Chiroyli hayot kechiray desangiz
Chiroyli hayot kechiray desangiz, yorqin kelajakka erishay desangiz, ba'zi hayotiy haqiqatlarni bilishingiz lozim! Ularni doim xotirangizda saqlashingiz hayotingizni Allohning izni bilan idora qilishingizda yordam beruvchi zaxira kuchini hosil qiladi.
Birinchi haqiqat: Siz eng go'zal hayot kechirishga, boshqalardan farqli bo'lgan insoniy munosabatlarni o'zingiz uchun qaror toptirishga haqli shaxssiz! Alloh sizni yaxshi yashashingiz, baxtli hayot kechirishingiz uchun yaratgan, sizni siylagan, qadringizni ko'targan. Bu Qur'oni karimning “Batahqiq, Biz insonni eng yaxshi suratda yaratdik”(Tiyn surasi, 4-oyat) oyatida namoyon.
Ikkinchi haqiqat: Hato ish sizni yomon odam qilib qo'ymaydi. Muvaffaqiyatsiz harakat sizni nodonga, bilmasvoyga chiqarmaydi. Bilingki, ichingizdagi his-tuyg'ularni, fikrlarni yuzaga chiqarish sizning eng katta huquqlaringizdan biridir!
Uchinchi haqiqat: Hozirgi zamonda barcha marralardan o'zib ketish faqatgina raqobatlashishning o'zi bilan amalga oshmaydi. Raqobatga ko'pchilik erisha oladi. Biroq yuksak cho'qqilarga chiqishdagi eng kuchli omil bu – hayotning barcha jabhalarida ustunlikka erishishdir.
To'rtinchi haqiqat: Qo'lingizda ko'p narsalarni amalga oshirish imkoniyati bor. Haqiqiy nogiron tanasi nogiron kishi emas, balki ichki iste'dodlar va yashirin imkoniyatlarni idrok qilolmaslik haqiqiy nogironlikdir!
Beshinchi haqiqat: Sizning asosiy jangingiz aslo-aslo dushmanlaringiz bilan bo'lmaydi, sizga tuzoq qo'yadiganlar bilan ham bo'lmaydi. Haqiqiy jang – siz va hoyu-havaslaringiz, ba'zi ishlarda bilimsizligingiz o'rtasida bo'ladi. Chunki aynan shu narsalar bir joyda qotib qolishga, yuksalmaslikka asosiy sababdir. Shubhasiz mufaqqiyatga erishishdagi eng muhim me'yor – avvalo o'zingizga hukmron bo'lishingiz va nafzingizni egaridan tutishingizdir. Bilingki, nafsingiz istagan narsani unga beraversangiz, undan qutilish xuddi emizikli bolani ko'krakdan chiqarishdek qiyin bo'lib qoladi.
Oltinchi haqiqat: Hayotingizdagi hech bir narsa besh yil o'tib o'zidan-o'zi o'zgarib qolmaydi. Uning uchun avvalo qabul qilish manbalaringiz o'zgarishi lozim. Bu yana asosan o'qib-o'rganayotganlaringiz, kimlar bilan hamsuhbat bo'layotganingizga qarab ham bo'ladi.
Yettinchi haqiqat: Ishning boshi o'zingizga taqaladi, xayolingizda o'zingizni qanday tasavvur qilishingizga kelib taqaladi. U yo sizni tog'ning cho'qqisiga olib chiqadi, yo bir kichik tepalikka ko'taradi. O'zingizni qiymatli, ko'p ish qilishga qodir deb ko'rsangiz haqiqatan ham shunday bo'ladi. Aksini ko'rsangiz aksi bo'ladi!
Sakkizinchi haqiqat: O'zgarishning ham, o'zgarmaslikning ham badali bor, yo o'zgarish uchun pul to'laysiz, yo o'zgarmaslik uchun pul to'laysiz. Gap shundaki, o'zgarishning natijasi tez hosil bo'ladi, o'zgarmaslikning natijasi esa ancha sekin yuzaga chiqadi! Oqil odam – ertaga rohatlanishi uchun bugun o'zini charchatgan kishidir.
To'qqizinchi haqiqat: Hayot eldek o'tib ketaveradi, ishlar ham kun sayin chigallashib boraveradi. Baxtli odamlar har bir lahzadan zavq oladigan kishilardir. Ular shodlik lahzalarini aslo o'tkazib yubormaydilar. Dam olishga, zavqlanishga vaqt topolmagan odam alal-oqibat vaqtini kasallik bilan o'tkazishi muqarrar!
