Ijtimoiy tarmoqlardagi noto'g'ri xabarlarga munosabat
Bugungi kunda internet tarmoqlari orqali yoshlarga diniy ilmlarni bildirish, o'rgatish maqsadida ochilgan ba'zi bir saytlar, ijtimoiy tarmoqlarning ba'zilari to'g'ri, haq yo'lni ko'rsatsa, ba'zilarida esa qandaydir g'arazli niyat bo'lib, siyosiy kuch olib, o'sha mamlakat yoki hududga qaratilgan ma'lum bir maqsad bilan aytilgan ma'ruzalar bo'ladi. Shulardan biri - saylovga qatnashish kufr, degan so'zlarni tarqatish. Saylov bu - xalqning fikrini jamlab, o'sha fikrlardan xulosa qilishni aytiladi. Hamma o'z fikrini aytadi. Barchaning fikrini yig'ib, ko'pchilikning fikri qaysi tarafda bo'lsa, o'sha taraf fikri inobatga olinadi. Mana shuni saylov yoki saylash deyiladi. Bunda hech qanday kufrni yoki Allohning diniga nisbatan teskarilikni ko'rmaymiz. Bugungi kunda internet tarmoqlari orqali avval bunday gaplarni aytmagan toifalar yurtimizda yaqin kunlarda bo'lib o'tishi kutilayotgan saylovni e'tiboridan, o'sha joyda parokandalik, ixtilof va fitna chiqarish uchun shunday so'zlar tarqatmoqda. Bu narsaga aslo aldanmaslik kerak. Payg'ambarimiz sollallohu alayhi vasallamdan keyingi xalifalar ham saylandilar. Hazrati Abu Bakr Siddiq, hazrati Umar, hazrati Usmon, hazrati Ali roziyallohu anhumlarni sahobalar tasdiqladilar.
Bugungi kunda musulmonlar ziyrak bo'lishi kerak. Tinchlik osoyishtalikni ta'minotlaridan biri ham - saylov. El yurt saylaganni hech kim inkor qilmaydi, hurmat qiladi. Saylov bu - xalq fikrini jamlanmasi hisoblanadi va biz buni hurmat qilishimiz, to'g'ri talqin qilishimiz, xalqni manfaati uchun qilinayotgan ish ekanini yoshlarga tushuntirishimiz kerak. Chunki tashqi zalolat, tashqaridan jo'natilgan fitna oz bo'lsa ham farzandlarimizga o'z tasirini o'tkazadi.
Alloh Taolo yurtimizni hamisha tinch, osoyishta qilsin, barchalarimizni iymonda, islomda barqaror qilib, adashishdan ham adashtirishdan ham saqlasin!
O'zbekiston musulmonlari idorasi
Jizzax viloyat vakilligi matbuot kotibi
Usmonali OROLOV
Anjuman diniy sohada zamoniy kadrlar tayyorlash yo‘lidagi muhim qadam bo‘ldi
Joriy yilning 19-20 avgust kunlari bo‘lib o‘tgan nufuzli anjuman diniy ta’lim tizimini sifat jihatidan yangi bosqichga olib chiqish, ilmiy-tadqiqot ishlari ko‘lamini kengaytirish va sohaga ilg‘or pedagogik yondashuvlarni tatbiq etish va zamon talabiga mos kadrlar tayyorlashda yo‘lidagi salmoqli amaliy qadam bo‘ldi.
Tadbirlar davomida sohaga oid ilmiy ma’ruzalar bilan bir qatorda Oliy Majlis Qonunchilik palatasi, Raqamli ta’lim va sun’iy intellektni rivojlantirish markazi hamda ilmiy-tadqiqot sohasining yetakchi mutaxassislari tomonidan ma’naviy-ma’rifiy taraqqiyot, diniy ta’limda raqamli transformatsiya, sun’iy intellekt va ilmmetriya masalalariga bag‘ishlangan mahorat darslari ham o‘tkazildi. Mashg‘ulotlar tizimda zamonaviy yondashuvlarni ommalashtirish, dars jarayonlarida yangicha uslublarni qo‘llash hamda soha vakillarining kasbiy mahoratini oshirishga xizmat qiladi.
Shuningdek, anjuman doirasida oliy va o‘rta maxsus diniy ta’lim muassasalari professor-o‘qituvchilarining muhtaram Prezidentimizga yo‘llagan Murojaatnomasi o‘qib eshittirildi.
Unda so‘nggi yillarda diniy-ma’rifiy sohani tubdan rivojlantirish, milliy va diniy qadriyatlarimizni tiklash hamda ulug‘ ajdodlarimizning boy ma’naviy merosini o‘rganish va diniy ta’limni rivojlantirish borasida olib borilayotgan tarixiy islohotlar alohida e’tirof etildi. Jumladan, Mir Arab oliy madrasasi, Hadis ilmi maktabi, Imom Termiziy islom instituti kabi diniy ta’lim maskanlari, Imom Buxoriy, Imom Termiziy, Imom Moturidiy va Bahouddin Naqshband kabi xalqaro ilmiy-tadqiqot markazlari tashkil etilishi yurtimizda ma’rifat ahli uchun keng imkoniyatlar ochgani ta’kidlandi.
O‘z navbatida, pedagoglar ushbu yuksak e’tibor va shart-sharoitlar uchun Davlatimiz Rahbariga minnatdorlik bildirib, bunga javoban yoshlarni Vatanga muhabbat va umuminsoniy qadriyatlarga hurmat ruhida tarbiyalash, Islom dinining asl insonparvarlik g‘oyalarini o‘zlashtirgan va sohada yetuk kadrlarni tayyorlashini ta’kidladilar.
Bo‘lib o‘tgan anjuman diniy ta’lim tizimini yangi bosqichga olib chiqish, innovatsion va raqamli texnologiyalarni o‘quv jarayoniga tatbiq etish hamda sohada yuqori malakali, zamon bilan hamnafas mutaxassislarni tayyorlashda muhim poydevor bo‘lib xizmat qiladi.
O‘zbekiston musulmonlari idorasi Matbuot xizmati
- «
- »