Икки диний муассаса меморандум имзолади
Баҳоуддин Нақшбанд илмий-тадқиқот маркази ҳамда “Хадичаи Кубро” аёл-қизлар ўрта махсус ислом таълим муассасаси ўртасида ўзаро илмий-маърифий ҳамкорликни ривожлантиришга қаратилган меморандум имзоланди.
Мазкур ҳужжат юртимизда исломшунослик, ҳадисшунослик ва манбашунослик соҳаларидаги тадқиқотларни қўллаб-қувватлаш, бой миллий-маънавий меросимизни чуқур ўрганиш ҳамда ёш авлодни миллий қадриятлар ва бағрикенглик руҳида тарбиялаш мақсадида тузилди.
Ҳамкорлик доирасида биргаликда илмий-амалий конференциялар, семинарлар ва давра суҳбатлари ташкил этиш, тарихий манбалар ва қўлёзмаларни ўрганиб, уларни илмий тавсифлаш ҳамда кенг тарғиб қилиш режалаштирилмоқда. Шунингдек, тадқиқотчилар ва талабалар учун ўзаро тажриба алмашиш имкониятларини кенгайтириш, қўшма илмий лойиҳаларни амага ошириш орқали миллий меросимизни халқаро миқиёсда кенг намойиш этишга алоҳида эътибор қаратилади.
Ушбу келишув илм-фан ва маърифат йўлидаги изчил ҳамкорликни янада мустаҳкамлаш, бой илмий-маънавий хазинамизни асраб-авайлаш ҳамда уни халқимизга тизимли етказиш борасида муҳим қадам бўлиб хизмат қилади.
Ўзбекистон мусулмонлари идораси
Матбуот хизмати
“Azzaman” газетаси: Янги Ўзбекистонда кенг қамровли ислоҳотлар амалга оширилмоқда
Ироқнинг “Azzaman” газетасида “Ўзбекистон мустақиллигининг ўттиз беш йиллиги: Давлат барпо этишдан Учинчи Ренессанс сари” номли мақола эълон қилинди, деб хабар бермоқда “Дунё” АА.
Мақолада таъкидланишича, Ўзбекистоннинг мустақиллик йилларида босиб ўтган тараққиёт йўли, амалга оширилган кенг кўламли ислоҳотлар ҳамда мамлакатнинг халқаро майдондаги нуфузи тобора юксалиб бормоқда.
1991 йилда қўлга киритилган мустақиллик Ўзбекистон халқи ҳаётида тарихий бурилиш ясаб, миллий давлатчилик асосларини шакллантириш, иқтисодий тараққиёт пойдеворини яратиш ва ижтимоий барқарорликни таъминлаш жараёнини бошлаб берди.
2016 йилдан бошлаб Президент Шавкат Мирзиёев раҳбарлигида мамлакатда “Янги Ўзбекистон” тамойили асосида кенг қамровли ислоҳотлар амалга оширилмоқда. Ушбу жараёнда Ўзбекистон Марказий Осиёда изчил ва мувозанатли ривожланиш йўлидан бораётган давлат сифатида эътироф этилмоқда.
Муаллиф Ўзбекистонда сўнгги йилларда иқтисодиётни либераллаштириш, инвестицияларни жалб этиш, савдо-иқтисодий алоқаларни кенгайтириш, инфратузилмани модернизация қилиш, рақамлаштириш ва тадбиркорлик муҳитини яхшилаш борасида амалга оширилган чора-тадбирларга эътибор қаратган.
Мақолада аҳолини ижтимоий ҳимоя қилиш тизимини такомиллаштириш, таълим ва соғлиқни сақлаш хизматлари сифатини ошириш, ёшлар ҳамда хотин-қизларнинг жамиятдаги фаоллигини кучайтиришга қаратилган ислоҳотлар ҳақида ҳам алоҳида фикр юритилган.
Нашрда Президент Шавкат Мирзиёев томонидан илгари сурилган “Учинчи Ренессанс” ғояси Ўзбекистон тараққиётининг муҳим стратегик йўналишларидан бири сифатида баҳоланган. Унда Хоразмий, Беруний, Ибн Сино, Имом Бухорий ва Имом Термизий каби буюк алломалар етишиб чиққан юрт бугунги кунда илм-фан, инновация, технология ва инсон капиталини ривожлантириш орқали янги уйғониш даврини яратишга интилаётгани қайд этилган.
Ироқ матбуоти Ўзбекистоннинг ислом цивилизацияси тарихидаги ўрнига ҳам тўхталиб, мамлакатда бой илмий-маърифий меросни ўрганиш ва тарғиб қилишга қаратилган лойиҳалар амалга оширилаётганини таъкидлаган. Жумладан, Тошкент шаҳрида бунёд этилган Ислом цивилизацияси маркази Мовароуннаҳр алломаларининг жаҳон тамаддунига қўшган улкан ҳиссасини намойиш этувчи муҳим илмий-маданий маскан сифатида қайд этилган.
Ўзбекистон мусулмонлари идораси Матбуот хизмати