Қашқадарёда диний таълим муассасаларига кириш имтиҳонлари бўлиб ўтмоқда
Бугун, 5 август куни Ўзбекистон мусулмонлари идораси тасарруфидаги олий ва ўрта махсус диний таълим муассасаларига кириш тест синовлари 3-ҳудуд Қашқадарё вилоятида ўтказилмоқда.
Имтиҳонлар Қашқадарё вилояти, Қарши шаҳридаги “Олимпия ва паралимпия спорт турларига тайёрлаш маркази”да бўлиб ўтмоқда.
Абитуриентлар учун муҳим эслатма ва қоидалар:
– Абитуриент тест синовларига шахсни тасдиқловчи ҳужжат (паспорт ёки ID-карта) ҳамда имтиҳон рухсатномаси билан келиши талаб этилади. Мазкур ҳужжатлардан бири бўлмаган тақдирда абитуриент тест синовларига киритилмайди.
– Абитуриентлардан имтиҳон рухсатномасида кўрсатилган вақтдан 30 дақиқа олдин имтиҳон ҳудудига етиб келиш сўралади. Ўз вақтида келмаганлар имтиҳонга қўйилмайди.
– Тест давомида мобил телефон, ақлли соат, қулоқчин, калькулятор, луғат, китоб, шпаргалка ҳамда ҳар қандай электрон ва хотира қурилмаларидан фойдаланиш қатъиян ман этилади.
– Бошқалардан кўчириш, ёрдам бериш, суҳбатлашиш, халақит бериш ёки имтиҳон платформасида бошқа абитуриентнинг кабинетига киришга уриниш ҳолатлари аниқланса, абитуриент дарҳол четлатилади.
Манзил: Қарши шаҳри, Мустақиллик шоҳ кўчаси 13-уй. Мурожаат учун: +998 99 717 0461
Маълумот ўрнида, 3-ҳудуд Қашқадарё вилоятидан имтиҳон жараёнларида 789 нафар абитуриент иштирок этади.
Ўзбекистон мусулмонлари идораси
Матбуот хизмати
Бир гуруҳ диний-маърифий соҳа фидойиларига "Ўзбекистон Республикаси мустақиллигининг 35 йиллиги" эсдалик нишонлари топширилди
27 август куни Ўзбекистон Республикаси мустақиллигининг 35 йиллиги муносабати билан диний-маърифий соҳада самарали меҳнат қилиб келаётган фидойи юртдошларимизни тақдирлашга бағишланган тантанали тадбир бўлиб ўтди.
Тадбирда Ўзбекистон Республикаси Президентининг диний-маърифий масалалар бўйича маслаҳатчиси Музаффар Комилов кириш сўзи билан иштирок этди.
Кириш нутқида мамлакатимизда мустақиллик йилларида, айниқса, сўнгги йилларда диний-маърифий соҳани ривожлантириш, жамиятда тинчлик-тотувлик, миллатлараро ҳамжиҳатлик ва диний бағрикенгликни мустаҳкамлаш борасида амалга оширилаётган ислоҳотлар, шунингдек, соҳада фаолият юритаётган уламолар, имом-хатиблар, мударрислар ва фидойи ходимларнинг муносиб ҳиссаси ҳақида алоҳида таъкидланди.
Тантанали тадбир давомида диний-маърифий соҳада кўп йиллардан буён самарали меҳнат қилиб, юртимизда маънавий барқарорликни таъминлаш, ёш авлодни миллий ва умуминсоний қадриятлар руҳида тарбиялаш, аҳоли ўртасида маърифий тушунтириш ишларини олиб боришга муносиб ҳисса қўшиб келаётган бир гуруҳ фидойи юртдошларга "Ўзбекистон Республикаси мустақиллигининг 35 йиллиги" эсдалик нишонлари тантанали равишда топширилди.
Эсдалик нишонларини топшириш маросимида Ўзбекистон Республикаси Президентининг диний-маърифий масалалар бўйича маслаҳатчиси Музаффар Комилов, Дин ишлари бўйича қўмита раиси Содиқ Тошбоев, Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Ўзбекистондаги Ислом цивилизацияси маркази директори Фирдавс Абдуҳаликов, Ўзбекистон Республикаси Вазирлар Маҳкамаси масъул ходими Орифхон Зокировлар иштирок этдилар.
Тақдирлаш маросимида таъкидланганидек, мазкур эсдалик нишони мамлакатимиз тараққиётига, унинг тинчлиги ва барқарорлигига, жамиятда миллатлараро тотувлик ва диний бағрикенглик муҳитини мустаҳкамлашга, ёш авлодни миллий ва умуминсоний қадриятлар руҳида тарбиялашга муносиб ҳисса қўшаётган фидойи инсонларга билдирилган юксак эҳтиром ва эътироф рамзидир.
Тадбир якунида тақдирланганлар ўзларига билдирилган юксак ишонч ва эътибор учун миннатдорлик билдириб, мамлакатимиз тинчлиги ва равнақи йўлидаги эзгу фаолиятларини янада сидқидилдан давом эттиришларини таъкидладилар.
Барча мукофот соҳибларини самимий муборакбод этамиз!
Мустақиллигимизнинг 35 йиллиги муборак бўлсин!
Ўзбекистон мусулмонлари идораси Матбуот хизмати