Таъзия
Бисмиллаҳир Роҳманир Роҳийм
Иннаа лиллааҳи ва иннаа илайҳи рожиъуун!
Мўмин-мусулмонлар, Ҳиндистон диёри, балки бутун Ислом олами, ақида, ҳадис, фиқҳ ва сийрат олими бўлган устоз аллома, шайх Саййид Салмон Ҳусайний Надавийдан жудо бўлди.
Аллоҳ таоло бу мухлис, юксак мартабали олим бандасини раҳматига чулғасин, чеккан машаққатлари, тортган дардларини каффорат айласин, динига, мусулмон умматига қилган хизматларини, манфаатли илмларини садақаи жория ўлароқ ҳусни қабул қилсин, қабрларини муаттар ва мунаввар айлаб, Фирдавс жаннатларига етиштирсин!
Мавлоно Саййид Салмон Ҳусайний Надавий ҳазратларининг аҳли байтларига, яқинларига, барча шогирду мухлисларига, бутун Ислом умматига самимий таъзия изҳор қиламиз, Аллоҳ таолодан сабри жамил сўраймиз, ҳақларига қилинаётган барча хайрли дуоларни мустажоб қилишини тилаймиз.
«Сабрлиларга хушхабар берингки, улар ўзларига мусибат етганда "Албатта, биз Аллоҳникимиз ва албатта, биз Унга қайтувчимиз", деганлардир».
Куала-Лумпурда малайзиялик машҳур санъаткорнинг Ўзбекистонда суратга олинган янги альбоми тақдимоти ўтказилди
Малайзия ва Жануби-Шарқий Осиёда машҳур бўлган санъаткор Ҳофиз Ҳамидуннинг Ўзбекистонда суратга олинган “Salawat. The Beloved” номли янги мусиқий альбоми тақдимоти бўлиб ўтди, деб хабар бермоқда “Дунё” АА.
Малайзиялик санъаткорларнинг Ўзбекистонда ижодий лойиҳаларни амалга ошириш ва юртимизнинг бой тарихий-маданий меросини халқаро аудитория орасида тарғиб қилишга қизиқиши ортиб бормоқда.
Мазкур ижодий лойиҳа доирасида Ҳофиз Ҳамидун ва унинг ижодий жамоаси жорий йил август ойида Ўзбекистонга ташриф буюриб, Тошкент, Самарқанд ва Бухоро вилоятида қатор видеоклипларни суратга олди.
Суратга олиш жараёнлари мамлакатимизнинг тарихий-маданий ва сайёҳлик салоҳиятини намоён этувчи қатор диққатга сазовор объектларда ташкил этилди.
Янги альбомнинг Малайзиядаги премьерасида 24 та электрон ва босма нашр, 40 дан зиёд ОАВ вакиллари иштирок этди. Ўзбекистонда суратга олинган альбом премьераси тўғрисида ижтимоий тармоқларда 100 га яқин пост ва материаллар эълон қилинди.
Тадбир доирасида Ҳофиз Ҳамидуннинг Ўзбекистоннинг бой исломий, тарихий ва маданий меросига бағишланган фото-кўргазмаси ҳам намойиш этилди. Эътиборлиси, хонанданинг таъкидлашича, янги альбом қисқа вақт ичида 1,4 миллиондан зиёд томошабин эътиборини жалб этган.
Бу кўрсаткич Ўзбекистоннинг маданий ва сайёҳлик салоҳиятини Жануби-Шарқий Осиё аудиториясига етказишда замонавий медиа ва санъат лойиҳаларининг катта имкониятларга эга эканини кўрсатмоқда.
Мазкур медиа-лойиҳа Ўзбекистоннинг Малайзиядаги элчихонаси ва Туризм қўмитаси билан ҳамкорликда юртимизда сўнгги йилларда диний-маърифий соҳада амалга оширилаётган ислоҳотлар ҳамда мамлакатда зиёрат туризми учун яратилаётган замонавий имкониятларни Жануби-Шарқий Осиё жамоатчилигига етказиш мақсадида амалга оширилди.
Ҳофиз Ҳамидуннинг ижодий лойиҳаси нафақат мусиқа ва санъат соҳасидаги ҳамкорлик, балки Ўзбекистоннинг Малайзия ва АСЕАН минтақаси билан маданий ва туризм дипломатиясининг самарали намунаси сифатида ҳам аҳамиятлидир.
Мазкур ташаббус Ўзбекистон ва Малайзия ўртасидаги тобора ривожланиб бораётган маданий-гуманитар ҳамкорлик ва халқлар ўртасидаги дўстлик алоқаларининг яна бир ёрқин намунаси бўлди.
Ўзбекистон мусулмонлари идораси Матбуот хизмати
