Ўқитувчи ва талабалар Қаффол Шоший мақбарасини зиёрат қилдилар
Мамлакатимизда ҳар йили “9 май – Хотира ва қадрлаш куни” сифатида кенг нишонланади. Шу муносабат билан Имом Бухорий номидаги Тошкент ислом институтида “Инсон қадри улуғ, хотира муқаддас” шиори остида ҳафталик тадбирлар ташкил этиш режалаштирилган.
Мазкур ҳафталик тадбирлар режаси доирасида Тошкент ислом институти раҳбарияти, профессор-ўқитувчи ва талабалари Ҳазрати Имом мажмуасидаги Қаффол Шоший мақбарасини зиёрат қилдилар.
Қаффол Шоший мақбарасида муҳаддис ва тилшунос Абу Бакр Муҳаммад ибн Али аш-Шоший (904-976), Ўрта Осиё ва Қозоғистон диний назорати биринчи муфтийси Эшон Бобохон ибн Абдулмажидхон (1858-1957), собиқ муфтий, Тошкент ислом институти таъсисчиларидан бири Зиёвуддинхон ибн Эшон Бобохон (1908-1982), Саидаҳрорхон Махдум ибн Абдуллоҳ Махдум (1876-1922), Баҳодирхон Махдум ибн Имом Муҳаммадхон Эшон (1848-1909), Имом Муҳаммадхон Эшон ибн Юнусхўжа Эшон (ваф. 1882) каби уламоларнинг қабри мавжуд.
Институт ректори Уйғун Ғафуров “Қаффоли Шоший” мақбараси, унда ётган Абу Бакр Шоший, Ўрта Осиё ва Қозоғистон мусулмонлари идорасининг биринчи муфтийси Эшон Бобохон ибн Абдулмажидхон ва муфтий Зиёвуддин ибн Эшон Бобохон, устозлари Баҳодирхон Махдум тўғрисида қимматли илмий маълумотларни гапириб берди.
Ўтганлар руҳларини шод этиш учун Қуръони карим оятлари тиловат қилиниб, институт талабалари томонидан тайёрланган Хатми Қуръон савоблари мазкур мақбарада дафн қилинган уламолар руҳониятига бағишланди ҳамда уларнинг ҳақларига кўплаб дуои хайрлар қилинди. Зеро, ўтган аждодларимизни хотирлаш ва уларнинг солиҳ амалларини эсга олиш буюк анъаналармиз ва қадриятларимиздан ҳисобланади.
Пайғамбар саллаллоҳу алайҳи ва саллам бу борада шундай марҳамат қилганлар: “Дунёдан ўтиб кетларингизни яхшиликлари билан эсга олингизлар”.
@oliymahad – диний-маърифий канал!
“Em Insight”: Тошкентдаги халқаро медиафорум ислом цивилизациясининг замонавий қиёфасини намоён этди
Британиянинг “Em Insight” журналида Ўзбекистонда бўлиб ўтган “Ислом цивилизацияси: янги нигоҳ, янги кашфиётлар” мавзусидаги халқаро медиафорумга бағишланган мақола эълон қилинди, деб хабар бермоқда “Дунё” АА.
Нашрда ёзилишича, Ўзбекистон Ислом цивилизацияси маркази томонидан ташкил этилган “Ислом цивилизацияси: янги нигоҳ, янги кашфиётлар” халқаро медиафоруми хорижлик ОАВда катта қизиқиш уйғотган.
Рақамли платформалар, сунъий интеллект ва ахборот хуружлари авж олган ҳозирги замонда оммавий ахборот воситаларининг мамлакатлар, маданиятлар ва цивилизациялар ҳақидаги тасаввурларни шакллантиришдаги ўрни тобора ортиб бормоқда.
Мақолада таъкидланишича, Ал-Хоразмий, Ибн Сино, Беруний, Имом Бухорий, Имом Термизий ва Мирзо Улуғбек каби жаҳон илм-фани ривожига беқиёс ҳисса қўшган буюк мутафаккирлар юрти бўлмиш Ўзбекистон бу каби глобал муҳокамалар учун энг мақбул майдондир.
Қатарнинг “The Peninsula” газетаси масъул муҳаррири Муҳаммад Осмон форумнинг рақамли ахборот асридаги аҳамиятига тўхталиб, Имом Бухорийнинг ҳадисларни тўплаш ва уларнинг ҳаққонийлигини текширишдаги қатъий ёндашувини тилга олди.
У ушбу методологияни манбаларни чуқур ўрганиш ва верификация қилишнинг ўчмас намунаси деб атади ва бу тамойиллар фейк хабарлар ҳамда сунъий интеллект маҳсулотлари кўпайган ҳозирги даврда жуда аҳамиятли эканини билдирди.
Ўзбекистон Миллий ахборот агентлиги муҳаррири Ўткир Алимов форумнинг Мустақилликнинг 35 йиллиги остонасида ўтказилаётганига эътибор қаратган. У 50 мамлакатдан 300 га яқин ОАВ вакилларининг Тошкентда жамлангани Ўзбекистоннинг цивилизациялар чорраҳаси сифатидаги ўрни ортиб бораётганидан далолат беришини таъкидлади.
Мақолада Тошкентдаги халқаро медиафорум журналистика масъулияти, тарихий тадқиқотлар чуқурлиги ва замонавий технологиялар имкониятларини бирлаштирган ҳолда Ислом цивилизациясини янги, замонавий қиёфада дунёга танитишга хизмат қилиши баён этилган.
Ўзбекистон мусулмонлари идораси Матбуот хизмати