Тошкент вилояти Янгийўл шаҳри "Наврўз" маҳалла фуқаролар йиғини 19-уйда яшовчи Мадина Қурбонованинг эски, хароба ҳолатдаги хонадони таъмирлаб берилди.
Оғир шароитда яшаб келган оиланинг уйи қайта таъмирланиб, фойдаланишга топширилди. Уй эгалари бу қувончли лаҳзада самимий хурсандчилик билдириб, дуолар қилишди.
Мазкур хайрли ишлар саховатли инсонларнинг эҳсонлари сабаб амалга оширилмоқда
Аллоҳ таоло марҳамат қилади:
"Яхшилик қилсангиз — ўзингиз учундир." (Исро сураси, 7-оят)
Пайғамбаримиз (соллаллоҳу алайҳи васаллам) айтганлар:
"Раҳм қилганларга Раҳмон ҳам раҳм қилади."
Шу каби эзгу ишлар орқали яна кўплаб оилаларнинг ҳаётига нур кириб бормоқда.
Сиз ҳам яхшиликка сабабчи бўлинг!
ЎЗИНГИЗ ХОҲЛАГАН ЙЎНАЛИШНИ ТАНЛАНГ ВА ЭҲСОН ҚИЛИНГ!
манба:
Ўзбекистон мусулмонлари идораси
Матбуот хизмати
Иорданияда Ўзбекистон мустақиллиги байрами муносабати билан тадбир ўтказилди
Иордания пойтахтида Ўзбекистон мустақиллигининг 35 йиллиги муносабати билан байрам тадбири бўлиб ўтди, деб хабар бермоқда “Дунё” АА.
Тадбир Ўзбекистоннинг Ар-Риёддаги элчихонаси томонидан мамлакатимизнинг Иорданиядаги фахрий консули Лауй Абуғазалий кўмагида ташкил этилди.
Байрам тантанасида дипломатик корпус, Иорданиянинг давлат ва жамоат ташкилотлари вакиллари, таниқли ишбилармонлар, етакчи оммавий ахборот воситалари ҳамда ўзбек диаспораси вакиллари иштирок этди.
Учрашувда меҳмонлар Ўзбекистоннинг мустақиллик йилларида эришган ютуқлари, Президент Шавкат Мирзиёев раҳбарлигида амалга оширилаётган кенг кўламли ислоҳотлар ва замонавий ижтимоий-иқтисодий ўзгаришлар натижалари билан таништирилди.
Халқаро ҳамкорликни кенгайтириш ва Ўзбекистоннинг сармоявий имкониятларига алоҳида эътибор қаратилди. Шу билан бирга, мамлакатимизнинг инвестицион салоҳияти, туризмни ривожлантириш, бой тарихий-маданий мероси ҳамда Ислом цивилизацияси маркази фаолиятига бағишланган видеороликлар намойиш этилди.
Иштирокчилар Ўзбекистон ва Иордания ўртасидаги сайёҳлик ва гуманитар алоқаларни янада ривожлантиришга хизмат қиладиган туризм имкониятлари, қадимий шаҳарлар ва маданий обидалар билан танишиш имконига эга бўлди.
Эслатиб ўтамиз, 2025 йил 2 июнь куни Ўзбекистоннинг қароргоҳи Ар-Риёд шаҳрида бўлган Иорданиядаги элчиси Нодиржон Турғунов Қирол Абдулла II ибн ал-Ҳусайнга ишонч ёрлиқларини топширганди.
Ўзбекистон мусулмонлари идораси Матбуот хизмати
