Халқаро форумда Имом Бухорий ҳақидаги муҳим асар тақдимот қилинди
#тақдимот #форум #китоб
Аввал хабар қилинганидек, мамлакатимизда "Ислом цивилизацияси: тинчлик, бағрикенглик ва илм-маърифат йўли" мавзусидаги I Халқаро ислом цивилизацияси форуми бўлиб ўтди.
Самарқанд шаҳрида ўтказилган ушбу нуфузли анжуман Имом Бухорий раҳимаҳуллоҳ меросини халқаро миқёсда кенг тарғиб қилиш, ислом илмлари бўйича тадқиқотларни ривожлантириш, хорижий илмий марказлар билан ҳамкорликни мустаҳкамлаш ҳамда ёш тадқиқотчилар учун янги илмий мулоқот майдонларини яратишга хизмат қилди.
Форум доирасида Ўзбекистон мусулмонлари идораси Бухоро вилояти вакили, "Имом Бухорий" ордени соҳиби, Уламолар кенгаши аъзоси, Мир Араб олий мадрасаси ректори Жобир домла Элов муаллифлигида нашр этилган "Имом Бухорий – муҳаддислар фахри" китоби тақдимоти бўлиб ўтди.
Асарда буюк муҳаддис Имом Бухорий раҳимаҳуллоҳнинг ҳаёти, илмий мероси, юксак ахлоқи ҳамда Ислом тамаддуни ривожига қўшган беқиёс ҳиссаси содда ва равон услубда ёритилган.
Китоб Имом Бухорий раҳимаҳуллоҳнинг илмга садоқати, тақвоси ва машаққатли илмий сафарларини ўқувчига яқиндан таништириб, маънавий-маърифий жиҳатдан муҳим манба бўлиб хизмат қилади.
Ўзбекистон мусулмонлари идораси
Матбуот хизмати
“Orta Lectura”: Ўзбекистон хавфсиз сайёҳлик йўналиши сифатида ўз мавқеини мустаҳкамламоқда
Испаниянинг “Orta Lectura” нашрида Ўзбекистонда туризм соҳасида амалга оширилаётган ислоҳотларга бағишланган мақола эълон қилинди, деб хабар бермоқда “Дунё” АА.
Мақолада қайд этилишича, сўнгги йилларда Ўзбекистон турли нуфузли халқаро рейтингларда ҳамда хорижий давлатларнинг сайёҳлар учун тавсияларида юқори хавфсизлик даражасига эга мамлакатлардан бири сифатида эътироф этилмоқда.
World Justice Project (WJP) томонидан эълон қилинган “Rule of Law Index 2025” натижаларига кўра, Ўзбекистон “Тартиб ва хавфсизлик” кўрсаткичи бўйича 143 та мамлакат орасида 17-ўринни, Шарқий Европа ва Марказий Осиёдаги 15 та мамлакат орасида эса 1-ўринни эгаллади.
WJP индекси 215 мингдан ортиқ фуқаролар ҳамда 4 минг 100 нафардан зиёд ҳуқуқшунос ва экспертлар ўртасида ўтказилган сўровномаларга асослангани билан аҳамиятлидир.
“Gallup” компаниясининг “2025 Global Safety Report” маърузасида таъкидланишича, Ўзбекистон аҳолисининг 86 фоизи кечаси ёлғиз юрганда ўзини тўлиқ хавфсиз ҳис қилади. Бу кўрсаткич дунё бўйича ўртача 73 фоизлик даражадан сезиларли даражада юқоридир. Шу билан бирга, “Law and Order Index”нинг кенгроқ кўрсаткичи бўйича мамлакатимиз 100 дан 91 балл тўплади.
Institute for Economics & Peace томонидан тузиладиган “Global Peace Index 2026” натижаларига кўра, Ўзбекистон ўз позициясини 30 поғонага яхшилаб, 163 та мамлакат орасида 1,726 кўрсаткич билан 37-ўринга кўтарилди. 2026 йилги расмий ҳисоботда мамлакатимиз тинчлик кўрсаткичлари энг юқори суръатда яхшиланган давлатлар қаторига киритилди.
АҚШ Давлат департаменти “Travel Advisories” тизимида Ўзбекистонга “Level 1 – Exercise Normal Precautions” даражасини, яъни “Одатий эҳтиёт чораларига риоя қилиш” тавсиясини берган. 2026 йил январда янгиланган тавсияномада хавф даражаси оширилмади. Бу АҚШ Давлат департаменти томонидан халқаро саёҳатлар учун белгиланадиган энг паст хавф даражаси ҳисобланади.
Ўзбекистон мусулмонлари идораси Матбуот хизмати