"Takfir" – xatarli ma'naviy tahdid!
Boshqa musulmon mamlakatlar qatori bizning mamlakatimizda ham hozirgi paytda ichimizdan tafriqa va fitnalar kelib chiqishiga sabab bo'layotgan ma'naviy tahdidlardan biri takfir hisoblanadi.
Usmon ibn Affon (r.a.) va Ali ibn Abutolib ( r.a.) kabi zotlarni ham kufrda ayblagan xorijiylar kabi hozirgi kunda o'zlariga qӯshilmagan va ergashmagan musulmonlarni kofirga chiqarayotgan ekstremistik tashkilotlar muqaddas dinimiz ahkomlarini ko'r-ko'rona buzgan holda, musulmonlarning moli va jonlarini ӯzlariga halol sanashmoqda. Bu bilan musulmonlarni asossiz "kofir" deb hukm chiqarib, ӯzlarining jamiyat va davlatga qarshi bӯlgan fitnalarini oqlashga urinishmoqda.
Musulmon kishini kofirga chiqarish ӯta xatarli ekanligidan, dinimiz bundan qaytargan. Bu ish mumkin emasligi haqida hadisda: " Rasululloh (s.a.v.): "Biror kishi ӯz birodariga: " Ey kofir!",- desa, bu sӯz ikkalasidan biriga tegishli bӯladi" , dedilar ( ya'ni, agar kofirlikda ayblovchi haq bӯlsa, ayblanuvchi kofirligicha qoladi. Basharti haq bӯlmasa, u holda ӯzi kofir bӯladi) (Imom Buxoriy rivoyati).
Hanafiy ulamolardan Ibn Nujaym: "Agar kofir deyish uchun tӯqson tӯqqizta dalil bӯlsa- yu, kofir demaslik uchun birgina dalil bӯlsa, tӯqson tӯqqizni qӯyib, ӯsha bir dalilni olish kerak ",- deydilar.
Payg'ambarimizning: "Buzuq va kofir bӯlmagan odamni buzuq va kofir degan odamning ӯzi kofir va buzuqdir" , - degan hadislaridan ogoh bӯlib, sizu biz musulmonlar, ayniqsa, yoshlarimizdan ijtimoiy tarmoqlar orqali tinch va osuda yashab kelayotgan va diniy ibodatlarni qilayotgan, ayniqsa, diniy ulamolarimizni, imomlarimizni kofirga chiqarib obrӯsizlantirishga urinayotgan, tinch yurtimizni barbod qilib, notinch qilish kabi gunoh ishlarga chaqirayotgan kimsalardan ogoh va ehtiyot bӯlishlari talab etiladi.
Alloh taolo yurtimiz musulmonlarini, musulmon ummati birligiga rahna soluvchi ma'naviy tahdid bӯlgan "takfir "dan saqlasin.
Abdullaxon Mirzayev,
Denov tuman "Muhammadqul" jome masjidi imom xatibi
Zeki Kaymaz: Kelgusi o‘n yil ichida O‘zbekistonni turkiy dunyoda yorqin yulduz sifatida ko‘raman
Turk tili instituti Ilmiy kengashi a’zosi, filolog olim, professor Zeki Kaymaz O‘zbekiston mustaqilligining 35 yilligi arafasida “Dunyo” AA orqali yurtdoshlarimizga o‘zining samimiy tabrigi va ezgu tilaklarini yo‘lladi.
– Avvalo, O‘zbekiston xalqini istiqlolning 35 yilligi munosabati bilan chin ko‘ngildan tabriklayman. O‘ttiz besh yil oz vaqt emas. Men yuz yildan oshgan mustaqil Turkiya fuqarosi sifatida Sizlarga ham yana ko‘p asrlar mustaqillik shodiyonasini nishonlashingizni tilayman.
Tarixga nazar tashlasak, Markaziy Osiyo, xususan, O‘zbekiston bilan yaqin munosabatda bo‘lib kelganmiz. Ayniqsa, Turkiyadagi milliy ozodlik kurashi davrida bizga bu diyordan jo‘natilgan ko‘makni doimo katta minnatdorlik bilan yodga olamiz.
Qardosh o‘zbek xalqi biz uchun doimo yaqin birodar, qalin do‘st bo‘lib kelgan. O‘zbekistonning bugungi taraqqiyoti bizni juda mamnun qiladi. Ushbu zaminga har borganimda go‘zal va obod mamlakatni ko‘ramaz. Yurtingizda madaniyat va ma’rifat o‘choqlari bisyor. Albatta, bu tamaddun va sivilizatsiyaning ildizlari uzoq o‘tmishga borib taqaladi.
Markaziy Osiyodagi ilk o‘rta asrlardagi Birinchi renessans hamda Amir Temur asos solgan Ikkinchi renessans davrlarida bu zaminda buyuk sivilizatsiya shakllandi. Toshkentda bunyod etilgan Islom sivilizatsiyasi markazi, Samarqanddagi Imom Buxoriy majmuasi, Imom Moturidiy ziyoratgohi kabi madaniy-ma’naviy maskanlar islom olamida muhim ahamiyatga ega.
Geostrategik mavqei nuqtayi nazaridan, men kelgusi o‘n yil ichida O‘zbekistonni turkiy dunyo, xususan, Markaziy Osiyo davlatlari orasida yorqin yulduz sifatida ko‘raman.
Buning sabablari bor, albatta. Avvalo, mamlakatdagi kuchli iqtisodiyot. Qolaversa, chuqur ildizlarga ega bo‘lgan boy madaniyat va tarix. Turkiya bilan O‘zbekiston o‘rtasidagi mustahkam do‘stlik va yaqin hamkorlik aloqalari ham muhim ahamiyat kasb etadi.
Tilagim – do‘stlik rishtalarimiz yanada mustahkamlansin, davlatlarimiz o‘rtasidagi hamkorlik aloqalari yuqori darajaga ko‘tarilsin.
Yana bir bor mustaqillik bayrami bilan chin qalbimdan tabriklayman va o‘zbek xalqiga samimiy salomlarimni yo‘llayman.
O‘zbekiston musulmonlari idorasi Matbuot xizmati
