Малака ошираётган имомлар учун махсус ўқувлар ташкил этилди
Бугун, 8 май куни Дин ишлари бўйича қўмита ҳузуридаги Диний-маърифий соҳада малака ошириш ва қайта тайёрлаш институтида таҳсил олаётган бош имом ва имом-хатиблар учун Ўзбекистондаги Ислом цивилизацияси марказида махсус ўқув машғулотлари ташкил этилди.
Диний-маърифий соҳада малака ошириш ва қайта тайёрлаш институти ҳамда Ўзбекистондаги Ислом цивилизацияси маркази ҳамкорлигида ўтказилган мазкур машғулотлар Ўзбекистон Республикаси Президенти томонидан Марказнинг очилиш маросимида белгилаб берилган устувор вазифалар ижросини таъминлашга қаратилгани билан ҳам эътиборлидир. Зеро, Давлатимиз Раҳбари ўз нутқида: "Бу даргоҳда ислом меросини чуқур ўрганиш, диний ходимлар ва имом-хатибларнинг малакасини ошириш, халқаро ҳамкорликни ривожлантириш ишларини ташкил этиш, ўйлайманки, мақсадга мувофиқдир", — дея таъкидлаган эди.
Ўқув жараёнлари Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, Дин ишлари бўйича қўмита раисининг биринчи ўринбосари Давронбек Мақсудов, Имом Бухорий номидаги Тошкент ислом институти ректори Уйғун Ғафуров ҳамда бошқа профессор-ўқитувчилар томонидан олиб борилди.
Машғулотлар давомида тингловчилар "Давлат ва дин муносабатлари", "Ижтимоий тармоқлар ва оммавий ахборот воситаларида ахлоқий меъёрлар", "Фиқҳ илмининг методологик асослари ва замонавий ёндашувлар" каби мавзулар асосида ўз билим ва малакаларини оширдилар.
Мазкур ўқувлар диний-маърифий соҳада фаолият олиб бораётган мутахассисларнинг замонавий билим ва кўникмаларини мустаҳкамлаш, жамиятда маърифат ва бағрикенглик муҳитини янада ривожлантиришга хизмат қилмоқда.
Ўзбекистон мусулмонлари идораси
Матбуот хизмати
Маънавий-маърифий соҳа фидойилари тақдирланди
Ватанимиз мустақиллигининг 35 йиллиги муносабати билан Сурхондарё вилояти Қумқўрғон туманида диний-маърифий соҳада самарали фаолият юритаётган, жамиятда соғлом маънавий муҳитни мустаҳкамлаш ва ёшларни ёт ғоялардан асраш йўлида фидокорона меҳнат қилаётган бир гуруҳ соҳа ходимлари тақдирланди.
Тадбирда Қумқўрғон тумани ҳокимининг биринчи ўринбосари З.Эшқобилов иштирок этиб, йиғилганларни қутлуғ байрам билан самимий муборакбод этди ҳамда уларнинг эл-юрт осойишталиги ва маънавий-маърифий ишлар самарадорлигини оширишдаги хизматларини юқори баҳолади.
Маросимда фидойи соҳа ходимларига туман ҳокимлигининг ташаккурномалари ва байрам эсдалик совғалари тантанали равишда топширилди.
Ўзбекистон мусулмонлари идораси
Матбуот хизмати
