Халқ билан мулоқот — муаммолар ечимига кўприк
Ўзбекистон мусулмонлари идорасида фуқаролар билан очиқ мулоқотни мустаҳкамлаш, аҳолини қийнаётган муаммоларга ижобий ечим топиш мақсадида навбатдаги қабул жараёни ўтказилди.
Тадбир давомида Муфтий ҳазратларининг биринчи ўринбосари Ҳомиджон домла Ишматбеков юртимизнинг турли ҳудудларидан келган фуқароларни қабул қилиб, уларнинг мурожаатларини тинглади.
Мулоқотлар давомида асосий эътибор оилавий муносабатларни соғломлаштириш, муҳтожларга ижтимоий кўмак бериш, ҳаж масаласи ва бошқа диний-маърифий мавзуларга қаратилди.
Ҳар бир мурожаат алоҳида синчковлик билан ўрганилиб, фуқароларга шариат аҳкомлари ва амалдаги қонунчилик доирасида батафсил тушунтиришлар берилди. Кўплаб масалалар ижобий ҳал этилган бўлса, қўшимча вақт талаб қиладиган мурожаатлар тегишли бўлим мутахассисларига йўналтирилиб, ижроси назоратга олинди.
Бундай тизимли мулоқотлар инсон қадрини улуғлаш ва жамиятда ижтимоий адолатни қарор топтириш йўлидаги муҳим қадам бўлиб хизмат қилмоқда.
Ўзбекистон мусулмонлари идораси
Матбуот хизмати
Роббингизга таваккул қилиб уйқуга ётинг
Ҳаётнинг бўронли кунларию ўткир тиғли ҳанжарлари унга озор беришига қарамай Аллоҳнинг қадари ва иродасига рози бўлиб уйқуга кетган, маҳзунлик унинг қалбига киришга йўл топа олмаётган, кўз ёшлар эса кўзига ҳеч ўрнаша олмаётган ва фарзанди, суюкли инсонлари, ота-онаси ёки дўстларини йўқотган барча инсонларга айтар гапимиз: Аллоҳ ажрингизни улкан қилиб берсин! Даражангизни олий қилсин! Синиқлигингиз ўрнини Ўзи тўлдириб берсин! У зот бундай марҳамат қилади:
﴿وَاسْتَعِينُوا بِالصَّبْرِ وَالصَّلَاةِ وَإِنَّهَا لَكَبِيرَةٌ إِلَّا عَلَى الْخَاشِعِينَ﴾
“Сабр ва намоз ила ёрдам сўранг. Ва, албатта, у нафси синиқлардан бошқаларга жуда катта ишдир” (Бақара сураси, 45-оят).
Ҳазрати Алий розияллоҳу анҳу айтадилар: “Сабрнинг иймондаги ўрни бошнинг жисмдаги ўрни кабидир”. Шунинг учун сиз сабрингиз эвазига бериладиган мукофот – Фирдавс жаннатини қўлга киритишингиз сизга хушхабар бўлсин! Тез орада сиз ҳар қандай ҳолатда ҳам муваффақият қозонган инсон эканингизни биласиз. Чунки Аллоҳ таоло Ўзининг Пайғамбарига бундай дейди:
﴿وَبَشِّرِ الصَّابِرِينَ﴾
“Ва сабрлиларга башорат бер” (Бақара сураси, 155-оят).
Шуъла: Ўзингизга бўлган ишонч умрингиз қандай бўлишидан қатъий назар сизга янги ғоялар ижод этишингиз ва ўз касбингизда янги марраларни забт этишингизга ёрдам беради.
Доктор Оиз ал-Қарнийнинг
"Дунёдаги энг бахтли аёл" китобидан