Неъматни қабул қилинг ва унинг шукрини келтиринг
Бисмиллаҳир Роҳманир Роҳийм
Шукр этилмас қанча неъматлар,
Бахтсизлик остида жим келарлар.
Аллоҳнинг неъматлари учун Унга шукр ва ибодат қилиб ҳаққини адо этинг. Сувдан ичишингиз ва покланишингиз учун ишлатинг, Қуёшнинг нури ва иссиқлигидан роҳатланинг, Ойнинг зиёсидан завқланинг ҳамда денгизлар ва табиат манзараларидан роҳат олинг ва гуноҳларни кечирувчи Зотга шукр қилинг. Аллоҳ сизга берган неъматлардан фойдаланинг, лекин зинҳор куфрони неъмат қилиб ношукрлик қилманг. Аллоҳ таоло айтган ушбу тоифадан бўлиб қолманг:
﴿يَعْرِفُونَ نِعْمَةَ اللَّهِ ثُمَّ يُنْكِرُونَهَا وَأَكْثَرُهُمُ الْكَافِرُونَ﴾
“Улар Аллоҳнинг неъматини танирлар, кейин эса, инкор қилурлар. Уларнинг кўплари кофирлардир” (Наҳл сураси, 83-оят).
Неъматларни инкор этишдан сақланинг. Атригулнинг тиконларига қарашдан олдин унинг гўзаллигига боқинг. Қуёш иссиғидан шикоят этишингиздан олдин унинг нуридан фойдаланишингизни эсланг. Тун зулматидан нолишингиздан аввал унинг тинч ва осудалигини ёдга олинг. Неъматларга сўкиниб ёмон кўз билан қарашнинг нима кераги бор?! Уларнинг белгиланган йўлини ўзгартириш билан нима фойда топасиз?! Сизга берилган неъматларни гўзал ҳолда қабул қилинг ва Аллоҳга ҳамд айтинг!
Шуъла: Хато йўлдан тўғри йўлга ўтиш узоқ, аммо жуда гўзал саргузаштдир.
Доктор Оиз ал-Қарнийнинг
"Дунёдаги энг бахтли аёл" китобидан
“Em Insight”: Тошкентдаги халқаро медиафорум ислом цивилизациясининг замонавий қиёфасини намоён этди
Британиянинг “Em Insight” журналида Ўзбекистонда бўлиб ўтган “Ислом цивилизацияси: янги нигоҳ, янги кашфиётлар” мавзусидаги халқаро медиафорумга бағишланган мақола эълон қилинди, деб хабар бермоқда “Дунё” АА.
Нашрда ёзилишича, Ўзбекистон Ислом цивилизацияси маркази томонидан ташкил этилган “Ислом цивилизацияси: янги нигоҳ, янги кашфиётлар” халқаро медиафоруми хорижлик ОАВда катта қизиқиш уйғотган.
Рақамли платформалар, сунъий интеллект ва ахборот хуружлари авж олган ҳозирги замонда оммавий ахборот воситаларининг мамлакатлар, маданиятлар ва цивилизациялар ҳақидаги тасаввурларни шакллантиришдаги ўрни тобора ортиб бормоқда.
Мақолада таъкидланишича, Ал-Хоразмий, Ибн Сино, Беруний, Имом Бухорий, Имом Термизий ва Мирзо Улуғбек каби жаҳон илм-фани ривожига беқиёс ҳисса қўшган буюк мутафаккирлар юрти бўлмиш Ўзбекистон бу каби глобал муҳокамалар учун энг мақбул майдондир.
Қатарнинг “The Peninsula” газетаси масъул муҳаррири Муҳаммад Осмон форумнинг рақамли ахборот асридаги аҳамиятига тўхталиб, Имом Бухорийнинг ҳадисларни тўплаш ва уларнинг ҳаққонийлигини текширишдаги қатъий ёндашувини тилга олди.
У ушбу методологияни манбаларни чуқур ўрганиш ва верификация қилишнинг ўчмас намунаси деб атади ва бу тамойиллар фейк хабарлар ҳамда сунъий интеллект маҳсулотлари кўпайган ҳозирги даврда жуда аҳамиятли эканини билдирди.
Ўзбекистон Миллий ахборот агентлиги муҳаррири Ўткир Алимов форумнинг Мустақилликнинг 35 йиллиги остонасида ўтказилаётганига эътибор қаратган. У 50 мамлакатдан 300 га яқин ОАВ вакилларининг Тошкентда жамлангани Ўзбекистоннинг цивилизациялар чорраҳаси сифатидаги ўрни ортиб бораётганидан далолат беришини таъкидлади.
Мақолада Тошкентдаги халқаро медиафорум журналистика масъулияти, тарихий тадқиқотлар чуқурлиги ва замонавий технологиялар имкониятларини бирлаштирган ҳолда Ислом цивилизациясини янги, замонавий қиёфада дунёга танитишга хизмат қилиши баён этилган.
Ўзбекистон мусулмонлари идораси Матбуот хизмати
