Бугунги имкониятларнинг қиёси йўқ
Менга мустақилликнинг дастлабки йилларида ҳам ҳаж сафарига келиш насиб этган эди. Ўша пайтлардаги шароит билан бугунги имкониятларни солиштирсам, ростдан ҳам ер билан осмонча фарқ бор. У вақтларда хизмат кўрсатиш, жойлашиш ва ташкилий ишлар анча қийин кечарди.
Бугун эса ҳожилар учун барча қулайликлар яратилган, кексаларга алоҳида ғамхўрлик кўрсатилмоқда. Ҳожиларга эътибор юқори даражага чиқибди. Буни юртимиз аэропортидаёқ ҳис қилдим. Хизмат кўрсатиш жуда тартибли, сифатли ташкил этилибди. Бугунги имкониятларнинг қиёси йўқ!
Кўзимда ёш билан Мадинаи мунавварага, Пайғамбаримиз алайҳиссалом масжидларига кириб бордим. Маккаи мукаррамада ҳам ибодатларимизни кўнглимиз тўқ, хотиржам адо этяпмиз.
Биз кексаларнинг тилларимизда фақат дуо: илоҳим, юртимизда мана шундай кенг имконият ва юксак эътиборни таъминлаб бераётган муҳтарам Президентимиз соғ-саломат бўлсинлар, эл-юрт тинчлиги ва халқимиз фаровонлиги йўлидаги ишларида Аллоҳ ёр бўлсин».
Нўмонжон ШОКИРОВ,
Тошкент шаҳри
“Azzaman” газетаси: Янги Ўзбекистонда кенг қамровли ислоҳотлар амалга оширилмоқда
Ироқнинг “Azzaman” газетасида “Ўзбекистон мустақиллигининг ўттиз беш йиллиги: Давлат барпо этишдан Учинчи Ренессанс сари” номли мақола эълон қилинди, деб хабар бермоқда “Дунё” АА.
Мақолада таъкидланишича, Ўзбекистоннинг мустақиллик йилларида босиб ўтган тараққиёт йўли, амалга оширилган кенг кўламли ислоҳотлар ҳамда мамлакатнинг халқаро майдондаги нуфузи тобора юксалиб бормоқда.
1991 йилда қўлга киритилган мустақиллик Ўзбекистон халқи ҳаётида тарихий бурилиш ясаб, миллий давлатчилик асосларини шакллантириш, иқтисодий тараққиёт пойдеворини яратиш ва ижтимоий барқарорликни таъминлаш жараёнини бошлаб берди.
2016 йилдан бошлаб Президент Шавкат Мирзиёев раҳбарлигида мамлакатда “Янги Ўзбекистон” тамойили асосида кенг қамровли ислоҳотлар амалга оширилмоқда. Ушбу жараёнда Ўзбекистон Марказий Осиёда изчил ва мувозанатли ривожланиш йўлидан бораётган давлат сифатида эътироф этилмоқда.
Муаллиф Ўзбекистонда сўнгги йилларда иқтисодиётни либераллаштириш, инвестицияларни жалб этиш, савдо-иқтисодий алоқаларни кенгайтириш, инфратузилмани модернизация қилиш, рақамлаштириш ва тадбиркорлик муҳитини яхшилаш борасида амалга оширилган чора-тадбирларга эътибор қаратган.
Мақолада аҳолини ижтимоий ҳимоя қилиш тизимини такомиллаштириш, таълим ва соғлиқни сақлаш хизматлари сифатини ошириш, ёшлар ҳамда хотин-қизларнинг жамиятдаги фаоллигини кучайтиришга қаратилган ислоҳотлар ҳақида ҳам алоҳида фикр юритилган.
Нашрда Президент Шавкат Мирзиёев томонидан илгари сурилган “Учинчи Ренессанс” ғояси Ўзбекистон тараққиётининг муҳим стратегик йўналишларидан бири сифатида баҳоланган. Унда Хоразмий, Беруний, Ибн Сино, Имом Бухорий ва Имом Термизий каби буюк алломалар етишиб чиққан юрт бугунги кунда илм-фан, инновация, технология ва инсон капиталини ривожлантириш орқали янги уйғониш даврини яратишга интилаётгани қайд этилган.
Ироқ матбуоти Ўзбекистоннинг ислом цивилизацияси тарихидаги ўрнига ҳам тўхталиб, мамлакатда бой илмий-маърифий меросни ўрганиш ва тарғиб қилишга қаратилган лойиҳалар амалга оширилаётганини таъкидлаган. Жумладан, Тошкент шаҳрида бунёд этилган Ислом цивилизацияси маркази Мовароуннаҳр алломаларининг жаҳон тамаддунига қўшган улкан ҳиссасини намойиш этувчи муҳим илмий-маданий маскан сифатида қайд этилган.
Ўзбекистон мусулмонлари идораси Матбуот хизмати