SURIYaDA JIHOD BORMI?
CAVOL: Men Tojikistondanman. Islomni o'rganib, unga amal qilishga harakat qilaman.
Men Suriya haqida so'ramoqchi edim. Internetda ba'zi o'zbek olimlari Suriyada jihod bor, kim inkor etsa fosiq, munofiq deb, chaqiryaptilar. Siz bunga nima deysiz?
JAVOB: Bismillahir Rohmanir Rohim. Internetdagi da'vatchilar ma'ruzalarida jihod hamma uchun farz ekani haqida so'z yuritadi. Aslida, jihod ikki qismdan iborat:
1. Talab jihodi – farzi kifoya. U hozir yo'qligiga ulamolar ittifoq qilishgan. Chunki, hozirda davlatlar o'rtasida tinchlik bitimi mavjud bo'lib, urushmaslikka kelishilgan.
2. Mudofaa jihodi – farzi ayn. U dushmanlar musulmonlar yashaydigan yurtga urush qilib, bostirib kirsa, himoya uchun farz bo'ladi.
Ma'lumki, jihodning o'ziga yarasha qoidalari bor. Birinchidan, jihodga safarbar qilish uchun “Halifa” bo'lishi lozim.
Vaholanki, xalifalik masalasi tarixda qolgani barchaga ma'lum. Qolaversa, jihod joriy bo'lishi uchun ummatning ijmosi ham talab etiladi. Bular chaqirayotgan “jihod”ga Islom ummatining deyarli barchasi qarshi ekani kundek ravshan.
Bugungi kunda jihodga targ'ib qilayotgan guruhlar qaysi siyosiy kuchlarga xizmat qilayotganlarini o'zlari ham bilmaydi.
Payg'ambarimiz sallallohu alayhi vasallam: “Kim noma'lum bayroq ostida jang qilsa va bu yo'lda o'ldirilsa, demak, u johiliyat o'limini topibdi” deb aytganlar. Ya'ni, kimki noma'lum bayroq ostida, uni kimning qo'lida ekanini, uning maqsadi qandayligini bilmagan holda jang qilsa va bu yo'lda o'lsa u johiliyatda o'lgandek bo'ladi.
Dinimiz hatto urush ostida bo'lgan va dushman zaminlarida yashagan, lekin jangovorlik sifatiga ega bo'lmagan insonlarning o'ldirilishiga ham ruxsat bermaydi.
Jihodga chaqirayotganlarning aksariyat xalqi musulmon bo'lgan o'lkalarda begunoh insonlar o'ldirilayotgan, nishonga olinayotgan hujumlarga shar'an ruxsat ko'zi bilan qarashi juda achinarlidir.
“Niso” surasining 93-oyatida bir mo'min kishini qasddan o'ldirganlar jahannam azobiga duchor bo'lishi xabar berilgan.
Payg'ambarimiz sallallohu alayhi vasallam bu haqda “Dunyoning yo'q bo'lib ketishi Alloh nazdida bir mo'minning nohaq o'ldirilishidan ko'ra engilroqdir” deb, bu jinoyatning oqibati qancha yomon ekaniga ishora qilmoqdalar (Ibn Moja r.a.rivoyati).
Buzg'unchi toifalar o'zlariga tegishli veb-sahifa va ijtimoiy tarmoqlarda “shahidlik”, “jihod”, “hijrat”, “takfir”, “xalifalik” kabi tushunchalarni buzib talqin qilish natijasida ayrim yoshlarni o'zlarining tuzoqlariga ilintirishga muvaffaq bo'lishayotgani achinarli hol, albatta.
Mashhur olim, marhum Muhammad Said Ramazon Butiy rahimahulloh aynan nizoli hududlarni ichida bo'lgan va terrorchilar xususida shunday degan edilar: “Ular bir vaqtning o'zida biror aybi yo'q musulmonlarni kechasi bo'g'izlab ketishni “shariat ruxsat bergan ish” deydilar. Ular oddiy yo'lovchilar to'la samolyotni ichidagi aybsiz insonlar bilan qo'shib portlatib yuborishni ham “shariatda bor ish” deydilar.
Har kim ko'zlarini yumib, Rasululloh sallallohu alayhi va sallam bugun oramizda yuribdilar, deb xayol qilsin. Ul zot shunday razil ishlarga rozi bo'larmidilar?!”
Dinimizda begunoh inson qonini to'kish buzg'unchilikning eng ulkan ko'rinishi hisoblanadi. Islom hatto chumoliga ham ozor berishdan qaytaradi. Bunday vahshiylikni qilayotganlar dindorlik haqida qancha lof urmasin, qilgan yovuzliklari bu da'volari soxta ekanini fosh etmoqda. Vallohu a'lam.
O'zbekiston musulmonlari idorasi Fatvo hay'ati.
“Oman Daily”: O‘zbekiston islom sivilizatsiyasi merosini xalqaro maydonda keng targ‘ib qilmoqda
O‘monning “Oman Daily” nashrida Toshkent shahrida bo‘lib o‘tgan “Islom sivilizatsiyasi: yangi nigoh, yangi kashfiyotlar” xalqaro mediaforumiga bag‘ishlangan maqola e’lon qilindi, deb xabar bermoqda “Dunyo” AA.
Nashrda yozilishicha, anjumanda dunyoning 50 dan ortiq davlatidan 300 nafarga yaqin jurnalist, tadqiqotchi, noshir, kinorejissyor va texnologiya sohasi mutaxassislari ishtirok etdi.
Tadbir qatnashchilari Islom sivilizatsiyasining tarixiy-madaniy merosini zamonaviy media vositalari orqali xalqaro auditoriyaga keng targ‘ib qilish masalalarini atroflicha muhokama qildi.
Maqolada O‘zbekistonning Islom sivilizatsiyasi rivojiga qo‘shgan hissasi, xususan, Al-Xorazmiy, Ibn Sino, Imom Buxoriy, Mirzo Ulug‘bek va Amir Temur kabi buyuk tarixiy shaxslarning boy ilmiy va madaniy merosi alohida e’tirof etilgan.
Shuningdek, Toshkent shahrida qad rostlagan Islom sivilizatsiyasi markazining ushbu tarixiy boylikni atroflicha o‘rganish, asrab-avaylash va xalqaro maydonda tizimli targ‘ib qilishdagi strategik ahamiyatiga alohida e’tibor qaratilgan.
Forum doirasida qadimiy Qur’on qo‘lyozmalari, tarixiy xaritalar, hujjatli filmlar hamda innovatsion raqamli loyihalar taqdimoti bo‘lib o‘tdi. Anjuman ishtirokchilari Islom sivilizatsiyasi haqidagi xalqaro media kontentida mavjud bo‘lgan muayyan stereotiplarni bartaraf etish, uning jahon ilm-fani, madaniyati va umuminsoniy taraqqiyotga qo‘shgan bebaho hissasini xolis hamda keng qamrovli yoritish zarurligini bir ovozdan ta’kidladi.
Gazetada O‘zbekistonning madaniy diplomatiya mexanizmlaridan unumli foydalangan holda mamlakatning boy tarixiy merosi va Islom sivilizatsiyasidagi o‘rnini jahon jamoatchiligiga keng yetkazish borasidagi sa’y-harakatlariga yuqori baho berilgan.
O‘zbekiston musulmonlari idorasi Matbuot xizmati
