Кечирим сўрашга кечикманг
Баъзан айб ўзимиздан ўтса-да, кечирим сўрашга шошилмаймиз. Хўш, бизни боримизча суйган, ардоқлаган инсонлар билан арзимас майда-чуйдалар, жиловланмаган ҳиссиётлар ва сохта ғурур туфайли деворлар қураётганимизда, аслида ким ғолиб бўлади?..
Ҳаёт бизга узоқ бир сафардек туюлади, аммо у аслида жуда қисқа. Бугун кимгадир заҳрингизни сочаётган, жаҳл отига минаётган бўлсангиз, бир лаҳза тўхтанг... Эртага ўша инсонни бағрингизга босиш, овозини эшитиш имкониятидан бутунлай маҳрум бўлиб қолишингиз мумкинлигини ўйлаб кўринг.
Вақт — шафқатсиз ҳакам. Йиллар биз ўйлагандан ҳам шиддат билан учиб ўтади. Кўзни очиб юмгунча болаларимиз улғайганини, сочларига оқ оралаган ота-онамизнинг янада чўкиб, кексайиб қолганларини сезмай қоламиз. Ва бир куни... атрофимизни фақат совуқ ва сукунат қоплагандагина кеч англаймиз.
Гоҳида телефонингизга келган ўша оддий хабар ҳақиқатан ҳам энг охиргиси бўлади. Гоҳида «кейин гаплашамиз» дея айтилган сўздан сўнг, ўша «кейин» ҳеч қачон келмайди.
Ёнингиздаги инсонларнинг тириклигида, нафас олиб турганида қадрига етинг. Кўксингизни тўлдириб турган сохта ғурурни енгиб, биринчи бўлиб қадам ташланг: «Кел, урушмайлик, сен мен учун азизсан», дейишга куч топинг. Чунки бу дунёда ҳақ бўлиб чиқишдан кўра армонларсиз, бахтли яшаш муҳимроқдир.
Акбаршоҳ РАСУЛОВ
Иорданияда Ўзбекистон мустақиллиги байрами муносабати билан тадбир ўтказилди
Иордания пойтахтида Ўзбекистон мустақиллигининг 35 йиллиги муносабати билан байрам тадбири бўлиб ўтди, деб хабар бермоқда “Дунё” АА.
Тадбир Ўзбекистоннинг Ар-Риёддаги элчихонаси томонидан мамлакатимизнинг Иорданиядаги фахрий консули Лауй Абуғазалий кўмагида ташкил этилди.
Байрам тантанасида дипломатик корпус, Иорданиянинг давлат ва жамоат ташкилотлари вакиллари, таниқли ишбилармонлар, етакчи оммавий ахборот воситалари ҳамда ўзбек диаспораси вакиллари иштирок этди.
Учрашувда меҳмонлар Ўзбекистоннинг мустақиллик йилларида эришган ютуқлари, Президент Шавкат Мирзиёев раҳбарлигида амалга оширилаётган кенг кўламли ислоҳотлар ва замонавий ижтимоий-иқтисодий ўзгаришлар натижалари билан таништирилди.
Халқаро ҳамкорликни кенгайтириш ва Ўзбекистоннинг сармоявий имкониятларига алоҳида эътибор қаратилди. Шу билан бирга, мамлакатимизнинг инвестицион салоҳияти, туризмни ривожлантириш, бой тарихий-маданий мероси ҳамда Ислом цивилизацияси маркази фаолиятига бағишланган видеороликлар намойиш этилди.
Иштирокчилар Ўзбекистон ва Иордания ўртасидаги сайёҳлик ва гуманитар алоқаларни янада ривожлантиришга хизмат қиладиган туризм имкониятлари, қадимий шаҳарлар ва маданий обидалар билан танишиш имконига эга бўлди.
Эслатиб ўтамиз, 2025 йил 2 июнь куни Ўзбекистоннинг қароргоҳи Ар-Риёд шаҳрида бўлган Иорданиядаги элчиси Нодиржон Турғунов Қирол Абдулла II ибн ал-Ҳусайнга ишонч ёрлиқларини топширганди.
Ўзбекистон мусулмонлари идораси Матбуот хизмати