Ислом бузғунчи ғояларга қарши
Аллоҳ таоло марҳамат қилади: “Эй иймон келтирганлар!Барчангиз ёппасига тинчлик ишига киришингиз” (Бақара сураси 208-оят)
Пайғамбаримиз соллалоҳу алайҳи ва саллам бундай дедилар: “Мусулмонлар унинг тили ва қўлидан омонда бўлган киши чин мусулмондир” (Имом Бухорий ривояти)Ҳақиқий мусулмон киши бошқаларга озор бериш ҳақида эмас, балки оиласи тинчлиги, яшаб турган жойини обод қилиш, бугуни ва эртаси ҳақида қайғуради, атрофдагиларга яхшилик улашади. Бугунги кунда ижтимоий тармоқларда ўзларига қандайдир тахаллусларни қўйиб олиб ёшларни бузғунчи ғоялар гирдобига тораётган, мусулмон оламига фитна солаётган Абу Салоҳ, Маҳмуд Абдимўмин, Содиқ Самарқандий, Абдуллоҳ Зуфарлар ким ўзи?, деган савол туғилади. Буларнинг илмий даражалари борми? Йўқ албатта. Бир сўз билан айтганда улар бузғунчидир. Терроризм – жамиятда осойишталикни издан чиқариш, одамларни қўрқитиш, куч ишлатиш, зўровонлик қилиш, одамларни қириб ташлаш, қўрқитиш орқали пул ундириш каби мақсадларни кўзловчи оқим. Экстемизм эса жамиятдаги қонун – қоидаларга зид радикал қараш ва ҳаракатларни ифодалайди. Терроризм ва эксремизмнинг асосий мақсади сиёсий жараён билан боғлиқ бўлиб, ҳокимиятни эгаллаш, жамият осойишталиги ва хавфсизлигига таҳдид солиб, инсонлар онгини пуч ғоялари билан заҳарлашдан иборат. Юқорида таъкидлаб ўтилган шахслар шулар жумласидандир. Бутун дунё уломалари дин ниқоби остида турли ҳаракатларни амалга ошираётган террористик ва экстремистик оқимларнинг ҳатти ҳаракатларини қоралаб, уларнинг қилаётган иши Ислом динига умуман алоқаси йўқлигига иттифоқ қилишган.
Ислом – тинчлик ва хотиржамлик дини. Уни ҳар қандай бузғунчи оқимлар таъсиридан сақлайлик. Динимиз таълимотига оид масалаларни , аввало, масжид имом-хатибларидан сўраб, ишончли диний – маърифий китоблар, интернет тармоғидаги сайтлардан ўқиб ўрганайлик.
Уйчи тумани
"Девонабобо" жоме масжиди имом-хатиби
Абдуфаттоҳ Мусаханов
Куала-Лумпурда малайзиялик машҳур санъаткорнинг Ўзбекистонда суратга олинган янги альбоми тақдимоти ўтказилди
Малайзия ва Жануби-Шарқий Осиёда машҳур бўлган санъаткор Ҳофиз Ҳамидуннинг Ўзбекистонда суратга олинган “Salawat. The Beloved” номли янги мусиқий альбоми тақдимоти бўлиб ўтди, деб хабар бермоқда “Дунё” АА.
Малайзиялик санъаткорларнинг Ўзбекистонда ижодий лойиҳаларни амалга ошириш ва юртимизнинг бой тарихий-маданий меросини халқаро аудитория орасида тарғиб қилишга қизиқиши ортиб бормоқда.
Мазкур ижодий лойиҳа доирасида Ҳофиз Ҳамидун ва унинг ижодий жамоаси жорий йил август ойида Ўзбекистонга ташриф буюриб, Тошкент, Самарқанд ва Бухоро вилоятида қатор видеоклипларни суратга олди.
Суратга олиш жараёнлари мамлакатимизнинг тарихий-маданий ва сайёҳлик салоҳиятини намоён этувчи қатор диққатга сазовор объектларда ташкил этилди.
Янги альбомнинг Малайзиядаги премьерасида 24 та электрон ва босма нашр, 40 дан зиёд ОАВ вакиллари иштирок этди. Ўзбекистонда суратга олинган альбом премьераси тўғрисида ижтимоий тармоқларда 100 га яқин пост ва материаллар эълон қилинди.
Тадбир доирасида Ҳофиз Ҳамидуннинг Ўзбекистоннинг бой исломий, тарихий ва маданий меросига бағишланган фото-кўргазмаси ҳам намойиш этилди. Эътиборлиси, хонанданинг таъкидлашича, янги альбом қисқа вақт ичида 1,4 миллиондан зиёд томошабин эътиборини жалб этган.
Бу кўрсаткич Ўзбекистоннинг маданий ва сайёҳлик салоҳиятини Жануби-Шарқий Осиё аудиториясига етказишда замонавий медиа ва санъат лойиҳаларининг катта имкониятларга эга эканини кўрсатмоқда.
Мазкур медиа-лойиҳа Ўзбекистоннинг Малайзиядаги элчихонаси ва Туризм қўмитаси билан ҳамкорликда юртимизда сўнгги йилларда диний-маърифий соҳада амалга оширилаётган ислоҳотлар ҳамда мамлакатда зиёрат туризми учун яратилаётган замонавий имкониятларни Жануби-Шарқий Осиё жамоатчилигига етказиш мақсадида амалга оширилди.
Ҳофиз Ҳамидуннинг ижодий лойиҳаси нафақат мусиқа ва санъат соҳасидаги ҳамкорлик, балки Ўзбекистоннинг Малайзия ва АСЕАН минтақаси билан маданий ва туризм дипломатиясининг самарали намунаси сифатида ҳам аҳамиятлидир.
Мазкур ташаббус Ўзбекистон ва Малайзия ўртасидаги тобора ривожланиб бораётган маданий-гуманитар ҳамкорлик ва халқлар ўртасидаги дўстлик алоқаларининг яна бир ёрқин намунаси бўлди.
Ўзбекистон мусулмонлари идораси Матбуот хизмати
