Бухоро туманида хайрли ташаббуслар давом этмоқда
Бухоро туманида “Янги Ўзбекистоннинг тинчлик ва маънавият тарғиботчилари” ташаббуси доирасида кенг қамровли маънавий-маърифий тадбир бўлиб ўтди. “Имом Бухорий” жоме масжидида бошланган мулоқотларда вилоят бош имом-хатиби Жобир домла Элов, диний соҳа ходимлари, отинойилар ва маҳалла фаоллари иштирок этдилар.
Тадбир давомида тузилган ишчи гуруҳлар ҳудуддаги 6 та масжид ва 20 та маҳаллага бириктирилиб, хайрли амаллар амалга оширилди. Жумладан, нуронийлар ва эҳтиёжманд оилалар ҳолидан хабар олиниб, беморларга моддий ва маънавий кўмак кўрсатилди. Шунингдек, низоли ва муаммоли оилалар билан ўтказилган суҳбатлар натижасида бир нечта хонадонларда ярашувга эришилди.
“Яшил макон” лойиҳаси доирасида масжид ҳовлисига манзарали ва мевали кўчатлар экилган бўлса, “Ғунча” болалар боғчасига уюштирилган ташриф жажжи болажонларга ҳақиқий байрам қувончини улашди. Бу каби тадбирлар жамиятда меҳр-оқибат, ҳамжиҳатлик ва бағрикенглик муҳитини янада мустаҳкамлашга хизмат қилмоқда.
Naqshband.uz
ЮНЕСКО билан Ўзбекистон маҳалла тизими тажрибасини халқаро даражада тарғиб қилиш масаласи муҳокама қилинди
Ўзбекистон ва ЮНЕСКОнинг Номоддий маданий меросни муҳофаза қилиш тўғрисидаги конвенцияси котибияти вакиллари ўртасида онлайн учрашув бўлиб ўтди, деб хабар бермоқда “Дунё” АА.
Мамлакатимизнинг ЮНЕСКО ҳузуридаги Доимий ваколатхонаси кўмагида ташкил этилган мулоқотда маҳалла билан боғлиқ маданий анъана ва урф-одатлар, уларни халқаро даражада тарғиб қилиш истиқболлари муҳокама қилинди.
ЮНЕСКОнинг Номоддий маданий меросни муҳофаза қилиш тўғрисидаги конвенцияси котиби Фумико Охината ва Осиё-Тинч океани минтақаси учун масъул дастур мутахассиси Николас Тан мавзу юзасидан ўз фикр-мулоҳазаларини баён этди.
Ўзбекистон томонидан Ташқи ишлар вазирлиги, Ўзбекистон маҳаллалари уюшмаси ҳамда ЮНЕСКО ҳузуридаги Доимий ваколатхонаси вакиллари маҳалланинг кўп асрлик тарихи, унинг жамият ҳаётидаги алоҳида ўрни ва миллий анъаналарни сақлашдаги аҳамияти ҳақида сўз юритди.
Учрашувда маҳалла Ўзбекистон халқи турмуш тарзининг ажралмас қисми экани таъкидланди. У инсонларни яхши қўшничилик, ўзаро ёрдам, ҳамжиҳатлик ва катта авлод вакилларига ҳурмат тамойиллари асосида бирлаштиради.
ЮНЕСКО Котибияти вакиллари тақдим этилган материалларга катта қизиқиш билдирди. Улар Ўзбекистонда маҳалла билан боғлиқ шаклланган жамоат ҳаёти тартибининг ўзига хос хусусиятларини эътироф этди.
Суҳбат давомида Ўзбекистоннинг номоддий маданий меросни тарғиб қилишдаги роли алоҳида қайд этилди. Шу нуқтаи назардан, ўзбек маҳалла тизими тажрибаси ЮНЕСКО Котибияти мутахассисларида катта қизиқиш уйғотди.
Ўзбекистон мусулмонлари идораси Матбуот хизмати
