Diniy imkoniyatlar...
Taraqqiyotimizning rivojlanayotgan bosqichida yangi O'zbekistonda diniy qadriyatlarni tiklash va asrab-avaylashga qaratilgan ko'plab hukumat qarorlari qabul qilinib, hayotga joriy qilinmoqda.
Buyuk allomalarimizning ziyoratgohlari tiklanib, ularning ilmiy meroslari o'rganishga keng e'tibor qaratilmoqda. So'nggi yillarda Imom Buxoriy, Imom Termiziy, Imom Moturidiy, Abu Muin Nasafiy, Hakim Termiziy, Abduxoliq G'ijduvoniy, Burhoniddin Marg'inoniy, Bahouddin Naqshband, Suzuk ota kabi allomalarimiz nomlari bilan bog'liq qadamjolar obodonlashtirildi.
Shuningdek, Namangan viloyatidagi “Sulton Uvays Qoraniy”, Mavlono Aliyyul qori va “G'oyibbuva” nomidagi masjid-majmualarining yangi binolarining oichlishi hamda Isoqxon to'ra Ibrat nomli muzey, ilmiy maktab va bog' barpo etilishi yurtdoshlarimizning yanada quvonchiga quvonch bag'ishladi.
Ayniqsa, “Hidoya” o'rta maxsus islom bilim yurtining jahon andozalariga to'la mos keladigan yangi o'quv binosi, anjumanlar zali va sport kompleksi binolarining foydalanishga topshirilishi viloyat ahlining qalbini surur bilan nurafshon etdi.
Yurtimiz va musulmon dunyosidan etishib chiqqan ulug' mutafakkir va allomalarning boy merosi, ularning jahon tsivilizatsiyasi, ilm-fan taraqqiyoti rivojiga qo'shgan bebaho hissasini chuqur tadqiq etish va keng targ'ib qilish imkoniyatlari yaratildi.
O'zbekiston xalqaro islom akademiyasi, O'zbekistondagi Islom tsivilizatsiyasi markazi, Imom Buxoriy, Imom Termiziy, Imom Moturidiy xalqaro ilmiy-tadqiqot markazlari, Hadis ilmi maktabi va Mir Arab oliy madrasasi kabi yangi muassasalarning tashkil etilgani, hadis, kalom, fiqh va tasavvuf maktablariga asos solingani, o'nlab yangi masjidlar ochilayotgani bu boradagi ishlar ko'lami nechog'li keng ekanidan dalolat beradi.
“Jaholatga qarshi ma'rifat” ulug'vor g'oyasi asosida dinning asl insonparvarlik mohiyatini, ezgulik, tinchlik va insoniylik kabi fazilatlar azaliy qadriyatlarimiz ifodasi ekanligini keng yoritish va bu sohadagi ilmiy-ma'rifiy faoliyatni jadal tashkil etish yo'lga qo'yildi.
Islom an'analariga xos mehr-shavqat, sahovat va xayriya ishlarini kuchaytirish, diniy soha xodimlarini rag'batlantirish kabi ezgu maqsadlarda O'zbekiston musulmonlari idorasi huzurida “Vaqf” xayriya jamoat fondi tashkil etildi.
Sayt va ijtimoiy tarmoqlarda islom dini ma'rifati mavzularini keng yoritishda erkinlik ta'minlanishi barobarida salmoq va sifat ham sezilarli darajada oshdi.
Mo'min-musulmonlarning diniy savollariga o'z vaqtida tezkor javob berish maqsadida, koll-markaz, telegram bot va alohida fatvo.uz sayti ishga tushirildi.
Alloh taolo qur'oni karimda:
“Agar (bergan ne'matlarimga) shukr qilsangiz, albatta, (ularni yanada) ziyoda qilurman…”,- deb ta'kidlagan (Ibrohim surasi 7-oyat).
Inson o'zidagi ne'mat haqida mulohaza yuritishi, shu ne'matdan o'zgalar ham bahramand yoki bebahra ekanligini o'ylab ko'rishi bilan uning qadrini anglaydi.
Bu esa yanada ko'proq Allohga shukr qilishga undaydi.Albatta, bu Alloh taologa xush keladi. Natijada ne'matning yanada ziyoda bo'lishiga sabab bo'ladi.
Alloh taolo barchamizga yuqoridagi kabi ne'matlarning qadriga etish, uning uchun shukrlar aytib, uni yanada mustahkam va bardavom bo'lish yo'lida savobli amallarni qilishimizni nasibu ro'zi aylasin!
Abdulhay TURSUNOV,
O'zbekiston musulmonlari idorasining
Namangan viloyat vakili
Diniy ta’limda yangi bosqich: Toshkentda nufuzli anjuman bo‘lib o‘tmoqda
Toshkent shahridagi Islom sivilizatsiyasi markazining Katta majlislar zalida O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» mavzusidagi I ilmiy-amaliy anjumani boshlandi.
O‘zbekiston musulmonlari idorasi tarixida ilk bor o‘tkazilayotgan ushbu nufuzli tadbirda Prezident maslahatchisi Muzaffar Komilov, Din ishlari bo‘yicha qo‘mita raisi Sodiqjon Toshboyev, muftiy Shayx Nuriddin Xoliqnazar hazratlari, Islom sivilizatsiyasi markazi direktori Firdavs Abduxoliqov, shuningdek, diniy ta’lim muassasalari rahbarlari, bosh imom-xatiblar va OAV vakillari ishtirok etmoqda. Anjumanga jami 700 nafarga yaqin pedagog va soha vakillari jalb etilgan bo‘lib, ularning 300 nafari bevosita zalda, 400 nafari esa hududlardan videoselektor orqali qatnashmoqda.
So‘zga chiqqan notiqlar so‘nggi yillarda Prezidentimiz tashabbuslari bilan diniy-ma’rifiy sohani takomillashtirish va zamonaviy kadrlar tayyorlash borasida amalga oshirilayotgan tizimli islohotlarga to‘xtalib o‘tmoqda. Ta’kidlanganidek, Mir Arab oliy madrasasi, Hadis ilmi maktabi, Imom Termiziy islom instituti va madrasasi hamda 4 ta xalqaro ilmiy-tadqiqot markazining tashkil etilishi ilm ahliga keng imkoniyatlar eshigini ochdi. Toshkent islom institutida magistratura ochildi, tizimdagi 510 nafar pedagogning 50 nafardan ortig‘i PhD va DSc ilmiy darajalariga ega bo‘ldi.
Shuningdek, yurtimizdagi diniy ta’lim muassasalariga Misrning Al-Azhar majmuasi ustozlari jalb etildi. 90 ta fan dasturi va yangi avlod darsliklari yaratildi. Mir Arab, Xadichai Kubro, Hidoya va Ko‘kaldosh madrasalari zamonaviy binolarga ega bo‘lib, Iordaniya, Misr va Birlashgan Arab Amirliklarining yetakchi oliy ta’lim muassasalari bilan hamkorliklar rivojlanmoqda.
Ushbu nufuzli anjumandan ko‘zlangan maqsad ham professor-o‘qituvchilar uchun ilmiy-amaliy muloqot maydonini yaratish, pedagoglarning kasbiy salohiyatini yuksaltirish, ta’lim jarayoniga raqamli va innovatsion usullarni keng joriy etishdir.
O‘zbekiston musulmonlari idorasi Matbuot xizmati
