“Қозон Қуръони” кўргазмаси баҳоргача давом этади
Ислом маданияти музейида жойлашган “Қозон Қуръони” кўргазмаси 2024 йил 29 февралига қадар узайтирилди.
Бу ҳақда “Қозон Кремл” музей-қўриқхонаси матбуот хизмати маълум қилди.
Кўргазмада Қозон федерал университети илмий кутубхонаси фондидан ноёб буюмлар тақдим этилган. Булар 18 асрдаги Қуръони каримнинг татар қўлёзмалари, 1803 йилдаги Қуръони каримнинг биринчи босма нашрлари, Қозон Қуръонлари ҳодисасини ўрганган татар диний арбобларининг қўлёзма ва китобларидир. Мазкур китобларнинг муаллифлари татар етук уламолари Шиғабутдин Маржоний, Ризаутдин Фахретдин, Муса Бигиевлар саналади.
Ўзбекистон мусулмонлари идораси
Матбуот хизмати
Қарши шаҳридаги "Хонақоҳ" масжидининг янги биносини қуриш бошланди
Қашқадарё вилоятида масжид ва муқаддас қадамжоларни обод этиш ҳамда янги маърифат масканларини барпо этиш бўйича хайрли ишлар изчил давом эттирилмоқда.
Ана шундай бунёдкорлик лойиҳаларидан бири сифатида Қарши шаҳридаги тарихий «Хонақоҳ» жоме масжидини янги биносини қуришга киришилди. Жорий йилнинг 3 август куни ушбу қурилиш ишларига бағишланган маросим бўлиб ўтди.
Тадбирда Ўзбекистон мусулмонлари идорасининг Қашқадарё вилояти вакили, вилоят бош имом-хатиби Раҳматилло домла Усмонов ҳамда маҳаллий нуронийлар иштирок этиб, янги бинонинг биринчи ғиштини қўйдилар.
Маросим якунида йиғилганлар юрт тинчлиги, эл фаровонлиги ва масжид қурилиши хайрли якунланишини тилаб дуо қилдилар.
Ўзбекистон мусулмонлари идораси
Матбуот хизмати
