Бухоро туманида сайёр учрашув ўтказилди
Ўзбекистон мусулмонлари идораси Бухоро вилояти вакили, вилоят бош имом-хатиби Жобир домла Элов бошчилигида навбатдаги сайёр учрашув Бухоро туманида бўлиб ўтди.
Унда масжид имом-хатиблари, отинойилар, маҳалла домлалари, раислар ва жамоат фаоллари иштирок этдилар.
Йиғилишда диний-маърифий фаолиятни ривожлантириш, аҳоли билан самарали мулоқот, ёшларни соф эътиқод ва маънавият руҳида тарбиялаш масалалари муҳокама қилинди. Шунингдек, имом-хатиблар ва отинойилар малакасини оширишга эътибор қаратилди.
Шу билан бирга, “Янги Ўзбекистоннинг тинчлик ва маънавият тарғиботчилари” ташаббуси доирасида “Сайёр қабул”ни ташкил этиш бўйича кўрсатмалар берилди. Ишчи гуруҳ тузилиб, вазифалар белгилаб олинди.
https://www.naqshband.uz/yangiliklar/buxoro_tuman_150426
Ўзбекистон мусулмонлари идораси
Бухоро вилояти вакиллиги
Матбуот хизмати
Покистон ОАВ: Ўзбекистон Ислом цивилизацияси меросини тиклашда муҳим ташаббускор бўлмоқда
Покистоннинг “Diplomatic News Agency”, “Islamabad Post”, “News Network Pakistan”, “The World News”, “Infora News” нашрларида Ўзбекистонда бўлиб ўтган I Халқаро Ислом цивилизацияси форуми ҳақида туркум мақолалар эълон қилинди, деб хабар бермоқда “Дунё” АА.
Покистон матбуотининг ёзишича, мазкур форум тинчлик, бағрикенглик, маърифат, маданиятлараро ва динлараро мулоқот тамойиллари асосида ташкил этилган. Ушбу йирик тадбирда Ўзбекистоннинг бутун минтақа, ислом ва жаҳон цивилизациясининг шаклланиши ҳамда тараққиётига қўшган ҳиссаси эътироф этилган ҳолда махсус декларация қабул қилинган.
Мазкур декларацияда Ўзбекистон Президентига чуқур миннатдорлик изҳор этилгани, Ўзбекистон етакчиси томонидан 2017 йилда БМТ Бош Ассамблеясининг 72-сессиясида илгари сурилган ташаббуснинг бугунги жамият учун беқиёс аҳамияти эътироф этилган. Ушбу ташаббус ислом цивилизациясининг бой инсонпарварлик меросини қайта тиклаш, илмий жиҳатдан ўрганиш ва кенг тарғиб этишга қаратилган.
Шу билан бирга, мақолада форум иштирокчилари бир овоздан Ўзбекистонда Ислом цивилизацияси марказининг ташкил этилгани, унинг самарали фаолияти йўлга қўйилгани ва Биринчи Халқаро Ислом цивилизацияси форумининг ўтказилиши мазкур ташаббуснинг амалий ифодаси эканини тасдиқлагани қайд этилган. Бу саъй-ҳаракатлар мусулмон умматининг бебаҳо меросини ўрганиш, асраб-авайлаш ва кенг тарғиб қилиш борасида халқаро ҳамкорликнинг янги даврига асос солгани шубҳасиз.
Декларацияда ислом цивилизацияси меросини ўрганиш, сақлаш ва кенг тарғиб қилиш, халқаро ҳамкорликнинг янги тизимини шакллантириш мақсад қилиб белгиланган. Шу билан бирга, ислом оламидаги нуфузли ташкилотлар ва глобал ташаббусларнинг алоҳида ўрин тутиши қайд этилган.
Ўзбекистон мусулмонлар идораси Матбуот хизмати
