Ekstremizm va terrorizmning jamiyat barqarorligiga tahdidi
Dunyoda osoyishta muhitni izdan chiqarishga qaratilgan vayronkor g'oyalarning yangidan yangi shakllari paydo bo'layotgani har daqiqa ogoh bo'lishni talab qiladi.
Yaratilgan imkoniyatlardan unimli foydalanish, jamiyat ravnaqiga xizmat qilish o'rniga buzg'inchilikni kasb qilgan,o'z vatani, xalqiga xiyonat qilishdan toymaydigan kimsalar afsuski oramizda bor. Ularning aqidaparastlik, mutaassiblik yo'lida dindan niqob sifatida foydalanayotgani, natijada botil yo'lga kirib, zalolatga ketayotgani achinarli hol.
Islom dini tinchlik dinidir. Uning bosh g'oyasi tinch-totuv hayot kechirishdan iborat. Tinchlik insoniyatga in'om etilgan eng ulug' ne'matdir.
Alloh taolo Baqara surasining 208-oyatida shunday marhamat qiladi: ”Ey iymon keltirganlar! Barchangiz yoppasiga tinchlik ishiga kirishingiz!”.
Payg'ambarimiz sollallohu alayhi vasallam: “Tinchlik va xotirjamlik ikki ulug' ne'matdirki, bundan ko'p odamlar bebahradirlar”, deb marhamat qilganlar.
Shiddat bilan rivojlanayotgan bugungi zamonda internet tarmog'i yovuzlik quroliga aylanib qolayotgani haqiqat. Unda targ'ib qilinayotgan g'arazli ma'lumotlar, vayronkor g'oyalar, hayosizlik kabi illatlar ayniqsa, yoshlar ongiga salbiy ta'sir ko'rsatishi mumkin . Binobarin, ota-onalar, ustoz-murabbiylar bu borada mas'uliyatli bo'lishlari zarur .
Yot oqimlar ta'siridagi kimsalar o'z qilmishlarini din yo'lida kurash, deb xaspo'shlashga urinadi. Unutmaylikki, Islom dini hech qachon yovuzlikka buyurmaydi.
N.Hidirov “Ko'k to'nli bobo” jome masjidi imom xatibi
“Em Insight”: Toshkentdagi xalqaro mediaforum islom sivilizatsiyasining zamonaviy qiyofasini namoyon etdi
Britaniyaning “Em Insight” jurnalida O‘zbekistonda bo‘lib o‘tgan “Islom sivilizatsiyasi: yangi nigoh, yangi kashfiyotlar” mavzusidagi xalqaro mediaforumga bag‘ishlangan maqola e’lon qilindi, deb xabar bermoqda “Dunyo” AA.
Nashrda yozilishicha, O‘zbekiston Islom sivilizatsiyasi markazi tomonidan tashkil etilgan “Islom sivilizatsiyasi: yangi nigoh, yangi kashfiyotlar” xalqaro mediaforumi xorijlik OAVda katta qiziqish uyg‘otgan.
Raqamli platformalar, sun’iy intellekt va axborot xurujlari avj olgan hozirgi zamonda ommaviy axborot vositalarining mamlakatlar, madaniyatlar va sivilizatsiyalar haqidagi tasavvurlarni shakllantirishdagi o‘rni tobora ortib bormoqda.
Maqolada ta’kidlanishicha, Al-Xorazmiy, Ibn Sino, Beruniy, Imom Buxoriy, Imom Termiziy va Mirzo Ulug‘bek kabi jahon ilm-fani rivojiga beqiyos hissa qo‘shgan buyuk mutafakkirlar yurti bo‘lmish O‘zbekiston bu kabi global muhokamalar uchun eng maqbul maydondir.
Qatarning “The Peninsula” gazetasi mas’ul muharriri Muhammad Osmon forumning raqamli axborot asridagi ahamiyatiga to‘xtalib, Imom Buxoriyning hadislarni to‘plash va ularning haqqoniyligini tekshirishdagi qat’iy yondashuvini tilga oldi.
U ushbu metodologiyani manbalarni chuqur o‘rganish va verifikatsiya qilishning o‘chmas namunasi deb atadi va bu tamoyillar feyk xabarlar hamda sun’iy intellekt mahsulotlari ko‘paygan hozirgi davrda juda ahamiyatli ekanini bildirdi.
O‘zbekiston Milliy axborot agentligi muharriri O‘tkir Alimov forumning Mustaqillikning 35 yilligi ostonasida o‘tkazilayotganiga e’tibor qaratgan. U 50 mamlakatdan 300 ga yaqin OAV vakillarining Toshkentda jamlangani O‘zbekistonning sivilizatsiyalar chorrahasi sifatidagi o‘rni ortib borayotganidan dalolat berishini ta’kidladi.
Maqolada Toshkentdagi xalqaro mediaforum jurnalistika mas’uliyati, tarixiy tadqiqotlar chuqurligi va zamonaviy texnologiyalar imkoniyatlarini birlashtirgan holda Islom sivilizatsiyasini yangi, zamonaviy qiyofada dunyoga tanitishga xizmat qilishi bayon etilgan.
O‘zbekiston musulmonlari idorasi Matbuot xizmati
