Саждада аёл оёқларининг ҳолати қандай бўлиши керак?
Савол: Аёллар намозда сажда қилганида оёқ бармоқлари учи қиблага қараб туриши керакми ёки йўқми?
Жавоб: Бисмиллаҳир Роҳманир Роҳийм. Фақиҳларимиз намоз ўқишда аёл ва эркак ҳолатларининг фарқли жиҳатларини баён қилиб берганлар. Масалан, аёллар намозни эркаклар каби овоз чиқариб ўқимайди, рукуда ҳам эркаклардек белини тўлиқ букмайди ва тиззаларини тик тутмайди ва ҳоказо.
Саволда сўралган саждадаги ҳолатга келсак, эркаклар оёқларини тик қилиб, бармоқларини қиблага қаратиб турадилар. Аёллар эса, оёқларини тик қилмайдилар, балки оёқ бармоқларининг уст томонини ерга қўйиб, сажда қиладилар. Валлоҳу аълам.
Ўзбекистон мусулмонлари идораси
Фатво маркази.
Бугунги эътибор – эртанги натижа
Истиқлолимизнинг 35 йиллик байрами арафасида Фарғона вилояти бош имом-хатиби Убайдуллоҳ домла Абдуллаев иштирокида Қувасой шаҳрида хайрия тадбир ўтказилди. Унда 33 та хонадонга озиқ-овқат маҳсулотлари, 43 нафар болажонга эса ўқув қуроллари ва кийим-кечаклар ҳадя қилинди.
Тадбирда фарзандлар учун муносиб шароит яратиш эзгуликнинг энг гўзал кўринишларидан бири экани, бугун ёш авлоднинг билими ва камоли учун қилинган ҳар бир хайрли амал эртанги кун тараққиётига муҳим ҳисса бўлиб қўшилиши таъкидланди.
Бундай тадбирлар, шунингдек, Бувайда туманидаги «Катта маҳалла» масжиди жамоаси томонидан ҳам ташкил этилди. Унда ижтимоий кўмакка муҳтож ҳамда боқувчисини йўқотган оилалар фарзандларидан 70 нафарига мактабда таълим олиши учун зарур бўлган ўқув қуроллари тарқатилди. Болажонлар мустақиллик байрами ҳамда бошланажак янги ўқув йили билан муборакбод этилди.
Илм ва ёшларни қўллаб-қувватлашга қаратилган бундай эзгу ташаббуслар Фарғона шаҳридаги "Хўжамбердибой", Сўх туманидаги "Султон Маҳмуд" масжиди жамоаси томонидан ҳам ташкил этилмоқда.
ЎМИ Фарғона вилояти вакиллиги Матбуот хизмати
