Ўзбекистонлик ҳожилар 2-19 июнь кунлари юртимизга қайтади
Бугун, 2 июнь куни "Ҳаж – 2026" мавсумининг илк зиёратчиларини олиб келадиган дастлабки самолётлар Жидда-Тошкент йўналиши бўйича Ислом Каримов номидаги Тошкент халқаро аэропортига қўнади.
Ушбу дастлабки авиарейслар орқали Тошкент шаҳри зиёратчилари юртимизга қайтиб келишади. Шунингдек, ҳожиларимиз республикамизнинг 10 та ҳудудидаги халқаро аэропортларда тантанали равишда кутиб олиш режа қилинган.
Маълумот ўрнида, ҳаж сафарини якунлаган юртдошларимизни Жидда шаҳридан олиб келиш ишлари жорий йилнинг 19 июнь кунига қадар изчил давом эттирилади.
Аллоҳ таоло юртдошларимизнинг ҳаж ибодатларини мабрур айлаб, ўз уйларига эсон-омон етиб келишларини насиб қилсин!
Ўзбекистон мусулмонлари идораси
Матбуот хизмати
Президент 35 йиллик мустақиллик арафасида 852 нафар маҳкумни афв этди
Президент Шавкат Мирзиёев Ўзбекистон мустақиллигининг 35 йиллиги муносабати билан 852 нафар жазо ўтаётган шахсни афв этиш тўғрисидаги фармонни имзолади. Афв этилганлар орасида 7 нафар хориж фуқароси, 375 нафар ёшлар, 49 нафар аёл ва 60 ёшдан ошган 37 нафар эркак бор, хабар бермоқда Batafsil.uz.
Афв этилган 852 нафар шахсдан 604 нафари жазони тўлиқ ўташдан озод қилинади. Яна 115 нафар шахс жазони ўташдан муддатидан илгари шартли равишда озод этилади.
52 нафар маҳкумга тайинланган жазо енгилроқ жазо турига алмаштирилади. 81 нафар шахснинг озодликдан маҳрум қилиш жазоси муддати эса қисқартирилади.
Афв этилганлар орасида тақиқланган ташкилотлар фаолиятида иштирок этган 63 нафар шахс ҳам бор.
Президент фармонида афв этишга асос сифатида маҳкумларнинг қилмишига пушаймонлиги ва тузалиш йўлига қатъий ўтгани кўрсатилган.
"Ўзбекистон 24" телеканали маълумотига кўра, Шавкат Мирзиёев 2017 йилдан буён 31 та афв этиш тўғрисидаги ҳужжатни имзолаган. Ушбу ҳужжатлар жами 10 567 нафар жазо ўтаётган шахсни қамраб олган.
Хусусан, Президент Наврўз ва Рамазон ҳайити арафасида ҳам 392 нафар маҳкумни афв этганди.
Ўзбекистон мусулмонлари идораси Матбуот хизмати