Қашқадарёлик имомлар “Заковат»да беллашди
2026 йил 4 август куни Ўзбекистон Республикаси давлат мустақиллигининг 35 йиллиги муносабати билан Қашқадарё вилоятида фаолият юритаётган имом-хатиблар ва ноиб имомлар иштирокида “Заковат” интеллектуал беллашуви юқори савияда ташкил этилди.
Мазкур тадбирнинг асосий мақсади диний соҳа ходимларининг интеллектуал салоҳиятини юксалтириш, уларнинг билим ва тафаккурини янада бойитиш, шунингдек, мустақиллик байрамини маънавий-маърифий руҳда кенг нишонлашдан иборат бўлди.
Беллашувда шаҳар ва туманлардан ташриф буюрган жамоалар Ислом тарихи, фиқҳ, ақоид, маънавий-маърифий ҳамда китобхонлик йўналишлари бўйича берилган саволларга жавоб бериш орқали мантиқий фикрлаш, тезкорлик ва билимдонлик борасида ўзаро куч синашди.
Якунда Қарши шаҳри ва Нишон тумани вакилларидан иборат бўлган жамоа энг кўп балл тўплаб, биринчи ўринни қўлга киритди. Ғолиб ҳамда совриндор жамоалар ташкилотчилар томонидан диплом ва эсдалик совғалари билан тақдирланди.
ЎМИ Қашқадарё вилояти вакиллиги
Матбуот хизмати
Бухорода 600 дан ортиқ абитуриент имтиҳон топширди (фотолавҳа)
Ўзбекистон мусулмонлари идораси тасарруфидаги олий ва ўрта махсус диний таълим муассасаларига 2026-2027 ўқув йили учун кириш тест синовларининг 5-ҳудуд (Бухоро вилояти) бўйича имтиҳон жараёнлари Мир Араб олий мадрасаси биносида бўлиб ўтди.
Мазкур ҳудуд бўйича диний таълим муассасаларига ҳужжат топширган 657 нафар абитуриент тест синовларида иштирок этди.
Имтиҳонларнинг шаффофлиги, адолатлилиги ҳамда тартиб-интизомини таъминлаш мақсадида жараёнларга Дин ишлари бўйича қўмита ва Ўзбекистон мусулмонлари идораси масъул раҳбарлари, диний таълим муассасалари мутасаддилари, педагог-ўқитувчилар ҳамда ички ишлар ва тиббиёт ходимлари жалб этилди.
Тест синовлари бошланишидан олдин абитуриентларга имтиҳон топшириш тартиби ва баҳолаш мезонлари батафсил тушунтирилди. Барча жараёнлар белгиланган талаб ва қоидаларга мувофиқ, юқори даражада ташкил этилди.
Ташкилотчилар тест жараёнларининг шаффоф ва тартибли ўтишига яқиндан кўмаклашган Бухоро шаҳар ички ишлар органи, соғлиқни сақлаш бошқармаси тиббиёт ходимлари ҳамда диний таълим муассасалари вакилларига ўз миннатдорлигини билдирдилар.
Ўзбекистон мусулмонлари идораси
Матбуот хизмати
