Қашқадарёлик шифокорга Президент совғаси топширилди
Президентимиз ташаббуси билан жорий йилда 100 нафар юртдошларимизга 2026-йилги Ҳаж сафарига бепул йўлланмалар тақдим этилмоқда. Хусусан, улар орасида муборак сафар бахтига муяссар бўлган 3 нафар қашқадарёликлар ҳам бор.
Жумладан, Раъно Элмурадова ҳам эндиликда Президентимизнинг ана шундай юксак ташаббуси туфайли “Президент ҳожиси” сифатида Ҳаж амалларини адо этадиган бўлди. У киши кўп йиллар давомида соғлиқни сақлаш соҳасида меҳнат қилиб, инсонлар дардига дармон бўлишдек фидокорона, ҳам машаққатли ҳам шарафли касби ортидан бугун юксак эътирофга сазовор бўлганлар қаторидан жой олди.
Шу муносабат билан Ҳаж йўлланмасини топшириш маросимида вилоят ҳокими Муротжон Азимов, Ўзбекистон мусулмонлари идорасининг Қашқадарё вилоятидаги вакили - вилоят бош имом-хатиби ва бошқа масъул раҳбарлар иштирок этди.
Тадбирда “Президент ҳожилари” ташаббуси, аввало, Давлатимиз Раҳбарининг халқимизга бўлган меҳр-эътибори, нуронийлар ва кўмакка муҳтож инсонларни қўллаб-қувватлаш борасидаги юксак инсоний ёндашувининг ёрқин намунаси эканлиги алоҳида таъкидланиб, юртимиз тинчлиги, халқимиз фаровонлиги ҳамда ватанимиз равнақи учун хайрли дуолар қилинди.
Nasafziyo.uz
Академия ректори «Дўстлик», Ислом цивилизацияси маркази директори «Фидокорона хизматлари учун», академия профессори «Имом Бухорий» орденлари ва «Зиё» медиа маркази раҳбари «Шуҳрат» медали билан тақдирландилар
Ўзбекистон Республикаси Президентининг фармонига мувофиқ, Ўзбекистон Республикаси давлат мустақиллигининг ўттиз беш йиллиги муносабати билан турли соҳалар вакиллари фахрий унвонлар, орденлар ва медаллар билан мукофотландилар.
Хусусан, Ўзбекистон Республикаси Президентининг диний-маърифий масалалар бўйича маслаҳатчиси, Ўзбекистон халқаро исломшунослик академияси ректори Камилов Музаффар Муратович "Дўстлик" ордени билан, Ўзбекистондаги Ислом цивилизацияси маркази директори Абдухаликов Фирдавс Фридунович «Фидокорона хизматлари учун» ордени билан, мазкур академиянинг "Араб тили ва адабиёти ал-Азҳар" кафедраси профессори Исломов Зоҳиджон Маҳмудович «Имом Бухорий» ордени билан ва академия ҳузуридаги "Зиё" медиа маркази директори Мухтаров Абдухамид Абдуахатович "Шуҳрат" медали билан тақдирландилар.
Ўзбекистон мусулмонлари идораси жамоаси доимий ҳамкор ташкилотларимиз раҳбарлари ва устозларни мазкур юксак мукофотлар билан муборакбод этиб, Аллоҳ таолодан мамлакатимиз тараққиёти, халқимиз фаровонлиги ва муборак динимиз ривожи йўлидаги фаолиятларида янгидан-янги муваффақиятлар тилаймиз.
Ўзбекистон мусулмонлари идораси Матбуот хизмати