Футбол мухлисларига насиҳат
#maqola #futbol
Қадрли томошабин дўстлар! Бир-бирингизга мулойим бўлинг. Бу копток деган нарса ўтади кетади. Уни деб ўзимизни пасткаш қилишимизга арзимайди. Уни деб атрофдагиларнинг дилини оғритиш керак эмас. Пайғамбаримиз соллаллоҳу алайҳи ва саллам айтганлар: “Ўзаро ҳасад қилманг, ўзаро адоват қилманг, бир-бирингиздан юз ўгириб кетманг. Аллоҳнинг ака-ука бандалари бўлинг”.
Балиқ дарёдан чиқиши билан ўлганидек, футбол ҳам майдондан чиқиши билан тугаши керак. Футболдаги рақобат ўша ерда қолсин. Мусобақа бўлсин, лекин ёмон кўриш бўлмасин. Жўшиб кетинг, аммо адоват қилманг. Футболчиларни руҳлантириб туринг, бироқ ҳақорат қилманг. Кузатинг, лекин таассуб қилманг. Тадбирларга қатнашинг, аммо қўпол бўлманг. Таҳлил қилинг, лекин сўкманг. Мағлубият бўлса азобланманг.
Томошабин жаноблари! Умрингизни кўр мухлислик, ўйинчиларнинг ҳаётий маълумотлари, чемпионатларни қайта-қайта кўриш, хавфли вазиятларни таҳлил қилавериш билан ўтказиб юборманг.
У бугун ва келажагингиздир. Умрингиз охиратингизни ҳал қиладиган сармоянгиздир.
Жамоангиз биринчиликдан голсиз чиқса ичингизни еб битирасизу, аммо бутун бошли ҳаётингиз мақсадсиз, голсиз ўтаётганини эслаб ҳам қўймайсиз.
Муҳим нарсаларни тартиблаб олинг. Ишқибозлик асосий ғамингиз бўлмасин. Бу кетишда севимли гуруҳингиз сизни муваффақиятдан тўсиб қўйиши муқаррар. Жамоангиз сизни чўкишдан қутқариб қола олмайди. Уйғонинг.
Намозларни ҳам тарк этиб, майдонга (экранга) эртачи келиб олманг. Футбол кўраман деб намозларни қазо қилманг. Зиммангиздаги мажбуриятларингизга ўйин деб лоқайд қараманг. Ҳакамлар чиқарган қарорларга аралашерманг. Бировнинг шарафи, шаънини ерга урманг. Футболни деб савобларингизни кулга айлантирманг.
Футбол ортидан алоқаларни узиб, биров билан адоватга борманг. Оилангиз олдидаги вазифаларни ташлаб қўйманг. Футболни деб болаларингизга зарда қилманг, уларга бақирманг. Аввало, ўзингизни ислоҳ қилинг.
Ëсир ибн Бадрнинг “Сиз излаган ечим” китобидан
Ҳадис илми мактаби ўқитувчиси
Абдулбосит Абдулвоҳид ўғли таржимаси
Қарийб 50 мамлакат журналистлари янги Имом Бухорий мажмуаси ва Самарқанднинг асосий ёдгорликларини зиёрат қилади
«Ислом цивилизацияси: янги нигоҳ — янги кашфиётлар» Халқаро медиафоруми иштирокчилари 27 август куни Самарқандга йўл олади. Улар янгидан бунёд этилган Имом Бухорий ёдгорлик мажмуаси, Имом Бухорий халқаро илмий-тадқиқот маркази ҳамда Имом Бухорий номидаги Инновацион музей билан танишади. Куннинг иккинчи ярмида эса иштирокчилар учун шаҳарнинг тарихий-маданий мерос объектлари, жумладан, ЮНЕСКОнинг Жаҳон мероси рўйхатига киритилган ёдгорликлар бўйлаб махсус дастур ташкил этилади, хабар бермоқда iccu.uz.
Ёдгорлик мажмуаси Самарқанд вилояти Пайариқ туманида, буюк муҳаддис ва илоҳиётшунос Муҳаммад ал-Бухорийнинг (810–870) дафн этилган жойида жойлашган. У «Саҳиҳи Бухорий» тўплами муаллифи бўлиб, мазкур асар сунний исломдаги энг мўътабар ҳадис тўпламларидан бири ҳисобланади.
Кенг кўламли реконструкциядан сўнг мажмуа 2026 йил баҳорида зиёратчилар учун қайта очилди. Унинг умумий ҳудуди 45 гектарни ташкил этади. Бу ерда 10 минг кишилик масжид, маъмурий ва хизмат кўрсатиш бинолари, 154 устунли айвон, 14 та мовий гумбаз ва баландлиги 75 метр бўлган тўртта минора барпо этилган. Реконструкциядан сўнг мажмуанинг кунлик қабул қилиш қуввати 12 минг нафардан 65 минг нафаргача ошди.
Мажмуанинг марказий қисмларидан бири — тўққизта павильондан иборат янги Имом Бухорий Инновацион музейидир. Экспозиция алломанинг ҳаёти, ҳадисшунослик тарихи ва унинг илмий меросига бағишланган. Шунингдек, музейда Қуръонда зикр этилган пайғамбарлар, Пайғамбаримиз Муҳаммад соллаллоҳу алайҳи васалламнинг Макка ва Мадинадаги ҳаёти ҳамда ёзма ҳадис тўпламларининг шаклланиш тарихи ҳақида маълумотлар берилган.
Мажмуа яқинида Имом Бухорий халқаро илмий-тадқиқот маркази ҳам фаолият юритади. Марказ ислом илмий ва қўлёзма меросини, жумладан, Марказий Осиёнинг ўрта аср олимлари асарларини ўрганиш, илмий тадқиқотлар ва таржималар тайёрлаш, шунингдек, халқаро илмий алмашинувни ривожлантириш билан шуғулланади.
Мажмуага ташрифдан сўнг форум иштирокчилари тарихий Самарқанд билан танишади. Шаҳарнинг асосий меъморий ёдгорликлари қаторига Регистон, Бибихоним масжиди, Шоҳи Зинда мажмуаси ва Гўри Амир мақбараси киради. ЮНЕСКО ушбу тўрт объектни 2001 йилда «Самарқанд — маданиятлар чорраҳаси» номи билан Жаҳон мероси рўйхатига киритилган тарихий шаҳарнинг асосий ёдгорликлари сифатида эътироф этади.
Самарқанд босқичи 24–28 август кунлари Тошкент ва Самарқанд шаҳарларида бўлиб ўтадиган «Ислом цивилизацияси: янги нигоҳ — янги кашфиётлар» Халқаро медиафоруми дастурининг бир қисми бўлади.
Пресс-служба Управления мусульман Узбекистана
- «
- »