Ikki hamd ila Allohning roziligi
Alloh taolo o'z bandalariga mehribon va rahmli Zotki, kichik amallarga ham ulkan ajr-mukofot beradi. Ikki marta "Alhamdulillah" deyishi tufayli bandasidan rozi bo'ladigan Zot naqadar saxovatlidir!
Anas ibn Molik roziyallohu anhudan rivoyat qilinadi: «Rasululloh sollallohu alayhi va sallam: "Banda ovqat eb, ortidan hamd aytsa yoki ichimlik ichib, hamd aytsa, Alloh (u) bandasidan rozi bo'ladi", dedilar» (Imom Muslim rivoyati).
Allohning roziligi esa ulkan mukofotdir. Qur'oni karimda: «...Allohning roziligi esa, hamma narsadan ulug'roqdir. Mana shu Buyuk saodatdir» (Tavba surasi, 72-oyat), deyilgan.
"Sanoqli daqiqalarda tog'day savoblar" kitobidan.
35 bolaning sunnat to‘yi o‘tkazib berildi
Mustaqilligimizning 35 yilligi arafasida Chirchiq shahrida kam ta’minlangan hamda boquvchisini yo‘qotgan oilalar farzandlariga quvonch ulashishga qaratilgan saxovat tadbiri o‘tkazildi.
Toshkent viloyati bosh imom-xatibi Doniyor domla Ikromov tadbirda ishtirok etib, bolajonlarga samimiy tilaklar bildirdi.
«Vaqf» xayriya jamoat fondi Toshkent viloyati filiali ko‘magida 35 nafar bolaning har biriga velosiped va turli sovg‘alar berildi. Shuningdek, tadbirda saxovatpesha homiylar tomonidan bayramona dasturxon yozilib, bolajonlar uchun ko‘ngilochar va bayramona dastur tashkil etildi.
Bunday xayrli tashabbuslar yurtimizda inson qadri, oila va bolalar manfaatlariga yuksak e’tibor qaratilayotganining yana bir amaliy ifodasidir.
Saxovat tadbiri bolajonlarga unutilmas quvonch bag‘ishlab, ularning qalbida Vatanga muhabbat va ertangi kunga ishonch tuyg‘ularini yanada mustahkamlashga xizmat qildi.
Toshkent viloyati vakilligi Matbuot xizmati
