26 noyabr' kuni Buxoroi sharifda Mir Arab madrasasining 500 yilligiga bag'ishlangan “Boqiy Buxoroning islom tsivilizatsiyasidagi o'rni” mavzuidagi xalqaro anjuman bo'lib o'tdi. Unda Halqaro musulmon ulamolar kengashi va Abu Dabi Tinchlik forumining obro'-e'tiborli ulamolari, O'zbekiston, Misr, Ozarbayjon, Qozog'iston, Tojikiston, Turkmaniston singari mamlakatlar muftiylari, taniqli ulamolar, islomshunos tadqiqotchi va diniy soha vakillari (“Mir Arab” madrasasi bitiruvchilari) ishtirok etdi.

Anjuman Qur'oni karim tilovati va xayrli duolar bilan ochildi.

Nufuzli tadbirni Imom Buxoriy nomidagi Toshkent islom instituti rektori, siyosiy fanlar doktori, professor, Muhammadolim Muhammadsidiqov olib bordi.

Yig'ilish avvalida ta'kidlanganidek, Buxoro asrlar davomida o'zining boy ilmiy merosi, islom ilm-fani rivojiga qo'shgan ulkan hissasi, madrasalari, ta'lim tizimi bilan Islom dunyosida katta shuhrat qozongani, Mir Arab Buxoroning dunyoga dong taratgan madrasalaridan biridir, shubhasiz. Shu ma'noda ushbu mo''tabar dargohning faoliyat boshlaganiga hijriy yil hisobi bo'yicha 500 yil to'lishi munosabati bilan bu muhim sana xalqaro miqyosda nishonlanmoqda.

Nufuzli anjumanning asosiy qismida Islom olamining obro'-e'tiborli ulamolari hamda islomshunos tadqiqotchilari uch sho''baga bo'lingan holda “Buxoro allomalari ilmiy merosining ahamiyati”, “Mir arab madrasasi tashkil topganining 500 yilligi: o'tmish va hozirgi zamon”, “Boboxonovlar sulolasining islom dinini saqlash, targ'ib va himoya qilishga qo'shgan hissasi” kabi mavzulari bo'yicha ma'ruzalar qilishdi. Shuningdek, mavzu doirasida muhim vazifalar, taklif va fikr-mulohazalar bildirildi.

So'zga chiqqan notiqlar O'zbekistonda so'nggi yillarda diniy-ma'rifiy sohada amalga oshirilgan islohotlar, o'zgarishlar va erishilgan yutuqlarni yuqori e'tirof etib, yurtimizda tashkil etilgan ilmiy-tadqiqot muassasalarining faoliyatiga ijobiy baho berdi. Hususan, Mir Arab madrasasining faoliyatini yuqori baholab, tarixdan O'zbekiston zaminidan ulkan allomalar etishib chiqishiga ushbu ta'lim dargohi katta hissa qo'shganini ta'kidlab o'tdilar. Anjuman qatnashchilari mazkur madrasa talabasi bo'lganlaridan g'ururlanishlarini aytib, madrasa ularning hayotida o'chmas iz qoldirganini ta'kidlashdi.

Halqaro anjumandagi ma'ruzalar, bildirilgan fikr-mulohazalardan kelib chiqqan holda o'zaro ilmiy xulosalar almashildi hamda kelgusida shu kabi tadbirlarni hamkorlikda o'tkazishga kelishib olindi.

O'zbekiston musulmonlari idorasi
Matbuot xizmati