Мир Араб талабалари ўртасидаги Қуръон мусобақаси ғолиблари аниқланди
Шу йил 4 май куни Мир Араб ўрта-махсус ислом таълим муассасасида талабаларнинг Қуръони каримга бўлган муҳаббатини ошириш ва ҳофизи каломларни қўллаб-қувватлаш мақсадида анъанавий Қуръон мусобақасининг якуний босқичи бўлиб ўтди.
«Имом Осим ибн Абу Нажуд издошлари – Қуръони Карим ошиқларидир» шиори остида ташкил этилган ушбу тадбир юқори савияда ўтказилди.
Мусобақа иштирокчилари икки йўналиш — Қуръони каримни тўлиқ ёд олганлар ҳамда 29-30-жузларни мукаммал ўзлаштирганлар бўйича ўз маҳоратларини намойиш этди. Талабаларнинг қироат ва тажвид маҳоратини тажрибали устозлар Диёрбек Аҳмедов ва Анвар Каримовлар баҳолаб борди.
Тадбирда Мир Араб ўрта-махсус ислом таълим муассасаси мудири Жалолиддин Сабуров, олий мадраса катта устози Исмоилжон Ҳамроқулов ва бошқа соҳа вакиллари иштирок этиб, қориларнинг илм йўлидаги зафарларига хайрли дуолар қилди.
Қизғин кечган мусобақа натижасига кўра, тўлиқ ҳифз йўналишида олий мадраса талабаси Ислом Илҳомов ҳамда ўрта-махсус таълим муассасаси талабаси Муҳаммад Аброрхон Юнусхонов биринчи ўринни қўлга киритди. 29-30-поралар бўйича Жавлонбек Турдиқулов энг юқори натижани қайд этди.
Мусобақа якунида ғолибларга қимматбаҳо совға ва пул мукофотлари топширилди.
Шунингдек, тадбир доирасида Қуръони каримни илк бор тўлиқ ёдлаб тугатган 20 нафарга яқин талаба алоҳида эътироф этилиб, тақдирланди.
Бу каби мусобақалар келажакда юртимиздан етук уламолар ва қорилар етишиб чиқишига хизмат қилади.
Ўзбекистон мусулмонлари идораси
Матбуот хизмати
"Имом Бухорий" ордени — юксак эҳтиром рамзи!
Куни кеча мамлакатимиз мустақиллигининг 35 йиллиги муносабати билан муҳтарам Президентимиз томонидан юксак давлат мукофотларига сазовор бўлган бир гуруҳ ватандошларимиз тақдирланди.
Энг қувончлиси шуки, тадбирда диний-маърифий соҳада фидокорона хизмат қилиб келаётган, халқимизнинг маънавий юксалишига беқиёс ҳисса қўшаётган таниқли уламоларимиз ва фахрийларимизнинг заҳматли меҳнатлари юксак даражада эътироф этилди!
Хусусан, Диний идора тизимида узоқ йиллардан бери самарали хизмат қилиб келаётган устозлардан Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, Ўзбекистон мусулмонлари идораси Фахрийлар кенгаши раиси Шайх Абдулазиз Мансур, Самарқанд вилояти Пайариқ тумани "Имом ал-Бухорий" жоме масжиди фахрий имоми Маҳмуджон домла Ибодуллаев, Бухоро вилояти Когон тумани "Баҳоуддин Нақшбанд" жоме масжиди имом-хатиби Абдуғофур домла Раззоқов "Имом Бухорий" орденини Давлатимиз Раҳбаридан қабул қилиб олишди.
Устозларнинг илмий-маърифий фаолияти, халқ ичида маърифат улашишдаги фидойиликлари давлатимиз томонидан юксак қадрлангани бутун диний-маърифий соҳада меҳнат қилаётганлар учун катта фахр ва шарафдир.
Ушбу воқеа Янги Ўзбекистонда диний-маърифий соҳага, миллий қадриятларимизни авайлаб-асраш ҳамда ривожлантиришга қаратилаётган изчил ва хайрли сиёсатнинг амалий ифодасидир.
Халқимизда қадимдан маърифат аҳлини улуғлаш, уларнинг заҳматли меҳнатини қадрлаш эзгу анъана саналади. Ислом таълимотида ҳам илм эгаларига алоҳида мақом ва ҳурмат билан қаралади. Зеро, Имом Термизий бобомиз ривоят қилган ҳадиси шарифда: «Уламолар пайғамбарларнинг меросхўрларидир», дейилган.
Уламоларга кўрсатилаётган бундай эътиборнинг нечоғли хайрли экани қуйидаги ҳикматда ҳам ўз ифодасини топган. Улуғ зотлардан бири Товус раҳматуллоҳи алайҳ отасидан қуйидагича ривоят қилган: «Тўрт кишини ҳурмат қилиш суннатдир: олим, ёши улуғ инсон, подшоҳ ва ота» (Имом Абдураззоқ ривояти).
Мазкур юксак мукофот миллий ва диний қадриятларимизни тиклаш, Ислом маърифатини кенг тарғиб этиш, жамиятда бағрикенглик ва тинчлик-омонликни бардавом сақлаш йўлидаги кўп йиллик хайрли хизматларнинг муносиб эътирофидир.
Давлатимизнинг бундай эътибори диний соҳа ходимларига янада улкан масъулият юклайди, маънавий юксалиш йўлидаги хайрли хизматлар кўламини янада кенгайтиришга хизмат қилади, инша Аллоҳ.
Ўзбекистон мусулмонлари идораси Матбуот хизмати
- «
- »