O'zbekistonning Londondagi elchixonasi ko'magida Buxoro shahar hokimi Jamol Nosirov va YeTTB vitse-direktori Kamola Maxmudova boshchiligida bir guruh vatandoshlar o'rtasida muzokaralar tashkil etildi. Buyuk Britaniyada istiqomat qilayotgan yurtdoshlarimiz tashabbusi bilan «Buxoro - yashil shahar» xayriya loyihasi amalga oshirilmoqda, deb xabar bermoqda «Dunyo» AA.

Tadbirda O'zbekiston landshaft san'ati uyushmasi rahbariyati va loyihani amalga oshirishda yordam berayotgan buxorolik ko'ngillilar ham ishtirok etdi.

«Buxoro - yashil shahar» loyihasi shaharni ko'kalamzorlashtirish, havo tarkibi va mikroiqlimni yaxshilash maqsadida shahar ma'muriyati va jamoatchilik vakillari hamkorligida bir necha ming tup daraxt va bo'talar ekishni nazarda tutadi.

Loyiha tashabbuskori va rahbari Kamola Mahmudova hamda loyiha asoschilaridan biri, Kembrij universiteti doktori Temur Yunusovning ma'lum qilishicha, loyiha doirasida daraxtlarning holatini kuzatish, atrof-muhitni muhofaza qilish, aholi, ayniqsa, yosh avlod o'rtasida «yashil» rivojlanish g'oyasini targ'ib etishda faol ishtirok etadigan ko'ngillilarni tayyorlash bo'yicha media haftalik tashkil etish ko'zda tutilgan. Bundan tashqari, loyiha doirasida ekilgan daraxtlarning elektron interaktiv xaritasi yaratiladi. Bu nafaqat O'zbekistonda, balki butun MDH bo'ylab noyob loyiha bo'ladi.

«Buxoro - yashil shahar» tashabbusini amalga oshirish uchun 100 ming evro mablag' yo'naltiriladi. Ushbu mablag'lar tadbirkorlar va vatandoshlar tomonidan to'plandi va YeTTBning barqaror o'sish xayriya loyihalarini qo'llab-quvvatlash va aholi salomatligini yaxshilash bo'yicha maxsus jamg'armasi tomonidan taqdim etildi.

Buxoro shahar hokimi Jamol Nosirov vatandoshlar, O'zbekiston landshaft san'ati uyushmasi va ko'ngillilarga shaharni ko'kalamzorlashtirish maqsadida qilinayotgan sa'y-harakatlari uchun o'z minnatdorligini bildirib, loyihani amalga oshirishda, jumladan, sug'orish va ekinlarni to'g'ri parvarish qilish bo'yicha barcha imkoniyatlar yaratib berilishini bildirdi. Barcha sa'y-harakatlarni birlashtirish va yuzaga kelayotgan masalalarni tezkorlik bilan hal qilish maqsadida tomonlar doimiy muloqotni davom ettirish bo'yicha kelishib oldi.

O'zbekiston musulmonlari idorasi matbuot xizmati