Shu yil 28 noyabr' kuni O'zbekiston musulmonlari idorasi raisi, muftiy Shayx Nuriddin Holiqnazar hazratlari Tojikiston muftiysi Saidmukarram Abduqodirzoda janoblarini qabul qildilar. Martabali mehmonga Toshkent shahridagi "Ko'kaldosh" o'rta maxsus islom bilim yurti mudiri Abdulhakim qori Matqulov doimiy hamrohlik qilmoqda.

Samimiy suhbat chog'ida Shayx Nuriddin Holiqnazar hazratlari mehmonni yurtimizga tashrifi va xalqaro anjumanlardagi faol ishtiroki uchun minnatdorlik izhor etdilar. O'z navbatida Saidmukarram Abduqodirzoda taklif va yuqori darajada tashkil etilgan tadbirlar uchun tashakkur bildirdi.

Muloqotda tomonlar azal-azaldan bir-biriga yaqin qo'shni, qondosh-qarindosh ikki xalqning bir-biriga mehri hamisha osmon qadar baland ekanini ta'kidladilar. Shuningdek, ikki davlat rahbarlarining odilona va oqilona sa'y-harakatlari tufayli urf-odatlari, an'analari, qadriyatlari biri-biriga hamohang bo'lgan ikki xalqning hamjihatligi yanada mustahkam bo'layotgani e'tirof etildi.

Muftiylar muhim masalalarda fatvolar ishlab chiqish, dolzarb shar'iy masalalarga echim topish hamda Ramazon va ikki hayit kunlarini aniqlash, shuningdek, davrning o'tkir mavzularida turli uchrashuv va muloqotlar qilishga kelishib oldilar.

O'zbekiston musulmonlari idorasi raisi, muftiy Shayx Nuriddin Holiqnazar hazratlari va Tojikiston muftiysi Saidmukarram Abduqodirzoda janoblari Toshkent shahridagi "Ko'kaldosh" o'rta maxsus islom bilim yurti mudiri Abdulhakim qori Matqulovga doimiy hamrohlik davomida ko'rsatgan xizmatlari, mehmondorchiliklari hamda tashkiliy ishlarni eng yuqori darajada tashkil etganlari uchun chuqur minnatdorlik izhor etdilar.

O'zbekiston musulmonlari idorasi
Matbuot xizmati