Имом-хатибларга KPI платформаси бўйича тушунчалар берилди
Мамлакатимизда амалга оширилаётган рақамлаштириш ислоҳотлари доирасида Ўзбекистон мусулмонлари идораси томонидан диний соҳа ходимлари фаолиятини янги босқичга кўтариш борасида тизимли ишлар олиб борилмоқда. Хусусан, имом-хатиблар ва имом-ноибларининг кундалик иш фаолияти ҳамда маънавий-маърифий тадбирлари мониторинги KPI (самарадорликнинг муҳим кўрсаткичлари) платформаси орқали назорат қилинмоқда.
Шу муносабат билан, жорий йилнинг 9 апрель куни Андижон вилоятида шаҳар ва туман бош имом-хатиблари ҳамда масжид ҳужжатларига масъул ходимлар иштирокида йиғилиш бўлиб ўтди.
Тадбирда Ўзбекистон мусулмонлари идораси раиси ўринбосари Муҳаммадолим Муҳаммадсиддиқов, Масжидлар билан ишлаш бўлими мудири Музаффар Камолов ва Кадрлар билан ишлаш бўлими бошлиғи Салоҳиддин Шерхоновлар иштирок этди.
Сўзга чиққанлар имом-хатибларнинг илмий ва касбий маҳоратини ошириш, фаолиятдаги камчиликларни бартараф этиш ҳамда иш жараёнини тизимли ташкил этишда KPI платформасидан самарали фойдаланиш бўйича зарур кўрсатма ва топшириқлар бердилар.
Muslimun.uz
ЮНЕСКО билан Ўзбекистон маҳалла тизими тажрибасини халқаро даражада тарғиб қилиш масаласи муҳокама қилинди
Ўзбекистон ва ЮНЕСКОнинг Номоддий маданий меросни муҳофаза қилиш тўғрисидаги конвенцияси котибияти вакиллари ўртасида онлайн учрашув бўлиб ўтди, деб хабар бермоқда “Дунё” АА.
Мамлакатимизнинг ЮНЕСКО ҳузуридаги Доимий ваколатхонаси кўмагида ташкил этилган мулоқотда маҳалла билан боғлиқ маданий анъана ва урф-одатлар, уларни халқаро даражада тарғиб қилиш истиқболлари муҳокама қилинди.
ЮНЕСКОнинг Номоддий маданий меросни муҳофаза қилиш тўғрисидаги конвенцияси котиби Фумико Охината ва Осиё-Тинч океани минтақаси учун масъул дастур мутахассиси Николас Тан мавзу юзасидан ўз фикр-мулоҳазаларини баён этди.
Ўзбекистон томонидан Ташқи ишлар вазирлиги, Ўзбекистон маҳаллалари уюшмаси ҳамда ЮНЕСКО ҳузуридаги Доимий ваколатхонаси вакиллари маҳалланинг кўп асрлик тарихи, унинг жамият ҳаётидаги алоҳида ўрни ва миллий анъаналарни сақлашдаги аҳамияти ҳақида сўз юритди.
Учрашувда маҳалла Ўзбекистон халқи турмуш тарзининг ажралмас қисми экани таъкидланди. У инсонларни яхши қўшничилик, ўзаро ёрдам, ҳамжиҳатлик ва катта авлод вакилларига ҳурмат тамойиллари асосида бирлаштиради.
ЮНЕСКО Котибияти вакиллари тақдим этилган материалларга катта қизиқиш билдирди. Улар Ўзбекистонда маҳалла билан боғлиқ шаклланган жамоат ҳаёти тартибининг ўзига хос хусусиятларини эътироф этди.
Суҳбат давомида Ўзбекистоннинг номоддий маданий меросни тарғиб қилишдаги роли алоҳида қайд этилди. Шу нуқтаи назардан, ўзбек маҳалла тизими тажрибаси ЮНЕСКО Котибияти мутахассисларида катта қизиқиш уйғотди.
Ўзбекистон мусулмонлари идораси Матбуот хизмати