Мурожаатларга доимий эътибор қаратилмоқда
Ўзбекистон мусулмонлари идорасида навбатдаги фуқаролар қабули бўлиб ўтди.
Идора раиси ўринбосари Муҳаммадолим домла Муҳаммадсиддиқов бошчилигида ўтказилган қабулда юртдошларимиз томонидан айтилган турли масалалар юзасидан билдирилган мурожаатлар атрофлича кўриб чиқилди.
Мурожаатчилар билан очиқ ва самимий мулоқот олиб борилиб, уларни қизиқтирган саволларга батафсил жавоблар берилди. Хусусан, масжидлар ҳолати, оилавий муносабатлар, ижтимоий кўмак, хайрия ишлари, ҳаж ва умра каби масалалар юзасидан шаръий ва ҳуқуқий тушунтиришлар берилди.
Айрим мурожаатлар шу жойнинг ўзида ижобий ҳал этилди. Қўшимча ўрганиш талаб этилган масалалар эса тегишли бўлим ва масъул ходимларга юклатилиб, ижроси назоратга олинди.
Қабул иштирокчилари ўзларига кўрсатилган эътибор, диний соҳа ходимлари томонидан кўрсатилаётган хизмат ва кўмаклар учун миннатдорлик билдиришди.
Ўзбекистон мусулмонлари идораси
Матбуот хизмати
“Al Jarida” газетаси: Ўзбекистон – тарих, маданият ва замонавийлик уйғунлашган юрт
Кувайтнинг “Al Jarida” газетасида журналист Рабиҳ Калласнинг Ўзбекистонга саёҳати давомида олган таассуротлари асосида тайёрланган мақолалари эълон қилинди, деб хабар бермоқда “Дунё” АА.
“Тошкент – Марказий Осиёнинг дурдонаси ва кувайтликлар учун муносиб сайёҳлик манзили” ҳамда “Самарқанд – асрлар оша дунёни ҳайратга солаётган шаҳар” сарлавҳали материалларда ўзбек халқининг меҳмондўстлиги, шаҳардаги хавфсизлик ва тозалик, замонавий инфратузилма ҳамда Ипак йўлининг бой мероси ҳақида маълумотлар келтирилган.
Муаллифнинг таъкидлашича, Ўзбекистон пойтахти хавфсизлик, меҳмондўстлик ва исломий меросни уйғунлаштирган шаҳар ҳисобланади. Тошкентнинг кенг ва тоза кўчалари, тинч-тотув муҳити сайёҳларда катта таассурот қолдиради. Тошкент метросининг бетакрор меъморчилиги, янги барпо этилган Ислом цивилизацияси маркази минтақа маданий юксалишида муҳим ўринга эга.
Мақолаларда 2700 йилдан ортиқ тарихга эга Самарқанд шаҳрининг Буюк Ипак йўли чорраҳасидаги стратегик аҳамияти ҳақида сўз юритилган. Амир Темур ва Темурийлар даврида гуллаб-яшнаган ушбу шаҳарнинг Регистон майдони, Шоҳи Зинда мажмуаси, Гўри Амир мақбараси ва Мирзо Улуғбек расадхонаси каби меъморий дурдоналари Шарқ цивилизациясининг юксак намунаси сифатида тавсифланади.
Журналист Ўзбекистонга саёҳат Форс кўрфази давлатларидан, хусусан, Кувайтдан келувчи оилавий туристлар учун энг қулай ва жозибадор йўналиш эканини таъкидлаган. Мамлакатдаги бетакрор миллий ошхоналар, ҳалол таомлар, замонавий “Афросиёб” тезюрар поездлари қатнови саёҳатни янада мазмунли қилади.
Ўзбекистон мусулмонлари идораси Матбуот хизмати