Islomdan oldingi hayotimni hayot deb hisoblamayman
G'ayridin bo'lgan, keyinchalik islomga kirgan bir ayol o'zining islomga kirish tarixini hikoya qiladi:
«Men shifokor edim. Mening bo'limimda bir qari muslima ayol davolanardi. Uning oldiga, boshqalardan farqli o'laroq, ertayu kech bir er-xotin yo'qlab kelardi. Hali dori-darmon, hali ko'ngli tusagan eguliklar olib kelar, kayfiyatini ko'tarib, yaxshi gaplar bilan ko'nglini olishardi.
Bir kuni ulardan: «Sizlarga bu ayol kim bo'ladi?», deb so'radim.
Erkak: «Mening onam», ayol esa, «Mening qaynonam», deb javob berdi. Mening hayratim yanada ortdi. Ayolga qarab: «Bu kishi-ku, onasiga qarayotgan ekan, siz nega bunchalik g'amxo'rlik qilasiz? Hozirgi kunda hech qaysi ayol birovga bunchalik mehr ko'rsatmay qo'ygan. Kuzatib tursam, u ayolga qarab yig'lab ham qo'yasiz hatto», dedim.
Shunda ayol tushuntirdi: «Bu kishi mening turmush o'rtog'im. Uning roziligida Allohning roziligi bor. Uning roziligi esa, onasining roziligida».
«Sizni bunday qilishga nima majbur qiladi?»
«Dinim shunga buyuradi». So'ngra Islom nima, uning qanday shartlari bor, qanday yaxshiliklari bor, qisqacha tushuntirib berdi.
Uning so'zlarini eshitib, o'ylanib qoldim. Mening ham bir o'g'il, bir qizim bor. Bir yilda bir qandaydir marosim bo'lib qolsa ko'rishamiz, bo'lmasa yo'q. Men kasal bo'lib, shifoxonaga tushib qolsam, o'zim xabar bermagunimcha bilishmaydi ham.
So'ngra undan islomga qanday kirishni so'rab, musulmon bo'ldim. Erim bilan ajrashib, musulmon davlatga ko'chib ketdim. O'sha erda bir musulmon erkakka turmushga chiqdim. Hozir ikki qizim bor. Baxt nimaligini birinchi bor tuydim. Islomdan oldingi hayotimni hayot deb hisoblamayman.
Hikoyani o'qib, Umar ibn Hattob roziyallohu anhuning bir so'zlari yodimga tushdi:
«Islomga jim turgan holingizda da'vat qilinglar!»
Sahobalar so'rashdi:
«Ey, amirul mu'miniyn, qanday qilib?»
«Go'zal xulqinglar bilan!», degan edilar.
Pol Kapur: «Bu yerda tarixni nafaqat ko‘rasiz, balki uni his qilasiz»
AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur O‘zbekistondagi Islom sivilizatsiyasi markaziga tashrif buyurdi, xabar bermoqda iccu.uz.
Islom sivilizatsiyasining ko‘p asrlik tarixi, uning ilm-fan, madaniyat va ma’rifat taraqqiyotiga qo‘shgan ulkan hissasi O‘zbekistondagi Islom sivilizatsiyasi markazi ekspozitsiyalarida yaxlit va ta’sirchan tarzda namoyon etilgan. Tashrif davomida Samir Pol Kapur islomgacha bo‘lgan davr sivilizatsiyalaridan tortib, Yangi O‘zbekiston davriga qadar bo‘lgan tarixiy jarayonlarni aks ettiruvchi galereyalar, buyuk allomalarning ilmiy-ma’rifiy merosi, noyob qo‘lyozmalar, muqaddas yodgorliklar hamda zamonaviy raqamli texnologiyalar asosida yaratilgan interaktiv ekspozitsiyalar bilan yaqindan tanishdi.
Mehmon ekspozitsiyalarning mazmunan izchilligi va tarixiy jarayonlarni bir-biri bilan uzviy bog‘liq holda namoyon etish usuliga alohida e’tibor qaratdi. Uning qayd etishicha, bu yerda muzey eksponatlari orqali o‘tmish haqida ma’lumot olish bilan cheklanib qolmay, tarixiy davrlar ruhini his qilish, ular o‘rtasidagi bog‘liqlikni anglash imkoni ham mavjud.
Samir Pol Kapur o‘z taassurotlarini quyidagicha ifodaladi:
«Bu muhtasham maskan. Islom tarixi va madaniyatining asrlar davomidagi taraqqiyoti bilan yaqindan tanishish men uchun unutilmas tajriba bo‘ldi. Bu yerda tarixni shunchaki kitob sahifalari orqali emas, balki o‘z ko‘zingiz bilan ko‘rasiz, uni his qilasiz va go‘yo o‘sha davrlarning ichida bo‘lasiz. Shu bois ushbu noyob maskanni barpo etishga hissa qo‘shgan barcha insonlarga samimiy minnatdorchilik bildiraman.
Yoshlarga ham bu yerga kelishni albatta tavsiya qilaman. Chunki bu maskan nafaqat tarixni o‘rganish, balki o‘tmish bilan kelajak o‘rtasidagi uzviy bog‘liqlikni anglash imkonini beradi. Men uchun eng esda qolarli lahzalardan biri Qur’oni karimga bag‘ishlangan golografik namoyish bo‘ldi. U menda katta taassurot va hayajon uyg‘otdi.
Menimcha, bu dargoh islom sivilizatsiyasining jahon tamadduniga qo‘shgan ulkan hissasini butun dunyoga namoyon etishga xizmat qiladi. Shuning uchun har bir inson bu yerga tashrif buyurib, ana shu boy va bebaho meros bilan shaxsan tanishishi lozim».
Pol Kapurning fikricha, Markazning ahamiyati uning tarixiy merosni namoyon etish bilangina cheklanmaydi. Ushbu maskan yosh avlod uchun o‘tmish saboqlarini anglash, ilm-fan va ma’rifatning sivilizatsiya taraqqiyotidagi o‘rnini his etish, milliy va umuminsoniy qadriyatlarga hurmat ruhini shakllantirish uchun ham muhim ma’naviy-ma’rifiy maydon vazifasini o‘taydi.
Tashrif yakunida AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur Islom sivilizatsiyasi markazidan olgan taassurotlari yuksak ekanini qayd etib, ushbu maskan boy tarixiy merosni zamonaviy muzey texnologiyalari va ta’sirchan taqdimot usullari orqali jahon jamoatchiligiga yetkazishda muhim ahamiyat kasb etishini ta’kidladi.
O‘zbekiston musulmonlari idorasi Matbuot xizmati
