Kuni kecha muhtaram Prezidentimiz Andijon viloyati Bosh jome masjidiga tashrif buyurganlari haqida xabar bergan edik. Tashrif chog'ida ushbu jome masjid bilan Andijon xalqini muborakbod etib, uzoq yillar xalqimizga xizmat qilishi so'raldi.

– Hamma joylarda muqaddas ziyoratgohlarni obod qilish, yangi masjid va ma'rifat markazlari qurishga e'tibor qaratyapmiz. Bunday xayrli ishlarni davom ettiramiz. Mo'min-musulmonlar bu erga kelib, ibodatlarni emin-erkin bajarib, shukronalik bilan xalqimizni duolar qilsa, nur ustiga nur, – dedi davlatimiz rahbari.

Bugun esa O'zbekiston musulmonlari idorasi raisi, muftiy Usmonxon Alimov hazratlari juma namozini mazkur jome masjidda minglab namozxonlar bilan birga ado etdilar. Andijon viloyati bosh imom-xatibi Mirzamaqsud domla Alimov, Diniy idora ish boshqaruvchisi Rustam Jamilov va O'zbekiston islom tsivilizatsiyasi markazi mas'ul xodimi Abror Muxtor Aliy hamrohlik qilmoqda.

Ushbu muhtasham va qadimiy jome masjidning ochilishi munosabati bilan muftiy hazratlari barcha yig'ilganlarni qutlab, bu dargohni barpo etishga hissa qo'shgan muhandislar, quruvchilar, bezakchilar, homiylarning haqqiga xayrli duolar qildilar.

Muftiy hazratlari juma mav'zisida bugungi kunda mo'min-musulmonlarga muhtaram Prezidentimiz rahnamoliklarida juda katta imkoniyatlar berilayotgani, sharoitlar hozirlanayotgani haqida gapirib, o'zgarishlar, yangilanishlar va xushxabarlar haqida so'zladilar. Hozirgi kunda mamlakatimizda olib borilayotgan muborak dinimiz taraqqiyoti yo'lidagi xayrli ishlar, yangi-yangi ijrootlar, xushxabarlar va bunday ne'matlarga har bir kishi tunu kun Parvardigorga shukrona qilishi lozimligini aytdilar.

Albatta, ushbu xursandchilikdan barcha birday xursand bo'lib, muftiy hazratlari boshchiligida barcha jamoat duoga qo'l ochib, Alloh taolodan yurtimiz tinchligi, xalqimizning farovonligini so'rab duoi-xayrlar qildilar.