Халқаро форумда диний-маърифий соҳадаги ислоҳотларга юксак баҳо берилди
Аввал хабар берганимиздек, Биринчи халқаро ислом цивилизацияси форум доирасида ялпи мажлислар ва шўба йиғилишлари қизғин руҳда ўтказилди.
Хусусан, "Янги Ўзбекистонда диний-маърифий соҳадаги ислоҳотлар: Учинчи Ренессанснинг инновацион ғоялари ва стратегик йўналишлари" мавзусидаги III ялпи мажлис доирасида Дин ишлари бўйича вазирлар шўбаси йиғилиши бўлиб ўтди.
Ушбу нуфузли тадбирда Ўзбекистон Республикаси Дин ишлари бўйича қўмитаси раиси Содиқ Тошбоев, Озарбайжон Республикаси Диний ташкилотлар билан алоқалар қўмитаси раиси Рамин Мамедов, Малайзия Дин ишлари вазири Зулкифли Ҳасан, Қозоғистон Республикаси Дин ишлари қўмитаси раиси Анвар Хатиев ҳамда Қирғизистон Республикаси Президенти ҳузуридаги Дин ишлари ва миллатлараро муносабатлар миллий агентлиги директори Талантбек Ташибеков каби соҳа раҳбарлари ва халқаро спикерлар иштирок этдилар.
Шўба йиғилиши давомида маҳаллий ва халқаро спикерлар томонидан Янги Ўзбекистонда диний-маърифий соҳада амалга оширилаётган кенг кўламли ислоҳотлар, Учинчи Ренессанс пойдеворини яратишга қаратилган инновацион ғоялар ҳамда стратегик йўналишлар ҳақида маърузалар қилинди.
Мулоқотлар чоғида хорижлик вазирлар ва қўмита раҳбарлари юртимизда аждодлар меросини асраб-авайлаш, виждон эркинлигини таъминлаш ҳамда динлараро бағрикенгликни мустаҳкамлаш йўлида амалга оширилаётган ислоҳотларга юксак баҳо бердилар.
Шунингдек, мазкур ўзгаришлар халқаро ҳамкорликни
янги босқичга олиб чиқишда муҳим платформа
бўлиб хизмат қилаётганини алоҳида эътироф этдилар.
Дин ишлари бўйича қўмита
Ахборот хизмати
Регистон майдонини Имом ал-Мотуридий мақбараси билан боғлайдиган кўча реконструкция қилинмоқда
Самарқанднинг тарихий қисмида туризм инфратузилмасини кенг кўламли янгилаш ишлари давом этмоқда. Амалга оширилаётган лойиҳаларнинг асосий мақсади хорижий сайёҳларнинг қолиш муддатини узайтириш, қулай шаҳар муҳитини яратиш ва бир вақтнинг ўзида маҳаллий аҳолининг ҳаёт сифатини оширишдан иборат.
“Самаркандский вестник” нашрига кўра, туризмни ривожлантириш дастури доирасида эски шаҳарнинг 13 та кўчаси босқичма-босқич замонавий пиёдалар йўлагига айлантирилмоқда. Бу ерда янги хизмат кўрсатиш объектлари барпо этилмоқда, жамоат жойлари ободонлаштирилмоқда, миллий меъморчилик анъаналарини сақлаб қолган ҳолда муҳандислик коммуникациялари ва бино фасадлари янгиланмоқда.
Энг йирик лойиҳалардан бири Регистон майдонини Имом ал-Мотуридий мақбараси билан боғлайдиган Бухоро кўчасини реконструкция қилиш бўлди. Кўчанинг 850 метр қисми тўлиқ пиёдалар ҳудудига айлантирилади. Лойиҳани ишлаб чиқувчилардан бири, Самарқанд давлат техника университети ўқитувчиси Жасур Бердиқуловнинг таъкидлашича, илгари бу ерда қатнов қисмининг торлиги туфайли мунтазам равишда тирбандликлар юзага келган, қулай пиёдалар йўлакларининг йўқлиги эса пиёдалар учун жиддий ноқулайликлар туғдирган. Ишлар якунлангач, кўча хавфсиз жамоат майдонига айланади. Аҳоли учун алоҳида тўхташ жойи ажратилган бўлиб, транспорт воситаларининг киришига фақат зарурат туғилганда махсус хизматларга рухсат берилади. Шу билан бирга, сув, газ, электр ва бошқа муҳандислик тармоқлари тўлиқ модернизация қилинмоқда.
Олтин аср маҳалласида жойлашган Бағдод кўчасида ҳам ишлар давом этмоқда. Бу ерда 600 метрлик ҳудуд ободонлаштирилмоқда. Лойиҳа доирасида замонавий туризм ва хизмат кўрсатиш инфратузилмасини яратиш, кичик бизнес ва хизмат кўрсатиш соҳасини ривожлантириш кўзда тутилган.
Ўзбекистон мусулмонлари идораси Матбуот хизмати