Ўзбекистонда ислом молияси ва вақф истиқболлари муҳокама қилинди
Бугун, 24 июнь куни Ўзбекистон мусулмонлари идорасида “Ислом молияси ва вақф: Ўзбекистонда жорий этиш имкониятлари ва истиқболлари” мавзусида халқаро экспертлар ва давлат ташкилотлари вакиллари иштирокида кенг қамровли танишув семинари бўлиб ўтди.
Тадбирда Дин ишлари буйича қўмита раисининг биринчи ўринбосари Давронбек Мақсудов, Ўзбекистон мусулмонлари идораси раиси ўринбосари, “Вақф” хайрия жамоат фонди раиси Зайниддин домла Эшонқулов, Ислом Тараққиёт банки вакили Ҳусан Ҳасанов ва бошқалар сўзга чиқишди.
Таъкидлаб ўтиш жоизки, сўнгги йилларда мамлакатимизда ислом молиявий инструментларини жорий этиш учун муҳим ҳуқуқий қадамлар қўйилмоқда. Хусусан, микромолия ташкилотлари томонидан исломий усулда хизмат кўрсатишга рухсат берилгани, лизинг (ижара) ва шерикчиликка асосланган молиялаштириш тизими кенгаяётгани юртимизнинг ушбу соҳада катта салоҳиятга эга эканлигини кўрсатмоқда.
Шунингдек, Ислом тараққиёт банки (ИТБ) ва Хусусий секторни ривожлантириш бўйича ислом корпорацияси (ХИКОР) каби халқаро молия институтлари билан ҳамкорликда маҳаллий тижорат банклари орқали тадбиркорликни қўллаб-қувватлашга қаратилган хайрли лойиҳалар муваффақиятли амалга оширилмоқда.
Семинар давомида соҳа экспертлари ислом молиясининг анъанавий банк тизимидан туб фарқлари ва афзалликларини илмий асослар билан кўрсатиб беришди.
Анжуманда қайд этилганидек, бугунги кунда анъанавий кўчмас мулк вақфларидан ташқари, пул вақфлари (cash) ва корпоратив вақфлар дунёда юқори самара бермоқда.
Муҳокамалар давомида Ўзбекистонда вақф тизимининг ҳуқуқий ва иқтисодий моделларини яратиш истиқболлари белгилаб олинди. Мамлакатимизда фаолият юритаётган "Вақф" хайрия жамоат фонди тажрибасини янада кенгайтириш, вақф мулкларини самарали бошқариш орқали толиби илмлар учун таълим грантларини таъсис этиш, ижтимоий тадбиркорликни ривожлантириш ва кам таъминланган оилаларни уй-жой билан таъминлаш бўйича янги стратегиялар ҳақида ҳам сўз борди.
Якунда иштирокчилар томонидан Ўзбекистонда Ислом молияси ва вақф тўғрисидаги қонунчилик асосларини янада такомиллаштириш, соҳа учун малакали кадрлар тайёрлаш тизимини йўлга қўйиш ҳамда аҳолининг молиявий саводхонлигини ошириш юзасидан тавсиялар ишлаб чиқилди.
Ўзбекистон мусулмонлари идораси
Матбуот хизмати
“Сolombo Times”: Ўзбекистонда “Учинчи Ренессанс” ғоясини амалга ошириш давлат сиёсатига айланган
Шри-Ланканинг “Сolombo Times” нашрида “Ўзбекистонда Янги уйғониш даври: келажак технологиялари ёрдамида буюк ўтмишни қайта тиклаш” сарлавҳали таҳлилий мақола эълон қилинди, деб хабар бермоқда “Дунё” АА.
Шри-Ланкалик таниқли журналист Фазан Наваз томонидан ёзилган ушбу материалда сўнгги ўн йилда Ўзбекистонда Президент Шавкат Мирзиёев ташаббуси билан Янги Ўзбекистонни бунёд этиш, “Учинчи Ренессанс” ғоясини амалга оширишга қаратилган ислоҳотлар ва уларнинг самарали натижалари хусусида сўз юритилган.
