Ҳожилар Қўшработдаги 250 дан зиёд хонадонга қувонч улашди
Муҳтарам Президентимиз ташаббуси билан юртимизда ўтказилаётган "Маҳалла ободлиги ва меҳр-саховат ойлиги" Самарқанд вилоятида ҳам хайрли амаллар билан бошланди.
Шу муносабат билан Самарқанд вилояти ҳокимлиги ва вилоят вакиллиги ҳамкорлигида Қўшработ туманида кенг қамровли меҳр-саховат тадбири ташкил этилди. Унда вилоят ва туман ҳокимлиги мутасаддилари, бош имом-хатиб ўринбосарлари ҳамда жорий йилда муқаддас Ҳаж ибодатини адо этиб қайтган ҳожи оталар иштирок этдилар.
Тадбир доирасида тумандаги 16 та маҳаллада истиқомат қилувчи 250 дан ортиқ эҳтиёжманд хонадонга ташаббускор ҳожилар ҳомийлигида мактаб формалари ва озиқ-овқат маҳсулотлари етказиб берилди.
Муборак сафардан қайтган ҳожиларимизнинг бу каби эзгу ишларга бош-қош бўлаётгани халқимиз орасида меҳр-оқибат ва ҳамжиҳатлик муҳитини янада мустаҳкамлашга хизмат қилмоқда.
Ўзбекистон мусулмонлари идораси
Самарқанд вилояти вакиллиги
Матбуот хизмати
“Arab Tourist”: Самарқанд, Бухоро ва Хива — ислом цивилизацияси ва жаҳон маданий меросининг бебаҳо дурдоналари
Саудия Арабистонининг туризм ва саёҳатларга ихтисослашган “Arab Tourist” электрон нашрида “Марказий Осиёнинг қоқ марказида жойлашган ва Буюк ипак йўли билан боғланган мамлакат” сарлавҳали таҳлилий мақола эълон қилинди, деб хабар бермоқда “Дунё” АА.
Мақолада Буюк ипак йўли тарихида ўзбек шаҳарларининг тутган ўрни алоҳида эътироф этилади. Хусусан, Самарқанд, Бухоро ва Хива каби тарихий шаҳарлар асрлар давомида Шарқ ва Ғарб ўртасидаги савдо, фан ва маданият марказлари сифатида хизмат қилгани таъкидланади. Регистон майдони, Ичан-қалъа ва Бухородаги меъморий обидалар ислом цивилизацияси ҳамда жаҳон маданий меросининг бебаҳо дурдоналари сифатида тилга олинади.
Бундан ташқари, нашр Ўзбекистоннинг ранг-баранг табиати ва географик рельефига тўхталиб ўтган. Қизилқум чўли, серҳосил Фарғона водийси, Тянь-Шань ва Помир-Олой тоғ тизмалари аҳоли жойлашуви ва қишлоқ хўжалиги ривожида муҳим ўрин тутиши қайд этилади.
Нашр, шунингдек, Буюк Мирзо Улуғбек каби донишмандларнинг астрономия ва математика соҳасидаги буюк кашфиётларини алоҳида эътироф этган.
Хулосада таъкидланганидек, Тошкент, Самарқанд, Бухоро, Наманган ва Андижон каби шаҳарлар бугунги кунда нафақат маъмурий ва иқтисодий, балки жадал ривожланаётган йирик маданий-туристик марказлар сифатида дунё сайёҳлари эътиборини ўзига жалб этмоқда.
Ўзбекистон мусулмонлари идораси Матбуот хизмати