“Баркамол авлод – 2026” республика мусобақаси бошланди
Шу йил 23-24 апрель кунлари Самарқанддаги Ҳадис илми мактабида Ўзбекистон мусулмонлари идораси тасарруфидаги олий ва ўрта махсус диний таълим муассасалари талабалари ўртасида “Баркамол авлод – 2026” республика мусобақаси ўтказилмоқда. Унда 14 та диний таълим муассасасидаги саралаш босқичларидан ўтиб келган жамоалар спортнинг миллий кураш, тош кўтариш, стол тенниси ва шахмат турлари бўйича ўзаро беллашди.
Бугун куннинг биринчи ярмида мусобақа иштирокчилари Самарқанддаги қадамжолар, хусусан, Гўри Амир мажмуаси, Регистон майдонидаги Тиллакори, Шердор ва Улуғбек мадрасаларини зиёрат қилиб, кўплаб фойдали маълумотларга эга бўлиш билан бирга элу юрт ҳақига хайрли дуолар қилинди.
Куннинг иккинчи ярмида бўлиб ўтган мусобақа очилиш маросимида Ўзбекистон мусулмонлари идораси масъул раҳбар ва ходимлари, диний таълим муассасалари раҳбарлари, иштирокчи жамоалар ва уларнинг мураббийлари қатнашди.
Тадбир аввалида сўзга чиққан Ҳадис илми мактаби ректори Барот Амонов меҳмонларни ташриф билан қутлади. Сўнг Диний идора раиси ўринбосари Муҳаммадолим Муҳаммадсиддиқов барча иштирокчиларга Муфтий ҳазратларининг салом ва дуоларини етказиш баробарида юртимизда таълим-тарбия ва спортга қаратилаётган эътибор ҳақида сўзлаб, мусобақада қатнашаётган талаба-ёшларга муваффақият тилади.
Шундан сўнг қуръа ташлаш маросими бўлиб ўтди. Унда диний таълим муассасалари жамоаларининг беллашув тартиби ва навбатлари аниқлаб олинди. Шу асосда стол тенниси, шахмат ва миллий кураш йўналишлари бўйича саралаш ўйинлари ўтказилди. Юқори кайфият ва қизғин рақобат муҳитида ўтган беллашув якунида муносиб иштирокчилар финал йўлланмасини қўлга киритди.
Эслатиб ўтамиз, эртага, 24 апрель куни мусобақанинг ҳал қилувчи – финал босқичи бўлиб ўтади. Унда ғолиб ва совриндорлар аниқланиб, тақдирланади.
Ўзбекистон мусулмонлари идораси
Матбуот хизмати
“Em Insight”: Тошкентдаги халқаро медиафорум ислом цивилизациясининг замонавий қиёфасини намоён этди
Британиянинг “Em Insight” журналида Ўзбекистонда бўлиб ўтган “Ислом цивилизацияси: янги нигоҳ, янги кашфиётлар” мавзусидаги халқаро медиафорумга бағишланган мақола эълон қилинди, деб хабар бермоқда “Дунё” АА.
Нашрда ёзилишича, Ўзбекистон Ислом цивилизацияси маркази томонидан ташкил этилган “Ислом цивилизацияси: янги нигоҳ, янги кашфиётлар” халқаро медиафоруми хорижлик ОАВда катта қизиқиш уйғотган.
Рақамли платформалар, сунъий интеллект ва ахборот хуружлари авж олган ҳозирги замонда оммавий ахборот воситаларининг мамлакатлар, маданиятлар ва цивилизациялар ҳақидаги тасаввурларни шакллантиришдаги ўрни тобора ортиб бормоқда.
Мақолада таъкидланишича, Ал-Хоразмий, Ибн Сино, Беруний, Имом Бухорий, Имом Термизий ва Мирзо Улуғбек каби жаҳон илм-фани ривожига беқиёс ҳисса қўшган буюк мутафаккирлар юрти бўлмиш Ўзбекистон бу каби глобал муҳокамалар учун энг мақбул майдондир.
Қатарнинг “The Peninsula” газетаси масъул муҳаррири Муҳаммад Осмон форумнинг рақамли ахборот асридаги аҳамиятига тўхталиб, Имом Бухорийнинг ҳадисларни тўплаш ва уларнинг ҳаққонийлигини текширишдаги қатъий ёндашувини тилга олди.
У ушбу методологияни манбаларни чуқур ўрганиш ва верификация қилишнинг ўчмас намунаси деб атади ва бу тамойиллар фейк хабарлар ҳамда сунъий интеллект маҳсулотлари кўпайган ҳозирги даврда жуда аҳамиятли эканини билдирди.
Ўзбекистон Миллий ахборот агентлиги муҳаррири Ўткир Алимов форумнинг Мустақилликнинг 35 йиллиги остонасида ўтказилаётганига эътибор қаратган. У 50 мамлакатдан 300 га яқин ОАВ вакилларининг Тошкентда жамлангани Ўзбекистоннинг цивилизациялар чорраҳаси сифатидаги ўрни ортиб бораётганидан далолат беришини таъкидлади.
Мақолада Тошкентдаги халқаро медиафорум журналистика масъулияти, тарихий тадқиқотлар чуқурлиги ва замонавий технологиялар имкониятларини бирлаштирган ҳолда Ислом цивилизациясини янги, замонавий қиёфада дунёга танитишга хизмат қилиши баён этилган.
Ўзбекистон мусулмонлари идораси Матбуот хизмати