МАЪРИФИЙ СУҲБАТЛАР ҲОЖИЛАРГА ДАСТУРИЛАМАЛ БЎЛМОҚДА
Ҳаж амалларини ниҳоясига етказиб, бирин-кетин она Ватанга қайтиш тадоригини кўраётган Макка шаҳридаги юртдошларимиз учун Ўзбекистон мусулмонлари идораси уламолари, Хотин-қизлар билан ишлаш бўлими мутахассислари, таниқли имом-хатиблар ва элликбошилар томонидан ҳар куни маърифий суҳбатлар ташкил этилмоқда.
Ушбу учрашувларда зиёратчиларга ҳожиликнинг мазмун-моҳияти, ушбу улуғ мақомнинг фазилатлари ҳамда ҳожининг одоб-ахлоқи ҳақида атрофлича тушунчалар берилмоқда. Айниқса, ҳаждан кейин шарафли мақомга муносиб ҳаёт кечириш, тақво, ҳалоллик ва эзгу амалларни кундалик ҳаёт мезонига айлантириш масалаларига алоҳида эътибор қаратиляпти. Шунингдек, халқимиз орасида учраб турадиган айрим ноўрин урф-одатлар, хусусан, ортиқча исрофгарчиликка олиб келувчи «ҳожи тўйи» каби маросимлардан сақланиш лозимлиги, ҳажнинг асл руҳи камтарлик, шукроналик ва хайр-саховат эканлиги таъкидланмоқда.
Шу билан бирга, ҳожиларнинг жамиятда эзгулик ва маърифат тарғиботчилари бўлишлари, маҳаллаларда аҳиллик ва тотувликни мустаҳкамлаш, ёшлар таълим-тарбиясига ҳисса қўшиш, соғлом маънавий муҳитни қарор топтириш ва юрт тараққиётига хизмат қилиш каби муҳим вазифалари хусусида ҳам зарур тавсиялар бериб ўтиляпти.
Маърифий суҳбатлар якунида Қуръони карим хатмлари бахшида қилиниб, юртимиз тинчлиги, Ватанимиз равнақи, халқимиз фаровонлиги ҳамда Давлатимиз Раҳбари ҳаққига хайрли дуолар қилинмоқда.
Ўзбекистон мусулмонлари идораси
Матбуот хизмат
Бугунги эътибор – эртанги натижа
Истиқлолимизнинг 35 йиллик байрами арафасида Фарғона вилояти бош имом-хатиби Убайдуллоҳ домла Абдуллаев иштирокида Қувасой шаҳрида хайрия тадбир ўтказилди. Унда 33 та хонадонга озиқ-овқат маҳсулотлари, 43 нафар болажонга эса ўқув қуроллари ва кийим-кечаклар ҳадя қилинди.
Тадбирда фарзандлар учун муносиб шароит яратиш эзгуликнинг энг гўзал кўринишларидан бири экани, бугун ёш авлоднинг билими ва камоли учун қилинган ҳар бир хайрли амал эртанги кун тараққиётига муҳим ҳисса бўлиб қўшилиши таъкидланди.
Бундай тадбирлар, шунингдек, Бувайда туманидаги «Катта маҳалла» масжиди жамоаси томонидан ҳам ташкил этилди. Унда ижтимоий кўмакка муҳтож ҳамда боқувчисини йўқотган оилалар фарзандларидан 70 нафарига мактабда таълим олиши учун зарур бўлган ўқув қуроллари тарқатилди. Болажонлар мустақиллик байрами ҳамда бошланажак янги ўқув йили билан муборакбод этилди.
Илм ва ёшларни қўллаб-қувватлашга қаратилган бундай эзгу ташаббуслар Фарғона шаҳридаги "Хўжамбердибой", Сўх туманидаги "Султон Маҳмуд" масжиди жамоаси томонидан ҳам ташкил этилмоқда.
ЎМИ Фарғона вилояти вакиллиги Матбуот хизмати