Муаллифнинг ёзишича, Марказий Осиё марказида сокин, аммо улкан аҳамиятга эга инқилоб юз бермоқда. Бу кураш қурол-яроғ билан эмас, балки қўлёзмалар, музейлар ва микрочиплар ёрдамида амалга оширилмоқда.
Президент Шавкат Мирзиёев раҳбарлигида Ўзбекистон Самарқанд ва Бухоро каби шаҳарлар жаҳон илм-фани, шеърияти ва фалсафасининг етакчи марказлари бўлган Ўрта асрлардаги “Олтин аср” шон-шуҳратини қайта тиклашга интилмоқда.
Бу жараённинг ўзига хос жиҳати шундаки, Ўзбекистон минг йилдан зиёд тарихга эга маданий меросни асраш, қайта тиклаш ва кенг оммага етказиш учун сунъий интеллект ҳамда рақамли технологиялардан фаол фойдаланмоқда.
Нашрда Ўзбекистоннинг бой маданий ва тарихий мероси ҳамда уни сақлаш бўйича ислоҳотларга тўхталиб ўтилган. Қайд этилганидек, бу замин инсоният тарихидаги энг буюк алломаларга бешик бўлган. Астроном ва давлат арбоби Мирзо Улуғбек Самарқандда юлдузларни ҳайратланарли даражада аниқ кузатиш имконини берган расадхона барпо этган. Хоразмдаги Маъмун академияси олимлари эса Европада Ренессанс бошланишидан анча аввал математика ва тиббиёт соҳаларида юксак ютуқларга эришган эди.
Ўзбекистон етакчиси бу тарихий меросни тез-тез тилга олиб, Мирзо Улуғбекни нафақат буюк олим, балки илм-фанни энг юксак қадрият деб билган давлат арбоби сифатида таърифлайди. Давлат раҳбари бугунги янгиланиш жараёнини “Учинчи Ренессанс” деб атаб, уни Ўзбекистоннинг илму маърифат ва маданият маркази сифатидаги мавқеини қайта тиклашга қаратилган умуммиллий лойиҳа сифатида баҳолайди. Тарихчилар таъбири билан айтганда – бу атама минтақада аввал мавжуд бўлган икки буюк юксалиш давридан кейинги навбатдаги уйғониш босқичини англатади.
Муаллифнинг фикрича, Ўзбекистонда Учинчи Ренессанс ғоясини амалга ошириш шунчаки гап эмас, балки давлат сиёсатига айланган.
“Бу улкан мақсаднинг энг ёрқин рамзи жорий йил Тошкентда қад ростлаган Ислом цивилизацияси марказидир. 2026 йил март ойида 40 мамлакатдан ташриф буюрган 1500 дан ортиқ мутахассис иштирокида қуриб битказилган мазкур марказ ўз бағрида ислом оламининг энг ноёб ёдгорликларидан бири – VII асрга мансуб Усмон Мусҳафини сақлайди. Шунингдек, бу ерда илмий лабораториялар, реставрация устахоналари ва архивлар фаолият юритади. Марказ аллақачон дунёдаги энг чиройли янги музейлардан бири сифатида эътироф этилган”, – дея қайд этган журналист.
Материалда таъкидланишича, Ўзбекистон ёндашувининг бошқалардан ажратиб турадиган муҳим жиҳати – бу сунъий интеллектдан иқтисодий тараққиёт воситаси сифатидагина эмас, балки маданий меросни муҳофаза қилиш воситаси сифатида ҳам фойдалаётганидадир.
Сунъий интеллект туризм соҳасини ҳам тубдан ўзгартирмоқда. Бу ташаббус 2026 йилда мамлакатга 12 миллион сайёҳни жалб қилиш режасининг бир қисми ҳисобланади.
Фазан Наваз ўз мақоласини “Учинчи Ренессанс” ўз олдига қўйган мақсадларга тўлиқ эришадими-йўқми, буни вақт кўрсатади. Бироқ бугуннинг ўзидаёқ Ўзбекистон қандай йўлдан одимлаб бораётгани аниқ кўриниб турибди”, – деган сўзлар билан якунлаган.
Ўзбекистон мусулмонлари идораси Матбуот хизмати
- «
- »