«Асрларни забт этган асар» хатмонаси бўлиб ўтди
Тошкент ислом институтида диний таълимнинг самарали усулларидан бири бўлган «хатмул кутуб» (китобларни тўлиқ ўқиб тугатиш) анъанаси изчил давом этмоқда.
Ана шундай илмий-маърифий тадбирлардан бири – аллома Нуриддин Абдураҳмон Жомийнинг «Асрларни забт этган асар» («Шарҳи Мулло») китоби хатмига бағишланди.
Институт ташаббуси билан Ўзбекистондаги Ислом цивилизацияси маркази кутубхонасида ташкил этилган тадбирда сўзга чиққан уламолар, соҳа мутахассислари устоз ва талабаларнинг илм йўлидаги ғайрати ҳамда сабр-матонатини юқори баҳоладилар.
Араб тили грамматикасига оид ушбу машҳур асар «Тиллар» кафедраси мудири Улуғбек домла Ҳасанов, ўқитувчилар Ёқубжон домла Бухорбаев ва Абдулбосит домла Нуриллаев раҳбарлигида 2-курс талабалари икки йил давомида дарс ва тўгаракларда ўқиб, тўлиқ хатм қилишди.
Тадбир давомида талабалар томонидан тайёрланган саҳна кўриниши намойиш этилди. Шундан сўнг устоз ва шогирдлар иштирокида китобнинг якуний қисми ўқиб тугатилди.
Маросим сўнгида китобни муваффақиятли хатм қилган 55 нафар талабага «Шарҳи Мулло» китоби бўйича ижозат шаҳодатномалари, ташаккурнома ва эсдалик совғалари топширилди.
Ўзбекистон мусулмонлари идораси Матбуот хизмати
Яхшилик улашиб, кўнгиллар шод бўлмоқда
Ватанимиз мустақиллигининг 35 йиллик байрами арафасида Қорақалпоғистон Республикаси бўйича меҳр-оқибат, оқибат ва хайр-саховат марафонлари янгича суръат ва кенг ёйилмоқда. Инсон қадрини улуғлашни бош мақсад қилган ушбу эзгу ташаббуслар юртимиздаги ижтимоий ҳимояга муҳтож оилаларга, ёлғиз ва боқувчисини йўқотган фарзандларимизга меҳр улашишга қаратилган.
"Вақф" хайрия жамоат фонди Қорақалпоғистон бўлими томонидан "Имом эшон Муҳаммад" жоме масжидида ёлғиз ва боқувчисини йўқотган фарзандларимиз учун мактаб формаси ва ўқув қуролларини бериш тадбири ўтказилди.
Кўнгилларга умид, юракларга қувонч таратган тадбирда Қорақалпоғистон Республикаси Вазирлар Кенгаши Раисининг ўринбосари Алишер Алланиязов, Қорақалпоғистон мусулмонлари қозиёти қозиси Баҳрамаддин домла Разов ва "Вақф" хайрия жамоат фонди раиси А.Жоловшиевлар иштирок этиб, 35 болага мактаб формалари ва байрам совғаларини тантанали тарзда топширди.
Бундай ғамхўрлик тадбири фарзандларимизнинг кўзларида қувонч учқунини ёқиб, кўнгилларида чексиз фахр туйғусини уйғотди.
"Инсон қадри улуғланган, меҳр-оқибат устувор бўлган юртда доимо тараққиёт ва барака бўлади."
Қорақалпоғистон мусулмонлари қозиёти
