг биринчи ўринбосари З.Эшқобилов иштирок этиб, йиғилганларни қутлуғ байрам билан самимий муборакбод этди ҳамда уларнинг эл-юрт осойишталиги ва маънавий-маърифий ишлар самарадорлигини оширишдаги хизматларини юқори баҳолади.
Маросимда фидойи соҳа ходимларига туман ҳокимлигининг ташаккурномалари ва байрам эсдалик совғалари тантанали равишда топширилди.
Ўзбекистон мусулмонлари идораси
Матбуот хизмати
