Шайхулислом Оллоҳшукур Пошшозода Мир Араб мадрасасида бўлди
#xabar #Islom_sivilizatsiyasi_forumi #buxoro
Шу йил 11 июль куни Кавказ мусулмонлари идораси раиси, Шайхулислом Оллоҳшукур Пошшозода Мир Араб ўрта махсус ислом таълим муассасасига ташриф буюрди.
Ташриф давомида меҳмон ўзлари таҳсил олган қутлуғ илм даргоҳида яратилган замонавий шароитлар, таълим жараёни ҳамда кейинги йилларда амалга оширилган бунёдкорлик ишлари билан яқиндан танишди. Шунингдек, устозлар билан самимий мулоқот қилиб, талаба йилларига оид илиқ хотиралари билан ўртоқлашди.
Шайхулислом Оллоҳшукур Пошшозода 1968–1973 йилларда Мир Араб мадрасасида таҳсил олган бўлиб, кейинчалик Тошкент Ислом институтини тамомлаган. 1979 йилдан буён Кавказ мусулмонлари идораси раиси сифатида фаолият юритиб келмоқда. Шунингдек, у халқаро диний ташкилотлар ва маслаҳат кенгашларининг фаол аъзоларидан бири ҳисобланади.
Ташриф чоғида Шайхулислом Ўзбекистонда диний-маърифий соҳада амалга оширилаётган кенг кўламли ислоҳотлар, тарихий обидалар ва муқаддас қадамжоларни асраб-авайлаш, таълим муассасаларини ривожлантириш йўлидаги саъй-ҳаракатларни юксак баҳолади.
У киши бу юртда устозларидан нафақат диний илм, балки ҳаёт сабоқларини ҳам олганини алоҳида таъкидлаб, Мир Араб мадрасаси ва бошқа муқаддас масканларда амалга оширилган ободонлаштириш ишлари давлатнинг дин ва миллий меросга бўлган юксак эътиборининг амалий ифодаси эканини қайд этди.
Ташриф якунида Мир Араб мадрасаси жамоаси меҳмонга самимий ташаккур изҳор қилиб, мазкур учрашув устозлар ва талабалар учун унутилмас маънавий-маърифий мулоқот бўлганини таъкидлади.
Ўзбекистон мусулмонлари идораси
Матбуот хизмати
"Имом Бухорий" ордени — юксак эҳтиром рамзи!
Куни кеча мамлакатимиз мустақиллигининг 35 йиллиги муносабати билан муҳтарам Президентимиз томонидан юксак давлат мукофотларига сазовор бўлган бир гуруҳ ватандошларимиз тақдирланди.
Энг қувончлиси шуки, тадбирда диний-маърифий соҳада фидокорона хизмат қилиб келаётган, халқимизнинг маънавий юксалишига беқиёс ҳисса қўшаётган таниқли уламоларимиз ва фахрийларимизнинг заҳматли меҳнатлари юксак даражада эътироф этилди!
Хусусан, Диний идора тизимида узоқ йиллардан бери самарали хизмат қилиб келаётган устозлардан Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, Ўзбекистон мусулмонлари идораси Фахрийлар кенгаши раиси Шайх Абдулазиз Мансур, Самарқанд вилояти Пайариқ тумани "Имом ал-Бухорий" жоме масжиди фахрий имоми Маҳмуджон домла Ибодуллаев, Бухоро вилояти Когон тумани "Баҳоуддин Нақшбанд" жоме масжиди имом-хатиби Абдуғофур домла Раззоқов "Имом Бухорий" орденини Давлатимиз Раҳбаридан қабул қилиб олишди.
Устозларнинг илмий-маърифий фаолияти, халқ ичида маърифат улашишдаги фидойиликлари давлатимиз томонидан юксак қадрлангани бутун диний-маърифий соҳада меҳнат қилаётганлар учун катта фахр ва шарафдир.
Ушбу воқеа Янги Ўзбекистонда диний-маърифий соҳага, миллий қадриятларимизни авайлаб-асраш ҳамда ривожлантиришга қаратилаётган изчил ва хайрли сиёсатнинг амалий ифодасидир.
Халқимизда қадимдан маърифат аҳлини улуғлаш, уларнинг заҳматли меҳнатини қадрлаш эзгу анъана саналади. Ислом таълимотида ҳам илм эгаларига алоҳида мақом ва ҳурмат билан қаралади. Зеро, Имом Термизий бобомиз ривоят қилган ҳадиси шарифда: «Уламолар пайғамбарларнинг меросхўрларидир», дейилган.
Уламоларга кўрсатилаётган бундай эътиборнинг нечоғли хайрли экани қуйидаги ҳикматда ҳам ўз ифодасини топган. Улуғ зотлардан бири Товус раҳматуллоҳи алайҳ отасидан қуйидагича ривоят қилган: «Тўрт кишини ҳурмат қилиш суннатдир: олим, ёши улуғ инсон, подшоҳ ва ота» (Имом Абдураззоқ ривояти).
Мазкур юксак мукофот миллий ва диний қадриятларимизни тиклаш, Ислом маърифатини кенг тарғиб этиш, жамиятда бағрикенглик ва тинчлик-омонликни бардавом сақлаш йўлидаги кўп йиллик хайрли хизматларнинг муносиб эътирофидир.
Давлатимизнинг бундай эътибори диний соҳа ходимларига янада улкан масъулият юклайди, маънавий юксалиш йўлидаги хайрли хизматлар кўламини янада кенгайтиришга хизмат қилади, инша Аллоҳ.
Ўзбекистон мусулмонлари идораси Матбуот хизмати
- «
- »