Янги тайинланган имомлар билан илмий суҳбат бўлиб ўтди
Бугун, 21 июль куни Ўзбекистон мусулмонлари идорасида яқинда лавозимга тайинланган имом-хатиб ва имом ноиблари учун илмий-маърифий суҳбат ташкил этилди.
Тадбирда Ўзбекистон мусулмонлари идораси бўлим бошлиқлари Шайх Али Файзуллоҳ Маҳдум ва Салоҳиддин Шерхоновлар иштирок этди. Унда Шайх Али Файзуллоҳ Маҳдум соҳа ходимларига “Имомлик – шарафли касб” ҳамда “Имоматда қироатнинг аҳамияти” мавзуларида маъруза қилди.
Ушбу суҳбат давомида диний соҳа ходимларининг масъулияти, масжидлардаги қироат сифатини ошириш, имомлик мақомининг ижтимоий ва маънавий ҳаётдаги ўрни ҳамда қавм билан ишлаш одобларига алоҳида тўхталиб ўтилди.
Ўзбекистон мусулмонлари идораси
Матбуот хизмати
Байрам шукуҳи хонадонларга кириб боряпти
Энг улуғ, энг азиз байрам – Мустақиллик шодиёналарига саноқли кунлар қолди. Айём арафасида кам таъминланган, боқувчисини йўқотган, ўзгалар кўмагига муҳтож беморлар, кексалар ҳолидан хабар олиниб, уларга байрам туҳфалари етказиб бериляпти.
Бугун Тошкент шаҳар бош имом-хатиби Абдуқаҳҳор домла Юнусов бошчиликларида имом-домлалар, ҳомийлар пойтахтимизнинг Олмазор туманидаги "Исломобод" масжидида йиғилиб, эҳтиёжманд оилалар ҳолидан хабар олишди.
«Вақф» хайрия жамоат фонди Тошкент шаҳар филиали ҳамда ҳомийлар кўмагида тайёрланган озиқ-овқатлар жамланмаси, ширинликлардан иборат эҳсонлар билан хонадонларга кириб борилди.
Кўнгли ўксик инсонлар байрам туҳфаларини олиб, азиз юртимизда ҳеч ким меҳр ва эътибордан четда эмаслигига яна бир карра амин бўлишди.
Аллоҳ таоло эҳсонларни қабул қилсин. Савобларини кўпайтириб берсин!
Тошкент шаҳар вакиллиги
Матбуот хизмати