O'ninchi haqiqat: Oqil odam daryodan o'tish uchun qayiq yasaydi, daryoning to'lqini menga zarar bermasin deb, o'zini himoyalash uchun to'g'on qurib o'tirmaydi. Bu nodon kishining ishidir!
Doktor Hasson Shamsi Poshoning "Metin qoyalar" kitobidan
G'iyosiddin Habibulloh, Ne'matulloh Isomov tarjimasi.
Pol Kapur: «Bu yerda tarixni nafaqat ko‘rasiz, balki uni his qilasiz»
AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur O‘zbekistondagi Islom sivilizatsiyasi markaziga tashrif buyurdi, xabar bermoqda iccu.uz.
Islom sivilizatsiyasining ko‘p asrlik tarixi, uning ilm-fan, madaniyat va ma’rifat taraqqiyotiga qo‘shgan ulkan hissasi O‘zbekistondagi Islom sivilizatsiyasi markazi ekspozitsiyalarida yaxlit va ta’sirchan tarzda namoyon etilgan. Tashrif davomida Samir Pol Kapur islomgacha bo‘lgan davr sivilizatsiyalaridan tortib, Yangi O‘zbekiston davriga qadar bo‘lgan tarixiy jarayonlarni aks ettiruvchi galereyalar, buyuk allomalarning ilmiy-ma’rifiy merosi, noyob qo‘lyozmalar, muqaddas yodgorliklar hamda zamonaviy raqamli texnologiyalar asosida yaratilgan interaktiv ekspozitsiyalar bilan yaqindan tanishdi.
Mehmon ekspozitsiyalarning mazmunan izchilligi va tarixiy jarayonlarni bir-biri bilan uzviy bog‘liq holda namoyon etish usuliga alohida e’tibor qaratdi. Uning qayd etishicha, bu yerda muzey eksponatlari orqali o‘tmish haqida ma’lumot olish bilan cheklanib qolmay, tarixiy davrlar ruhini his qilish, ular o‘rtasidagi bog‘liqlikni anglash imkoni ham mavjud.
Samir Pol Kapur o‘z taassurotlarini quyidagicha ifodaladi:
«Bu muhtasham maskan. Islom tarixi va madaniyatining asrlar davomidagi taraqqiyoti bilan yaqindan tanishish men uchun unutilmas tajriba bo‘ldi. Bu yerda tarixni shunchaki kitob sahifalari orqali emas, balki o‘z ko‘zingiz bilan ko‘rasiz, uni his qilasiz va go‘yo o‘sha davrlarning ichida bo‘lasiz. Shu bois ushbu noyob maskanni barpo etishga hissa qo‘shgan barcha insonlarga samimiy minnatdorchilik bildiraman.
Yoshlarga ham bu yerga kelishni albatta tavsiya qilaman. Chunki bu maskan nafaqat tarixni o‘rganish, balki o‘tmish bilan kelajak o‘rtasidagi uzviy bog‘liqlikni anglash imkonini beradi. Men uchun eng esda qolarli lahzalardan biri Qur’oni karimga bag‘ishlangan golografik namoyish bo‘ldi. U menda katta taassurot va hayajon uyg‘otdi.
Menimcha, bu dargoh islom sivilizatsiyasining jahon tamadduniga qo‘shgan ulkan hissasini butun dunyoga namoyon etishga xizmat qiladi. Shuning uchun har bir inson bu yerga tashrif buyurib, ana shu boy va bebaho meros bilan shaxsan tanishishi lozim».
Pol Kapurning fikricha, Markazning ahamiyati uning tarixiy merosni namoyon etish bilangina cheklanmaydi. Ushbu maskan yosh avlod uchun o‘tmish saboqlarini anglash, ilm-fan va ma’rifatning sivilizatsiya taraqqiyotidagi o‘rnini his etish, milliy va umuminsoniy qadriyatlarga hurmat ruhini shakllantirish uchun ham muhim ma’naviy-ma’rifiy maydon vazifasini o‘taydi.
Tashrif yakunida AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur Islom sivilizatsiyasi markazidan olgan taassurotlari yuksak ekanini qayd etib, ushbu maskan boy tarixiy merosni zamonaviy muzey texnologiyalari va ta’sirchan taqdimot usullari orqali jahon jamoatchiligiga yetkazishda muhim ahamiyat kasb etishini ta’kidladi.
O‘zbekiston musulmonlari idorasi Matbuot xizmati
