"Журналистлар кубоги – 2026" турнири бўлиб ўтди
27 июнь – Матбуот ва оммавий ахборот воситалари ходимлари куни муносабати билан соҳа вакиллари ўртасида стол тенниси бўйича анъанавий «Журналистлар кубоги – 2026» спорт мусобақаси ўтказилди.
Мамлакатимизда фаолият юритаётган оммавий ахборот воситалари ходимлари, ижодкорлар ва журналистларни касб байрами билан қутлаш, улар ўртасида соғлом турмуш тарзини тарғиб қилиш ҳамда ҳамжиҳатликни мустаҳкамлаш мақсадида ташкил этилган ушбу турнирда кўплаб соҳа вакиллари иштирок этди.
Турнирнинг очилиш маросимида Ўзбекистон Журналистлар уюшмаси раиси Шуҳрат Ориф, Ўзбекистон Республикаси Президенти Администрацияси Коммуникациялар департаменти раҳбарининг ўринбосари – Президент Халқ қабулхонаси раҳбари Фаррух Омонов ҳамда Ўзбекистон стол тенниси федерацияси раиси Шерзод Қутбиев ва федерация котиби Гавҳархон Муқаддасовалар сўзга чиқиб, иштирокчиларни қутладилар ва бу каби анъанавий мусобақалар ижодкорлар ўртасидаги дўстлик ришталарини янада мустаҳкамлашга хизмат қилишини таъкидладилар.
Қизғин ва дўстона рақобат руҳида кечган баҳсларда иштирокчилар яшил стол атрофида ўз маҳоратларини намойиш этдилар. Якунда ғолиб ва совриндорлар ташкилотчилар томонидан муносиб тақдирланди.
Мусобақа ижодкорларга юқори кайфият бағишлаб, соҳа ходимлари учун чинакам байрам туҳфасига айланди.
Ўзбекистон мусулмонлари идораси
Матбуот хизмати
Сирдарёда имомлар ўртасида “Заковат” турнири ўтказилди
Ўзбекистон Республикаси давлат мустақиллигининг 35 йиллиги муносабати билан Сирдарё вилоятида фаолият юритаётган имом-хатиб ва имом-ноиблар ўртасида “Қуръон тинчликка буюради” шиори остида “Заковат” интеллектуал мусобақаси ўтказилди.
Беллашувдан кўзланган асосий мақсад — диний соҳа ходимларининг илмий-маърифий ва ҳуқуқий билимларини мустаҳкамлаш, улар ўртасида ўзаро ҳамжиҳатликни янада оширишдан иборат.
Мусобақада шаҳар ва туманлардан жамланган жамоалар Қуръони карим, ҳадиси шарифлар, ислом тарихи, миллий қадриятлар ва мамлакатимиз қонунчилигига оид саволлар бўйича ўз билим ва тезкор фикрлаш қобилиятларини намоён этдилар.
Якуний натижаларга кўра:
1-ўрин — “Тафаккур” жамоаси
2-ўрин — “Иттифоқ” жамоаси
3-ўрин — “Ҳикмат” жамоаси
Ғолиблар Ўзбекистон мусулмонлари идораси Сирдарё вилояти вакиллигининг махсус диплом ва эсдалик совғалари билан тақдирланди.
Сирдарё вилояти вакиллиги
Матбуот хизмати