Shahrisabzdagi ikki masjid binosi yangitdan qurilmoqda
Qashqadaryo viloyati, Shahrisabz shahridagi “Oisha ona” va Shahrisabz tumanidagi “Yangi qishloq-1” jome masjidlari yangi binosiga ilk g'isht qo'yish marosimlari bo'lib o'tdi. Unda O'zbekiston musulmonlari idorasi mas'ul xodimi Iskandar domla Halilov, Qashqadaryo viloyati bosh imom-xatibi Rahmatillo domla Usmonov, Shahrisabz shahar va tuman bosh imom-xatiblari va nuroniy otaxonlar, jamoat vakillari bilan birga masjid poydevoriga ilk g'ishtni qo'yishdi.
Shuningdek, yig'ilganlar Alloh taolodan masjid qurilish ishlari tez orada yakunlanishi, uzoq yillar mo'min-musulmonlarga xizmat qilishi, masjid qurulishiga hissa qo'shayotgan saxovatpesha insonlar, usta-mutaxassislar, hasharchilarga ajru savoblarni yanada ko'paytirib berishini so'rab duo qilindi.
Ma'lumot uchun, ushbu masjidlarning eski binosi yangitdan hashar va xayriya yo'li bilan barpo etiladi. Uning qurilishida zamonaviy va milliy me'morchilik an'analari uyg'unlashtirishga alohida e'tibor beriladi. Hozir masjidlarning poydevor ishlar olib borilmoqda. Shuningdek, yuz kishiga xizmat ko'rsatishga mo'ljallangan tahoratxonalar, ma'muriy va xizmat xonalar qurish reja qilingan.
Dinimizda masjid qurish yoki unga hissa qo'shishning savobi ulug' amallardan. Qur'oni karimda marhamat qilinadi: “Albatta, Allohning masjidlarini faqat Allohga va oxirat kuniga iymon keltirganlar, namozni to'kis ado etganlar, zakotni berganlar va Allohdan boshqadan qo'rqmaganlargina obod qilurlar. Ajab emaski, ana o'shalar hidoyat topguvchilardan bo'lsalar” (Tavba surasi, 18-oyat).
Rasululloh sollallohu alayhi vasallam bunday deydilar: “Kim Alloh yo'lida masjid uchun bitta g'isht qo'ysa, Alloh u uchun jannatda bitta qasr barpo qiladi”, deganlar.
Bu dunyoda qilgan har bir savob amalimiz oxirat uchun zahiradir. Allohga suyukli makonlarni obod qilganlarga esa jannatda qasr bino etiladi, inshoalloh.
O'zbekiston musulmonlari idorasi matbuot xizmati
Ota-onani hurmatlash odoblari
Ota-onaning roziligini olishga intilish fazilati barcha fazilatlarning negizi, borliqdagi har qanday haq-huquqlarning kelib chiqadigan asosidir.
Ota-onalar, bola tarbiyasi bilan shug‘ullanayotgan tarbiyachilar farzandlarga quyidagi odatlarni singdirishlari maqsadga muvofiq:
Gunohga sabab bo‘lmasa, otaonaning buyurganlarini albatta bajarish; ota-onaga muloyim so‘zlash; uyga kirganlarida, hurmatlari uchun o‘rnidan turish; har tong salom berish, uyqudan oldin xayrli tun tilash; mol-mulklarini saqlash; so‘ragan narsalarini berish; ulardan maslahat so‘rash; ota-ona haqiga duo va istig‘for aytish; ular mehmon kutishsa, yonlarida muntazir bo‘lib turish; ularning aytishlarini kutmay, ularni xursand qiladigan ishlarni bajarish; ularning huzurlarida ovozni baland ko‘tarmaslik; gaplarini bo‘lmaslik; izn berishmagan joyga bormaslik; uxlayotganlarida bezovta qilmaslik; ahli ayoli, farzandlarini ulardan ustun qo‘ymaslik; ota-ona xatoga yo‘l qo‘ysalar, bilmaslikka olish, darhol kechirib, unutish; kulgili gap bo‘lsa ham, ularning huzurlarida o‘zini tutish; ular yaxshi ko‘radigan taomni ilinish; ulardan oldin taomga qo‘l cho‘zmaslik; ularning oldilarida cho‘zilib yotmaslik, oyoq uzatmaslik; uyga ulardan oldin kirmaslik, oldilariga tushib yurmaslik; chaqirganlarida tezlik bilan javob berish; ularning hayotliklarida ham, vafot etganlaridan keyin ham do‘stlarini hurmat qilish; ota-onasining hurmatini qilmaydiganlar bilan do‘stlashmaslik; ularning haqlariga duo qilish; vafotlaridan keyin Allohning quyidagi kalomini ko‘p aytish: «Ey, Rabbim! Meni ular go‘daklik chog‘imda tarbiyalaganlaridek, Sen ham ularga rahm qilgin!» (Isro surasi, 24-oyat).
Ibrohimjon INOMOV tayyorladi.
“Islom nuri” gazetasining 2026 yil 10-sonidan
http://hidoyatuz.taplink.ws
