Rivoyat qilinishicha chanqoqdan sillasi qurigan to'rtta aka-uka elib-yugurib suv qidirib yurishgan ekan. Yo'llari davomida to'rtta daraga duch kelibdilar va har birlari alohida yo'ldan yurishga, kim suv topsa qolganlarga olib borishiga hamda natija qanday bo'lishidan qat'i nazar quyosh botguncha qaytib kelishga kelishishibdi.

Biroq hech qaysilari bir tomchi ham suv topa olishmabdi.

Quyosh botgach, ulardan uchtasi qaytibdi va suv qidirish befoydaligini, undan ko'ra turgan joylarini qazib suv chiqargan yaxshi, degan to'xtamga kelishibdi. Tuni bo'yi qazib, oxiri tongga yaqin suv chiqarishga muvaffaq bo'lishibdi va hammalari undan ichib chanqoqlarini qondirishibdi.

Bu voqeani hikoya qilib bergan odam aytadi: “Kelishilgan vaqtda ortga qaytmagan va jamoatdan ajragan to'rtinchi uka hali hanuz suv izlab yurar emish!”.

Nabiy sollallohu alayhi vasallam aytadilar: “Jamoatni lozim tutinglar, bo'linishdan saqlaninglar. Chunki shayton yolg'iz odamga yopishadi, ikkita odamdan uzoqlashadi. Kim Jannat farovonligini istasa, jamoatni mahkam tutsin!”.

Rasululloh sollallohu alayhi vasallam yana aytadilar: “Alloh taolo ummatimni zalolat uzra jamlamaydi. Allohning yordami jamoat bilandir!”.

Siz qilayotgan ishingizdan rohat topsangiz, boshqalar ham sizning qo'l ostingizda bu ishdan rohat topishadi.

Holidan xabar olishga mas'ul bo'lgan odamlaringizdan boxabar bo'ling, ularga yaxshi muomala qiling. Axir o'zingiz ham sizga mas'ul shaxslarning e'tiborini kutasiz-ku, yaxshi muomala qilishini xohlaysiz-ku! Qattiqqo'llik zararlidir, faqat o'zingizga qattiqqo'l bo'lishingiz foyda berishi mumkin.

Bizdagi achinarli holatlardan biri shuki, ko'pchiligimiz bir-birimizga yordam berishga harakat qilmaymiz, jamoaviy ishlarda hamjihat bo'lmaymiz.

Modomiki, egoistlik, xudbinlik ichimizda hukm surar ekan, jamiyatimiz rivojlanmaydi, aksincha tanazzulga yuz tutib boraveradi.

Oramizda ba'zi odamlar hamma narsa o'ziniki bo'lishini, faqat o'zi boshliq bo'lishini xohlaydi. Kimningdir qo'l ostida bo'lishni xohlamaydi.

Faqat o'zining fikri olinishini istaydi. Biz bu og'riqli darddan qachon xalos bo'lamiz?!

Doktor Hasson Shamsi Poshoning "Metin qoyalar" kitobidan

G'iyosiddin Habibulloh, Ne'matulloh Isomov tarjimasi.