Eng yirik islom markazi
2025 yili Checheniston poytaxti Grozniyda Muso payg'ambar nomidagi ilmiy-ma'rifiy islom markazini ochish rejalashtirilgan. Bu haqda Checheniston madaniyat vaziri o'rinbosari Mamed Madayev “IslamNews”ga ma'lum qildi.
“Grozniy shahrida ko'plab islomiy majmualar, masjidlar, hofizlik maktablari qurilgan va hozirda ham qurilmoqda. 2025 yilda Rossiyadagi eng yirik ilmiy-ma'rifiy islom markazi ochiladi”, dedi u Grozniyning madaniyat poytaxti taqdimoti chog'ida.
Mazkur islom markazi hududida Rossiyaning eng yirik ilmiy-ma'rifiy majmuasi va masjidi quriladi. Shuningdek, uning tarkibida kutubxona va sinfxonalar, qadimiy qo'lyozmalarini tiklash uchun tadqiqot bo'limlari tashkil etiladi.
O'zbekiston musulmonlari idorasi
Matbuot xizmati
Makkada Qur’oni karim bo‘yicha xalqaro musobaqa boshlandi
Makkada Qur’oni karimni yod olish, o‘qish va sharhlash bo‘yicha 46-xalqaro tanlov boshlandi.
IQNA "Saudi Gazette" nashriga tayanib xabar berishicha, payshanba kuni Makkada Qur’oni karimni yod olish, o‘qish va sharhlash bo‘yicha qirol Abdulaziz nomidagi 46-xalqaro tanlov boshlandi.
Oltinchi rabiulavvalga (19 avgustga to‘g‘ri keladi) qadar davom etadigan musobaqada 133 mamlakatdan jami 334 nafar erkak va ayollar ishtirok etmoqda, bu ushbu musobaqa tarixidagi eng katta vakillikdir.
Musobaqaning maqsadi "musulmon yoshlarni Qur’oni Karimni yod olish, anglash va mushohada qilishga undash, shuningdek, halol raqobatni yaratishdan iborat."
Tanlov beshta toifani o‘z ichiga oladi va umumiy sovrinlar miqdori 10 260 000 Saudiya rialini tashkil etadi - bu tanlov ta’sis etilganidan beri eng yuqori sovrin jamg‘armasi.
Avvalroq ushbu musobaqada O‘zbekiston sharafini quyidagilar himoya qilishi xabar qilingandi:
Muhammadabror qori Yunusxonov («Mir Arab» o‘rta maxsus islom bilim yurti talabasi) — (To‘liq Qur’on hifzi);
Muhammadamin qori Olimjonov («Sayyid Muhyiddin maxdum» o‘rta maxsus islom bilim yurti talabasi) — (15 pora hifzi);
Zilolaxon Farhodova (Imom Buxoriy nomidagi Toshkent islom instituti talabasi) — (To‘liq Qur’on hifzi);
Muxtasarxon Muhammadjonova («Xadichai Kubro» ayol-qizlar o‘rta maxsus islom bilim yurti talabasi) — (15 pora hifzi).
O‘zbekiston musulmonlari idorasi Matbuot xizmati
